By ខេត្តប៉ៃលិន ៖ នៅថ្ងៃទី០៤ ខែវិច្ឆិកា ឆ្នាំ២០២៥ នេះ គេសង្កេតឃើញភ្ញៀវទេសចរយ៉ាងច្រើនកុះករ បានសម្រុកមកកម្សាន្តនៅតាមរមណីយដ្ឋាននានាក្នុងខេត្តប៉ៃលិន ជាពិសេសភ្ញៀវជាតិ និងអន្តរជាតិដែលបានធ្វើដំណើរមកពីបណ្តាខេត្តនានា។ ទិដ្ឋភាពនេះធ្វើឲ្យប្រជាពលរដ្ឋក៏ដូចជាអាជីវករលក់ដូរនៅតាមកន្លែងកម្សាន្តនីមួយៗមមាញឹកស្ទើរតែមិនទាន់។
ភ្ញៀវទេសចរម្នាក់ ឈ្មោះវាសនា ភេទប្រុស អាយុ៤៥ឆ្នាំ រស់នៅខេត្តបាត់ដំបង បានប្រាប់ភ្នាក់ងារសារព័ត៌មានកោះសន្តិភាពថា ៖ ក្នុងឱកាសបុណ្យអុំទូក អកអំបុក និងសំពះព្រះខែ ឆ្នាំ២០២៥ នេះ លោក និងក្រុមគ្រួសារបានធ្វើដំណើរមកលេងកម្សាន្តនៅខេត្តប៉ៃលិន។ ពួកគាត់បានចេញដំណើរពីផ្ទះនារសៀលថ្ងៃទី០៣ ខែវិច្ឆិកា ហើយបានស្នាក់នៅសណ្ឋាគារប៉ៃលិនមួយយប់ មុននឹងបន្តដំណើទៅលេងរមណីយដ្ឋានធម្មជាតិទឹកធ្លាក់ភ្នំខៀវ (អូរតាវ៉ៅ) រមណីយដ្ឋានចំការខ្នុរ និងរមណីយដ្ឋានម្លប់សាវម៉ាវ។ នៅទីនោះ អ្នកខ្លះបានចុះងូតទឹកលេងក្នុងអូរយ៉ាងត្រជាក់កាយ សប្បាយចិត្ត បំបាត់ភាពតានតឹងបានយ៉ាងល្អ។
លោកវាសនា បានបន្តទៀតថា នៅពេលអាហារថ្ងៃត្រង់ ពួកគាត់បានកុម្ម៉ង់បាយ និងម្ហូបនៅក្នុងរមណីយដ្ឋានតែម្តង។ មុខម្ហូបល្បីប្រចាំខេត្តប៉ៃលិន គឺឆាដើមក្រវ៉ាញជាមួយសាច់ជ្រូក សាច់មាន់ ឬសាច់ទា ដែលជាបន្លែមានឱជារសឈ្ងុយប្រហើរគួរឲ្យចង់ទទួលទានម្តងហើយចង់ញ៉ាំទៀត។ លោកបានបញ្ជាក់ថា ដំណើរកម្សាន្តមកខេត្តប៉ៃលិននេះ លោកនិងគ្រួសារនឹងស្នាក់នៅក្នុងសណ្ឋាគាររយៈពេល២ ទៅ៣យប់។ បន្ទាប់ពីដើរលេងកម្សាន្តគ្រប់កន្លែងហើយ ពួកគាត់នឹងវិលត្រឡប់ទៅផ្ទះវិញដើម្បីបន្តប្រកបមុខរបរ។
ពាក់ព័ន្ធនឹងចំនួនភ្ញៀវ លោក លីម វាសនា ប្រធានមន្ទីរទេសចរណ៍ខេត្តប៉ៃលិន បានឲ្យដឹងថា នាថ្ងៃទី៤ ខែវិច្ឆិកា ឆ្នាំ២០២៥ ដែលជាថ្ងៃទី១ នៃពិធីបុណ្យអុំទូក អកអំបុក និងសំពះព្រះខែ ខេត្តប៉ៃលិនបានទទួលភ្ញៀវទេសចរជាតិចំនួន ៣០,៦៤៣នាក់ និងភ្ញៀវទេសចរអន្តរជាតិចំនួន ១៧៥នាក់ សរុបទាំងអស់ ៣០,៨១៨នាក់។
លោកបានបន្តអំពាវនាវដល់បងប្អូនប្រជាពលរដ្ឋ និងអាជីវករនៅតាមភូមិ និងក្បែរកន្លែងកម្សាន្តទូទាំងខេត្តប៉ៃលិន ត្រូវយកចិត្តទុកដាក់សម្អាតអនាម័យបរិស្ថានឲ្យបានស្អាតជានិច្ច ដើម្បីងាយស្រួលទាក់ទាញភ្ញៀវទេសចរជាតិ និងអន្តរជាតិឲ្យមកកម្សាន្តកាន់តែច្រើនឡើង ដែលអាចបង្កើនចំណូលសម្រាប់ផ្គត់ផ្គង់ជីវភាព។ ជាពិសេស ការរៀបចំភ្លើងអគ្គិសនីបំភ្លឺនៅពេលយប់របស់រដ្ឋបាលខេត្តប៉ៃលិន គឺបញ្ចេញរស្មីយ៉ាងត្រចះត្រចង់គួរឲ្យចង់គយគន់ ធ្វើឲ្យអ្នកធ្វើដំណើរតាមដងផ្លូវនាពេលយប់មានសុវត្ថិភាពនិងមិនភ័យខ្លាចអ្វីឡើយ។
