កម្ពុជា-អាម៉េរិក ពង្រឹងចំណងមិត្តភាព និងពង្រីកកិច្ចសហប្រតិបត្តិការលើគ្រប់វិស័យ

ភ្នំពេញ៖ កាលពីថ្ងៃទី៤ ខែវិច្ឆិកា ឆ្នាំ២០២៥ កន្លងទៅនេះ ឯកឧត្តម ប្រាក់ សុខុន ឧបនាយករដ្ឋមន្ត្រី រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ បានជួបប្រជុំជាមួយលោក Michael George DeSombre ឧបការីរដ្ឋមន្ត្រីការបរទេសសហរដ្ឋអាម៉េរិក ទទួលបន្ទុកកិច្ចការអាស៊ីបូព៌ា និងប៉ាស៊ីហ្វិក ដើម្បីពិភាក្សាលម្អិតអំពីការពង្រឹង និងពង្រីកកិច្ចសហប្រតិបត្តិការទ្វេភាគីរវាងប្រទេសទាំងពីរ។

ក្នុងជំនួបដ៏មានអត្ថន័យនេះ ភាគីទាំងពីរបានឯកភាពគ្នាថា ការប្រារព្ធខួបលើកទី៧៥ នៃទំនាក់ទំនងការទូត កម្ពុជា-សហរដ្ឋអាម៉េរិកនៅឆ្នាំនេះ ព្រមទាំងតួនាទីយ៉ាងសំខាន់របស់កម្ពុជាជាប្រទេសសម្របសម្រួលដៃគូសន្ទនាអាស៊ាន-សហរដ្ឋអាម៉េរិក និងការរួមចំណែករបស់សហរដ្ឋអាម៉េរិកក្នុងការនាំមកនូវសន្តិភាពតាមបណ្ដោយព្រំដែនកម្ពុជា-ថៃ សុទ្ធតែជាកាលានុវត្តភាពដ៏ល្អប្រសើរសម្រាប់ពង្រឹង និងពង្រីកកិច្ចសហប្រតិបត្តិការលើវិស័យស្នូលជាច្រើន រួមមាន៖ ពាណិជ្ជកម្ម វិនិយោគ ការពារជាតិ សន្តិសុខ ការប្រយុទ្ធប្រឆាំងបទឧក្រិដ្ឋបច្ចេកវិទ្យា និងការបោសសម្អាតមីន។

ភាគីទាំងពីរក៏បានស្វាគមន៍យ៉ាងកក់ក្តៅចំពោះការចុះហត្ថលេខាលើកិច្ចព្រមព្រៀងពាណិជ្ជកម្មបដិការ រវាងកម្ពុជា និងសហរដ្ឋអាម៉េរិក (ART) នៅទីក្រុងកូឡាឡាំពួ កាលពីថ្ងៃទី២៦ ខែតុលា ឆ្នាំ២០២៥។ ពួកគេបានចាត់ទុកនេះជាព្រឹត្តិការណ៍ដ៏សំខាន់ ដែលជួយបង្កើនឱកាសសេដ្ឋកិច្ចទៅវិញទៅមក និងបានសង្កត់ធ្ងន់ពីភាពចាំបាច់ក្នុងការកំណត់ជំហានច្បាស់លាស់ ដើម្បីធានាថា កិច្ចព្រមព្រៀងនេះត្រូវបានអនុវត្តប្រកបដោយប្រសិទ្ធភាព និងទាន់ពេលវេលា។

ទាក់ទងនឹងជម្លោះព្រំដែនកម្ពុជា-ថៃ ឯកឧត្តម ប្រាក់ សុខុន បានថ្លែងអំណរគុណជាថ្មីម្តងទៀតយ៉ាងជ្រាលជ្រៅចំពោះតួនាទីដ៏សំខាន់របស់អតីតប្រធានាធិបតី ដូណាល់ ត្រាំ ក្នុងការសម្របសម្រួលឱ្យមានកិច្ចព្រមព្រៀងបទឈប់បាញ់ នៅថ្ងៃទី២៨ ខែកក្កដា ឆ្នាំ២០២៥ និងការចុះហត្ថលេខាលើសេចក្តីថ្លែងការណ៍រួមស្តីពីកិច្ចព្រមព្រៀងសន្តិភាព នៅទីក្រុងគូឡាឡាំពួ នាថ្ងៃទី២៦ ខែតុលា ឆ្នាំ២០២៥។

ភាគីទាំងពីរបានផ្លាស់ប្តូរទស្សនៈគ្នាទៅវិញទៅមកអំពីវិធានការជាបន្តបន្ទាប់ ដែលត្រូវអនុវត្តដើម្បីសម្រេចបាននូវការប្តេជ្ញាចិត្តនានាដែលមានចែងនៅក្នុងសេចក្តីថ្លែងការណ៍រួម។ ពួកគេក៏បានសង្កត់ធ្ងន់ផងដែរអំពីភាពចាំបាច់ក្នុងការបង្កើនកិច្ចខិតខំប្រឹងប្រែងដើម្បីស្តារជំនឿ និងទំនុកចិត្តឡើងវិញ សំដៅឈានទៅរកសន្តិភាពប្រកបដោយចីរភាព។

ដោយ៖តារា