By រាជធានីភ្នំពេញ ៖ ឯកឧត្តម ឧបនាយករដ្ឋមន្ត្រី ប្រាក់ សុខុន រដ្ឋមន្ត្រីការបរទេស និងសហប្រតិបត្តិការអន្តរជាតិ បានបញ្ជាក់ជាថ្មីនូវការប្តេជ្ញាចិត្តដ៏មុតមាំរបស់កម្ពុជា ចំពោះកិច្ចព្រមព្រៀងសន្តិភាព ក្នុងជំនួបជាមួយឯកឧត្តម Michael George DeSombre ឧបការីរដ្ឋមន្ត្រីការបរទេសអាម៉េរិក ទទួលបន្ទុកតំបន់អាស៊ីបូព៌ា និងប៉ាស៊ីហ្វិក នៅទីស្តីការក្រសួង នៅព្រឹកថ្ងៃទី ៤ ខែវិច្ឆិកា ឆ្នាំ ២០២៥។ នេះបើយោងតាមប្រភពពីក្រសួងការបរទេស។ 
ក្នុងជំនួបនោះ ឯកឧត្តម ឧបនាយករដ្ឋមន្ត្រី ប្រាក់ សុខុន បានសម្តែងការអរគុណយ៉ាងជ្រាលជ្រៅជូនចំពោះអតីតប្រធានាធិបតីអាម៉េរិក លោក ដូណាល់ ត្រាំ ចំពោះតួនាទីដ៏សំខាន់របស់លោក ក្នុងការធានាបាននូវកិច្ចព្រមព្រៀងសន្តិភាពរវាងកម្ពុជា និងថៃ កន្លងមក។ ជាមួយគ្នានោះ ឯកឧត្តម ក៏បានអះអាងសារជាថ្មីនូវការប្តេជ្ញាចិត្តមិនប្រែប្រួលរបស់កម្ពុជា ក្នុងការគោរព និងអនុវត្តកិច្ចព្រមព្រៀងសន្តិភាពនេះ។
ប្រភពដដែលបានបន្ថែមថា ភាគីទាំងពីរក៏បានពិភាក្សាគ្នាផងដែរអំពីមធ្យោបាយពង្រឹងទំនាក់ទំនងទ្វេភាគី ដោយពង្រីកកិច្ចសហប្រតិបត្តិការលើវិស័យសំខាន់ៗមួយចំនួន រួមមាន៖ ពាណិជ្ជកម្ម វិនិយោគ ការពារជាតិ និងការប្រយុទ្ធប្រឆាំងនឹងឧក្រិដ្ឋកម្មឆ្លងដែនជាដើម៕
