By រាជធានីភ្នំពេញ ៖ ក្រសួងធនធានទឹក និងឧតុនិយម បានចេញសេចក្តីប្រកាសព័ត៌មានថា ព្យុះទី២៥ ឈ្មោះកាលម៉េហ្គី នៅមិនទាន់បង្កការរំខានខ្លាំងដល់ពិធីបុណ្យអុំទូកនាពេលបច្ចុប្បន្ននេះនៅឡើយទេ ។ ប៉ុន្តែឥទ្ធិពលនៃព្យុះនេះ អាចនឹងមកដល់ប្រទេសកម្ពុជានៅថ្ងៃទី៨ ខែវិច្ឆិកាខាងមុខ ។
យោងតាមការព្យាករអាកាសធាតុចាប់ពីថ្ងៃទី៥ ដល់ថ្ងៃទី៧ ខែវិច្ឆិកា ឆ្នាំ២០២៥ សីតុណ្ហភាពអប្បបរមានឹងធ្លាក់ចុះដល់២១អង្សាសេ ចំណែកសីតុណ្ហភាពអតិបរមាគឺ២៩អង្សាសេ ។ ជាមួយគ្នានេះ ក៏មានភ្លៀងផ្គររន្ទះ និងខ្យល់កន្ត្រាក់ក្នុងកម្រិតពី ២៥% ទៅ ៣៥% ប៉ុណ្ណោះ ។
សម្រាប់តំបន់ខ្ពង់រាប ក្រសួងបានបញ្ជាក់ថា នឹងមានភ្លៀងផ្គររន្ទះ និងខ្យល់កន្ត្រាក់ត្រឹម២៥% ។ ចំណែកតំបន់ទំនាបកណ្តាលមាន៣០% និងតំបន់មាត់សមុទ្រមាន៣៥% ។ រលកសមុទ្រក៏ត្រូវបានព្យាករថានឹងមានកម្ពស់ពីកន្លះម៉ែត្រទៅ ១,៧៥ម៉ែត្រប៉ុណ្ណោះ ។
សេចក្តីជូនដំណឹងចុងក្រោយរបស់ក្រសួងធនធានទឹកបានបង្ហាញថា ព្យុះកាលម៉េហ្គីកំពុងវិវត្តន៍ទៅជាព្យុះសង្ឃរា ហើយនឹងជះឥទ្ធិពលលើរបបខ្យល់មូសុងឦសាន ដែលបក់លើសមុទ្រអានដាម៉ាន់ សមុទ្រចិនខាងត្បូង សមុទ្រកម្ពុជា និងអាងទន្លេមេគង្គ រួមទាំងប្រទេសកម្ពុជាផងដែរ ។ ឥទ្ធិពលនេះត្រូវបានរំពឹងថានឹងបន្តរហូតដល់ថ្ងៃទី៨ ខែវិច្ឆិកា ឆ្នាំ២០២៥ ។
