By ខេត្តកណ្តាល ៖ ជនសង្ស័យម្នាក់ ព្រោះតែភ្លើងកំហឹ.ងគុំកួនជាមួយម្ចាស់ផ្ទះយកសាំងដុតផ្ទះឆេះផ្អើល អ្នកភូមិចាប់ជាប់ប្រគល់ជូនសមត្ថកិច្ច ។ ហេតុការណ៍នេះបានកើតឡើងកាលពីវេលាម៉ោង០៨នាទីយប់ ថ្ងៃទី១៣ ខែឧសភា ឆ្នាំ២០២៥ នៅចំណុចភូមិគរ ឃុំក្រាំងយ៉ូវ ស្រុកស្អាង ខេត្តកណ្ដាល ។
សមត្ថកិច្ចបានឱ្យដឹងថា ជនសង្ស័យមានឈ្មោះ ឆុន សុងម៉េង ភេទប្រុស អាយុ២៦ឆ្នាំ ជនជាតិខ្មែរ មុខរបរមិនពិតប្រាកដ មានទីលំនៅភូមិទួលក្រាំង ឃុំក្រាំងយ៉ូវ ស្រុកស្អាង ខេត្តកណ្ដាល មានសារធាតុញៀ.នវិជ្ជមាន ។
ក្នុងនោះ វត្ថុតាងចាប់យក ដបទឹកសុទ្ធចំនួន០២ ដែកកេះចំនួន០១ ពណ៌លឿង មានហ្គាសជិតពេញ ។ ចំណែកជនរងគ្រោះ ឈ្មោះ រ៉េត កៅ ភេទស្រី អាយុ៤៦ឆ្នាំ ជនជាតិខ្មែរ មុខរបរកសិករ មានទីលំនៅភូមិគរ ឃុំក្រាំងយ៉ូវ ស្រុកស្អាង ខេត្តកណ្ដាល ។
សមត្ថកិច្ចបន្តថា ជនសង្ស័យបានជិះម៉ូតូមួយគ្រឿងមកធ្វើសកម្មភាពយកប្រេងសាំងចំនួន២ដប ស្មើ០១លីត្រ ចាក់ស្រោចទៅលើទ្វារផ្ទះ និងកាំជណ្ដើរផ្ទះរបស់ជនរងគ្រោះហើយបានយកដែកកេះបញ្ឆេះដុត បណ្ដាលឱ្យឆេះ ខណៈពេលនោះជនរងគ្រោះបានស្រែកឆោឡោ ទៅដល់បងប្អូនប្រជាពលរដ្ឋនាំគ្នាជួយយកទឹកមកជួយពន្លត់ភ្លើ.ង ហើយបានបើកទ្វារចុះមកខាងក្រោមផ្ទះ ឃើញជនសង្ស័យកំពុងរត់គេចឡើងជិះម៉ូតូបម្រុងគេចខ្លួន ។
ភា្លមនោះជនរងគ្រោះក៏បានស្រែកឱ្យអ្នកជិតខាងជួយចាប់ឃាត់ខ្លួនជនសង្ស័យ រួចរាយការណ៍មកសមត្ថកិច្ចនគរបាលប៉ុស្តិ៍ក្រាំងយ៉ូវ ។
បន្ទាប់ពីទទួលបានព័ត៌មានខាងលើ កម្លាំងប៉ុស្តិ៍នគរបាលរដ្ឋបាលក្រាំងយ៉ូវបានឃាត់ខ្លួនជនសង្ស័យយកមកប៉ុស្តិ៍ ដើម្បីធ្វើការសាកសួរ ។ នៅចំពោះមុខ សមត្ថកិច្ចនគរបាលជនសង្ស័យបានឆ្លើយសារភាពថា ខ្លួនបានដុតផ្ទះរបស់ជនរងគ្រោះនោះដោយមានគំនុំ ។ បច្ចុប្បន្នជនសង្ស័យត្រូវ បានបញ្ជូនមកអធិការដ្ឋាននគរបាលស្រុកស្អាង ដើម្បីកសាងសំណុំរឿងចាត់ការតាមនីតិវិធី ៕
