By រាជធានីភ្នំពេញ ៖ ការប្រកួតកីឡាតេក្វាន់ដូ(WT)ជ្រើសរើសជើងឯកកុមារ អបអរសាទរខួបលើកទី៧៦ ទិវាកុមារអន្តរជាតិ១មិថុនា ឆ្នាំ២០២៥ ដែលបានប្រព្រឹត្តទៅអស់រយៈពេល១ថ្ងៃពេញនៅវិទ្យាល័យបឹងត្របែក បានប្រកាសបិទការប្រកួតជាផ្លូវការហើយកាលពីល្ងាចថ្ងៃទី២៥ ខែមិថុនា ឆ្នាំ២០២៥ ក្រោមអធិបតីភាពឯកឧត្តមជ័យ ចាប ប្រធានសមាគមកីឡាតេក្វាន់ដូWTរាជធានីភ្នំពេញ។
លោក សំ សុខយី ប្រធានគណៈកម្មការរៀបចំការប្រកួតបានឱ្យដឹងថា ការប្រកួតកីឡាតេក្វាន់ដូជ្រើសរើសជើងឯកកុមារអបអរសាទរខួបលើកទី៧៦ទិវាកុមារអន្តរជាតិឆ្នាំ២០២៥ នេះរៀបចំឡើងស្របតាមផែនការប្រចាំឆ្នាំរបស់សមាគមកីឡាតេក្វាន់ដូរាជធានីភ្នំពេញដោយមានកិច្ចសហការជាមួយសហភាពសហព័ន្ធយុវជនកម្ពុជា រាជធានីភ្នំពេញ និងអង្គភាពពាក់ព័ន្ធនានា ព្រមទាំងបានការគាំទ្រពីសំណាក់មាតាបិតាសិស្សគុនក្លិបផងដែរ។ សម្រាប់ការប្រកួតនេះមានក្លិបចំនួន៧ចូលរួម និងមានប្រតិភូ គ្រូបង្វឹក កីឡាករ កីឡាការិនីសរុបចំនួន១៣១នាក់ក្នងនោះកីឡាការិនីចំនួន៦០នាក់។
ចំណែកវិញ្ញាសាដែលបានដាក់ឱ្យប្រកួតមានវិញ្ញាសាទាត់ល្បឿន វិញ្ញាសាទាត់ខ្ពស់ច្រើនជើង
វិញ្ញាសាមេគុណឯកត្តជន វិញ្ញាសាប្រយុទ្ធឯកត្តជនបុរស-នារី ។
ឆ្លងកាត់ការប្រកួតអស់រយៈពេល១ថ្ងៃពេញជាលទ្ធផលបច្ចេកទេសចំណាត់ថ្នាក់លេខ១បានទៅលើក្លិបវិទ្យាល័យបឹងត្របែក ដណ្ដើមបានមេដាយ៤៤គ្រឿងក្នុងនោះមេដាយមាសចំនួន១៦គ្រឿង មេដាយប្រាក់ចំនួន១៤គ្រឿងនិងមេដាយសំរឹទ្ធ១៤គ្រឿង ។ ចំណាត់លេខ២បានទៅលើវិទ្យាល័យហ៊ុនសែនចាក់អង្រែដណ្ដើមបានមេដាយចំនួន២០គ្រឿងក្នុងនោះមេដាយមាសចំនួន៤គ្រឿង មេដាយប្រាក់ចំនួន៩គ្រឿងនិងមេដាយសំរឹទ្ធចំនួន៧គ្រឿង ។ ចំណាត់ថ្នាក់លេខ៣បានទៅលើសមាគមកីឡាតេក្វាន់ដូខេត្តសៀមរាប ដណ្ដើមបានមេដាយចំនួន៧គ្រឿង ក្នុងនោះមេដាយមាសចំនួន៤គ្រឿង មេដាយប្រាក់ចំនួន២គ្រឿង និងមេដាយសំរឹទ្ធចំនួន១គ្រឿង ។ ចំណាត់ថ្នាក់លេខ៤បានទៅលើសាលាបឋមសិក្សាចតុមុខ ដណ្ដើមបានមេដាយចំនួន៦គ្រឿងក្នុងនោះមេដាយមាស២គ្រឿង មេដាយប្រាក់១គ្រឿង និងមេដាយសំរឹទ្ធ៣គ្រឿង ។
ចំណាត់ថ្នាក់លេខ៥បានទៅលើវិទ្យាល័យជាស៊ីម សន្ធរម៉ុក ដណ្ដើមបានមេដាយ៧គ្រឿងក្នុងនោះមេដាយមាស១គ្រឿង មេដាយប្រាក់២គ្រឿង និងមេដាយសំរឹទ្ធ៤គ្រឿង និងចំណាត់ថ្នាក់លេខ៦បានទៅលើសាលាអន្តរជាតិខេមហ្វឺស ដណ្ដើមបានមេដាយ៣គ្រឿងក្នុងនោះ មេដាយមាស១គ្រឿង និងមេដាយសំរឹទ្ធ២គ្រឿង។
ក្នុងឱកាសនោះឯកឧត្តមជ័យ ចាប បានសម្ដែងនូវការដឹងគុណយ៉ាងជ្រាលជ្រៅទៅដល់ណៈកម្មការរៀបចំការប្រកួត មាតាបិតា អាណាព្យាបាល កីឡាករ កីឡាការិនី សហភាពសហព័ន្ធយុវជនកម្ពុជារាជធានីភ្នពេញ និងស្ថាប័នពាក់ព័ន្ធទាំងអស់ ដែលតែងតែគាំទ្រសកម្មភាពរបស់សមាគមកីឡាតេក្វាន់ដូរាជធានីភ្នំពេញ ។ ការគាំទ្រមានដូចជាជួយផ្ដល់ជាសម្ភារៈ ថវិកា ជាពិសេសផ្ដល់នូវកម្លាំងចិត្ត រហូតទទួលបានផ្លែផ្កានាពេលនេះ ។
ឯកឧត្តមបានគូសបញ្ជាក់ថា ការអភិវឌ្ឍធនធានមនុស្សគឺជាកត្តាដែលចាំបាច់បំផុត ជាពិសេសកុមារា កុមារីជាទំពាំងស្នងឬស្សី ។ ដូចនេះត្រូវឱ្យកុមារលេងកីឡាមួយប្រភេទប្រចាំជីវិត និងចូលរួមការប្រកួតនានា ដើម្បីបញ្ចេញសមត្ថភាព ពង្រឹងសាមគ្គីភាព ឥរិយាបទផ្ទាល់ខ្លួនជា«សិស្សល្អ មិត្តល្អ កូនល្អ» ៕
