By ប្រធានាធិបតីសហរដ្ឋអាមេរិក លោក ដូណាល់ ត្រាំ បានប្រកាសកាលពីថ្ងៃទី៥ ខែវិច្ឆិកាថា លោកនឹងមិនចូលរួមកិច្ចប្រជុំកំពូល G20 ដែលនឹងប្រព្រឹត្តទៅនៅទីក្រុង Johannesburg ប្រទេសអាហ្វ្រិកខាងត្បូងនោះទេ។ ការសម្រេចចិត្តនេះ ធ្វើឡើងដោយលើកឡើងពីការជំទាស់ទៅនឹងកំណត់ត្រាសិទ្ធិមនុស្សរបស់អាហ្វ្រិកខាងត្បូង ស្របពេលដែលភាពតានតឹងបានកើនឡើងជុំវិញវិធីសាស្ត្ររបស់លោកចំពោះកិច្ចខិតខំប្រឹងប្រែងសន្តិភាពនៅអ៊ុយក្រែន និងទំនាក់ទំនងអាមេរិក-អាហ្វ្រិកផងដែរ។
លោក ត្រាំ បានថ្លែងប្រាប់អ្នកកាសែតនៅឯសេតវិមាន ដោយសំដៅទៅលើកិច្ចប្រជុំកំពូលដែលនឹងធ្វើឡើងនៅថ្ងៃទី២២-២៣ ខែវិច្ឆិកាថា៖ «ខ្ញុំនឹងមិនតំណាងឱ្យប្រទេសយើងនៅទីនោះទេ។ វាមិនគួរនៅទីនោះទេ។ តើយើងអាចត្រូវបានគេរំពឹងថានឹងទៅអាហ្វ្រិកខាងត្បូងសម្រាប់កិច្ចប្រជុំ G20 ដ៏សំខាន់ដោយរបៀបណា នៅពេលដែលការរឹបអូសដីធ្លី និងការប្រល័យពូជសាសន៍គឺជាប្រធានបទសំខាន់នៃការសន្ទនា?»។
អតីតប្រធានាធិបតីរូបនេះ បានចោទប្រកាន់រដ្ឋាភិបាលអាហ្វ្រិកខាងត្បូងម្តងហើយម្តងទៀតថា បានរំលោភលើសិទ្ធិរបស់កសិករជនជាតិស្បែកស «Afrikaner» ដោយបានចេញដីកាប្រតិបត្តិមួយកាលពីខែកុម្ភៈ ដោយថ្កោលទោសអ្វីដែលលោកហៅថា ការរឹបអូសទ្រព្យសម្បត្តិកសិកម្មរបស់ជនជាតិភាគតិច Afrikaner ដោយគ្មានសំណង។
យ៉ាងណាមិញ អាហ្វ្រិកខាងត្បូងបានច្រានចោលការចោទប្រកាន់នេះ ដោយហៅការអះអាងរបស់លោក ត្រាំ ថា «មិនត្រឹមត្រូវ» ហើយបានបញ្ជាក់ថា ប្រទេសខ្លួននៅតែប្តេជ្ញាចិត្តចំពោះកំណែទម្រង់ដីធ្លីតាមរដ្ឋធម្មនុញ្ញ និងសិទ្ធិស្មើគ្នា។
សេចក្តីប្រកាសនេះ ធ្វើឡើងត្រឹមតែប៉ុន្មានថ្ងៃប៉ុណ្ណោះ បន្ទាប់ពីប្រធានាធិបតីហ្វាំងឡង់ លោក Alexander Stubb បានលើកឡើងពីគំនិតនៃកិច្ចប្រជុំអ៊ុយក្រែន-រុស្ស៊ី-អាមេរិក នៅក្រៅកិច្ចប្រជុំ G20។ ដូច្នេះ ការសម្រេចចិត្តរបស់លោក ត្រាំ ក្នុងការរំលងកិច្ចប្រជុំកំពូលនេះ ហាក់ដូចជាបានច្រានចោលទាំងស្រុងនូវការរំពឹងទុកនោះ។
លោក ត្រាំ បានបញ្ជាក់ថា អនុប្រធានាធិបតី លោក JD Vance នឹងចូលរួមជំនួសលោកវិញ។ ជាមួយគ្នានេះដែរ វិមានក្រឹមឡាំងក៏បានបញ្ជាក់ផងដែរថា ប្រធានាធិបតី វ្ល៉ាឌីមៀរ ពូទីន ក៏នឹងមិនចូលរួមដែរ ដោយបញ្ជូនអគ្គសេនាធិការរង លោក Maksim Oreshkin ឱ្យទៅជំនួសវិញ។
គួររំលឹកផងដែរថា លោក ត្រាំ បានស្វែងរកការសម្រុះសម្រួលបទឈប់បាញ់នៅអ៊ុយក្រែន ប៉ុន្តែកិច្ចខិតខំប្រឹងប្រែងរបស់លោកបានជាប់គាំងចំពេលមានការទាមទារទឹកដីជាបន្តបន្ទាប់ពីទីក្រុងម៉ូស្គូ។ កិច្ចប្រជុំកំពូលត្រាំ-ពូទីន ដែលបានគ្រោងទុកនៅទីក្រុងប៊ុយដាប៉ែស ត្រូវបានលុបចោល បន្ទាប់ពីទីក្រុងវ៉ាស៊ីនតោនបានសន្និដ្ឋានថា វិមានក្រឹមឡាំងមិនមានឆន្ទៈក្នុងការសម្របសម្រួលនោះទេ។
ជាងនេះទៅទៀត លោក ត្រាំ ក៏បានជៀសវាងការជួបជាមួយប្រធានាធិបតីអ៊ុយក្រែន លោក វ៉ូឡូឌីមៀរ ហ្សេលេនស្គី នៅឯការជួបជុំអន្តរជាតិកន្លងមក រួមទាំងកិច្ចប្រជុំកំពូល G7 កាលពីខែមិថុនា នៅប្រទេសកាណាដា ដែលលោកបានចាកចេញមុនពេលការមកដល់របស់លោក ហ្សេលេនស្គីទៅទៀត។
