By កងទ័ពថៃបានចេញសេចក្តីថ្លែងការណ៍ជាថ្មីម្តងទៀតដោយបានបញ្ជាក់យ៉ាងច្បាស់ថា ទាហានខ្មែរចំនួន១៨រូបដែលត្រូវបានឃាត់ខ្លួនអំឡុងពេលជម្លោះព្រំដែនកម្ពុជា-ថៃនាពេលកន្លងទៅនោះ នឹងត្រូវបានដោះលែងវិញ លុះត្រាណាតែស្ថានការណ៍ប្រទូសរាយត្រូវបានបញ្ចប់ជាផ្លូវការ ហើយលក្ខខណ្ឌសំខាន់ៗចំនួន២ទៀតត្រូវបានបំពេញ។
តាមការចុះផ្សាយរបស់ The Nation កាលពីថ្ងៃអង្គារទី៤ ខែវិច្ឆិកា លោក Jongjet Vacharanan អ្នកនាំពាក្យរងរបស់កងទ័ពថៃបានគូសបញ្ជាក់ថា ដំណើរការដោះលែងនេះនឹងត្រូវ «អនុវត្តតាមពិធីសារដ៏តឹងរ៉ឹង» ហើយអាចប្រព្រឹត្តទៅបានលុះត្រាតែលក្ខខណ្ឌទាំងពីរត្រូវបានសម្រេចពេញលេញ។ លក្ខខណ្ឌទាំងនោះរួមមាន៖ ការដកអាវុធធុនធ្ងន់ទាំងស្រុងដូចជា កាំភ្លើងធំ រថក្រោះ និងប្រព័ន្ធរ៉ុក្កែតជាដើម។ ទី២ គឺការបោសសម្អាតមីននៅក្នុងតំបន់កំណត់ចំនួន៥ រួមមាន៖ Ban Sai Tho ក្នុង Buriram, Chong Hew នៅ Surin, Ban Nong Chan និង Ban Nong Ya Kaew ក្នុងខេត្តស្រះកែវ និង Ban Cham Rak ក្នុងខេត្ត Trat។
កន្លងមក ភាគីថៃតែងអះអាងថា ការឃុំឃាំងទាហានកម្ពុជាទាំងនេះ (ដែលពួកគេហៅថាអ្នកទោសសង្គ្រាម) គឺអនុលោមតាមអនុសញ្ញាទីក្រុងហ្សឺណែវទី៣ ដែលចែងថាអ្នកទោសសង្គ្រាមត្រូវដោះលែង និងបញ្ជូនត្រឡប់ទៅប្រទេសកំណើតវិញ «ដោយគ្មានការពន្យារពេលបន្ទាប់ពីការបញ្ចប់នៃអរិភាពសកម្ម»។ យោធាថៃបានសង្កត់ធ្ងន់ថា ជម្លោះមិនទាន់បានបញ្ចប់នៅឡើយទេ បើទោះជាមានកិច្ចព្រមព្រៀងបទឈប់បាញ់ និងការប្រកាសរួមនាពេលថ្មីៗនេះនៅប្រទេសម៉ាឡេស៊ីក្រោមវត្តមានប្រធានាធិបតីអាមេរិកលោក Donald Trump ក៏ដោយ។
ផ្ទុយទៅវិញ កម្ពុជាបានជំរុញឲ្យមានការដោះលែងទាហានរបស់ខ្លួនជាបន្ទាន់ ដោយលើកឡើងថា ការបន្តឃុំខ្លួននេះគឺជាការរំលោភបំពានលើច្បាប់មនុស្សធម៌អន្តរជាតិ ជាពិសេសចាប់តាំងពីបទឈប់បាញ់ត្រូវបានបង្កើតឡើង។ គួរបញ្ជាក់ថា មានតែទាហានកម្ពុជាចំនួន២រូបប៉ុណ្ណោះដែលត្រូវបានភាគីថៃដោះលែងកាលពីថ្ងៃទី១ ខែសីហា ក្នុងចំណោមទាហានសរុប២០រូបដែលត្រូវចាប់ខ្លួនកាលពីថ្ងៃទី២៩ ខែកក្កដា ក្រោយបទឈប់បាញ់ចូលជាធរមាន។
