By ភ្នំពេញ៖ រមណីយដ្ឋានអង្គរ ដែលជាបេតិកភណ្ឌពិភពលោក និងជាព្រលឹងនៃព្រះរាជាណាចក្រកម្ពុជា នៅតែបន្តជាមាសទឹកដប់ដ៏មានតម្លៃសម្រាប់សេដ្ឋកិច្ចជាតិ។ យោងតាមក្រសួងព័ត៌មាន ចេញផ្សាយនៅថ្ងៃទី០៣ ខែវិច្ឆិកា ឆ្នាំ២០២៥ គ្រឹះស្ថានអង្គរបានបង្ហាញរបាយការណ៍ប្រចាំខែថា ក្នុងរយៈពេល ១០ខែដើមឆ្នាំនេះ គឺចាប់ពីខែមករាដល់ខែតុលា ឆ្នាំ២០២៥ រមណីយដ្ឋានអង្គរបានរកចំណូលបានយ៉ាងតិច ៣៥លានដុល្លារអាមេរិក ពីការលក់បណ្ណចូលទស្សនាជូនភ្ញៀវទេសចរអន្តរជាតិជាង ៧៦ម៉ឺននាក់។
មិនត្រឹមតែប្រាសាទអង្គរវត្តប៉ុណ្ណោះទេ ប្រាសាទកោះកែ ដែលជាគោលដៅទេសចរណ៍ដ៏ពេញនិយមមួយទៀត ក៏បានរួមចំណែកយ៉ាងសកម្មក្នុងការរកចំណូលផងដែរ។ ក្នុងរយៈពេលដូចគ្នា គ្រឹះស្ថានអង្គរបានប្រមូលចំណូលពីការលក់សំបុត្រចូលទស្សនាប្រាសាទកោះកែ បានប្រមាណជាង ២៣ម៉ឺនដុល្លារ។ រីឯចំណូលពីសេវាលក់សំបុត្រទូកវិញ ក៏មានការកើនឡើងគួរឱ្យកត់សម្គាល់ ដោយទទួលបានជាង ១លានដុល្លារអាមេរិក។
ទោះបីជាយ៉ាងណាក៏ដោយ របាយការណ៍ក៏បានបង្ហាញពីការធ្លាក់ចុះបន្តិចបន្តួចនៃចំនួនភ្ញៀវទេសចរបរទេសដែលបានទិញសំបុត្រចូលទស្សនារមណីយដ្ឋានអង្គរក្នុងខែតុលា ឆ្នាំ២០២៥។ ស្ថិតិបានឱ្យដឹងថា មានភ្ញៀវត្រឹមតែជាង ៦ម៉ឺននាក់ប៉ុណ្ណោះ ដែលនេះជាការថយចុះប្រមាណជាង ១៨ភាគរយ បើធៀបនឹងរយៈពេលដូចគ្នាក្នុងឆ្នាំ ២០២៤។
អ្វីដែលកាន់តែពិសេស រាជរដ្ឋាភិបាលកម្ពុជា ក៏បានបន្តយកចិត្តទុកដាក់ខ្ពស់ចំពោះសុខុមាលភាពកុមារផងដែរ។ ក្នុងរយៈពេល ១០ខែដើមឆ្នាំនេះ ថវិកាដែលប្រមូលបានពីវិស័យទេសចរណ៍ រាប់បញ្ចូលទាំងចំណូលពីអង្គរវត្តផងនោះ ជាង ១,៥លានដុល្លារអាមេរិក ត្រូវបានឧបត្ថម្ភចូលទៅក្នុងមូលនិធិនៃមន្ទីរពេទ្យគន្ធបុប្ផាកម្ពុជា ដើម្បីរួមចំណែកទ្រទ្រង់ការសង្គ្រោះជីវិតកុមារកម្ពុជារាប់ពាន់នាក់។ នេះពិតជាកាយវិការដ៏ថ្លៃថ្លា ដែលបង្ហាញពីការយកចិត្តទុកដាក់របស់រាជរដ្ឋាភិបាលចំពោះប្រជាពលរដ្ឋ។
ប្រភព៖ ក្រសួងព័ត៌មាន
