By ខេត្តមណ្ឌលគិរី ៖ ព្រឹត្តិការណ៍ប្រណាំងទូកខ្នាតតូច លក្ខណៈប្រពៃណីដ៏អធិកអធម នៅចំណុចទំនប់អូរប្រង់ ស្ថិតនៅភូមិស្រែហ៊ុយ ឃុំស្រែហ៊ុយ ស្រុកកោះញែក ខេត្តមណ្ឌលគិរី រយៈពេល ២ថ្ងៃ ចាប់ពីថ្ងៃទី០១-០២ ខែវិច្ឆិកា ឆ្នាំ២០២៥ ដែលរដ្ឋបាលស្រុកកោះញែក បានរៀបចំឡើងដើម្បីអបអរពិធីបុណ្យអុំទូក បណ្តែតប្រទីប អកអំបុក និងសំពះព្រះខែ ឆ្នាំ២០២៥នេះ ត្រូវបានបញ្ចប់ទៅដោយភាពសប្បាយរីករាយជាអនេក និងទទួលបានការសាទរយ៉ាងកក់ក្តៅពីបងប្អូនប្រជាពលរដ្ឋគ្រប់មជ្ឈដ្ឋាន។
លោក សី ទូច អភិបាលស្រុកកោះញែក បានមានប្រសាសន៍ថា ក្នុងរយៈពេល ២ថ្ងៃនេះ រដ្ឋបាលស្រុក បានរៀបចំការប្រណាំងទូកខ្នាតតូច ជាលក្ខណៈប្រពៃណីនេះឡើង ដើម្បីទទួលស្វាគមន៍ប្រជាពលរដ្ឋដែលបានអញ្ជើញមកចូលរួមទស្សនាកម្សាន្ត នៅក្នុងឱកាសនៃពិធីបុណ្យអុំទូកនេះ។ ម្យ៉ាងវិញទៀត គឺដើម្បីបង្កលក្ខណៈឲ្យកាន់តែសប្បាយរីករាយ និងរក្សាបាននូវសុខសុវត្ថិភាពជូនដល់ប្រជាពលរដ្ឋដែលមកទស្សនាទាំងអស់។
លោកក៏បានផ្តាំផ្ញើដល់បងប្អូនកីឡាករចំណុះទូកទាំងអស់ ត្រូវចាត់ទុកថា ពិធីបុណ្យប្រណាំងទូកនេះ ជាការចូលរួមចំណែកថែរក្សាវប្បធម៌ ប្រពៃណីជាតិដ៏ល្អផូរផង់របស់យើងឲ្យបានគង់វង្សស្ថិតស្ថេរជានិច្ចនិរន្តរ៍តរៀងទៅ។
ជាមួយគ្នានេះ លោកក៏បានសំណូមពរដល់កីឡាករចំណុះទូកទាំងអស់ សូមយកចិត្តទុកដាក់គោរពតាមបទបញ្ជាផ្ទៃក្នុងរបស់គណៈកម្មការបច្ចេកទេស ក្នុងន័យប្រកួតដោយស្មារតីកីឡា ដើម្បីចូលរួមចំណែកធ្វើឲ្យពិធីប្រណាំងទូករបស់យើងទទួលបានជោគជ័យ ភាពថ្លៃថ្នូរ និងថែរក្សាបាននូវប្រពៃណីដ៏ល្អផូរផង់របស់ជាតិយើងឲ្យកាន់តែរុងរឿង។
លោកបានថ្លែងអំណរគុណយ៉ាងជ្រាលជ្រៅចំពោះសប្បុរសជនទាំងអស់ ដែលបានជួយឧបត្ថម្ភគាំទ្រ ទាំងស្មារតី សម្ភារៈ និងថវិកា រួមចំណែកជាមួយរដ្ឋបាលស្រុកកោះញែក ក្នុងការរៀបចំពិធីនេះឡើងប្រកបទៅដោយភាពរលូន និងសប្បាយរីករាយ។ លោកក៏បានណែនាំដល់ប្រជាពលរដ្ឋ និងយុវជនទាំងអស់ ត្រូវចូលរួមសំអាតអនាម័យបរិស្ថានទាំងអស់គ្នា ជាពិសេស ត្រូវគោរពច្បាប់ចរាចរណ៍ និងត្រូវចៀសឲ្យផុតពីបញ្ហាគ្រឿងញៀន។
នាឱកាសនោះ យុវជន និងប្រជាពលរដ្ឋយ៉ាងច្រើនកុះករ ដែលបានចូលរួមទស្សនាក្នុងពិធីប្រណាំងទូកខ្នាតតូច លក្ខណៈប្រពៃណីនេះ ក៏បានបង្ហាញអារម្មណ៍សប្បាយរីករាយជាខ្លាំង ដែលអាជ្ញាធរស្រុក បានរៀបចំព្រឹត្តិការណ៍នេះឡើង ដើម្បីឲ្យប្រជាពលរដ្ឋមកពីបណ្តាឃុំ ក្នុងស្រុក និងបណ្តាខេត្តនានា បានជួបជុំគ្នា និងបង្កលក្ខណៈឲ្យកាន់តែសប្បាយរីករាយផងដែរ។
សូមបញ្ជាក់ថា រដ្ឋបាលស្រុកកោះញែក រៀបចំព្រឹត្តិការណ៍ប្រណាំងទូក រយៈពេលពីរថ្ងៃនេះ មានទូកចូលរួមប្រកួតចំនួន ១០ទូក ស្មើនឹង ៥គូ ក្នុងនោះ ទូកចំណុះ ២០នាក់ មានចំនួន ៦ទូក ស្មើនឹង ៣គូ និងទូកចំណុះ ៨នាក់ មានចំនួន ២គូ។ លទ្ធផលចំណាត់ថ្នាក់ជ័យលាភី៖ ទូក«មហារិទ្ធជ័យសិទ្ធីមុនីតេជះជំទាវខ្មៅ» ចំណុះ ២០នាក់ មកពីឃុំស្រែហ៊ុយ ទទួលបានចំណាត់ថ្នាក់លេខ ១ និងទូក«រ៉ែថាមពលសែនជ័យលោកតាស្រុះ» ចំណុះ ០៨នាក់ ក៏ទទួលបានចំណាត់ថ្នាក់លេខ ១ ផងដែរ។
