By សហរដ្ឋអាមេរិកបានស្នើជាផ្លូវការទៅក្រុមប្រឹក្សាសន្តិសុខអង្គការសហប្រជាជាតិ (UN) ដើម្បីដកទណ្ឌកម្មដែលដាក់លើប្រធានាធិបតីស៊ីរី លោក Ahmad al-Sharaa និងមន្ត្រីជាន់ខ្ពស់រដ្ឋាភិបាលរបស់លោក។ ការស្នើនេះកើតឡើងមុនដំណើរទស្សនកិច្ចជាប្រវត្តិសាស្ត្ររបស់លោកទៅកាន់សេតវិមាននៅសប្តាហ៍ក្រោយ។ នេះបើតាមសេចក្តីព្រាងដែលសារព័ត៌មាន Associated Press ទទួលបានកាលពីថ្ងៃពុធ ទី៥ ខែវិច្ឆិកា។
សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត
សេចក្តីព្រាងដែលបានចែកចាយក្នុងចំណោមសមាជិកក្រុមប្រឹក្សាសន្តិសុខ បានអំពាវនាវឲ្យលុបចោលទណ្ឌកម្មជាច្រើនដែល UN បានដាក់លើលោក al-Sharaa និងរដ្ឋមន្ត្រីក្រសួងមហាផ្ទៃ លោក Anas Hasan Khattab។ មន្ត្រីអាមេរិកបានបញ្ជាក់ថា គោលបំណងនៃសកម្មភាពនេះគឺដើម្បីជួយសម្រួលដល់ការធ្វើសមាហរណកម្មផ្នែកការទូតអន្តរជាតិរបស់ស៊ីរី។
ក្រុមអ្នកការទូតបានឲ្យដឹងថា ក្រុមប្រឹក្សាសន្តិសុខដែលមានសមាជិកទាំង១៥ អាចនឹងបោះឆ្នោតនៅថ្ងៃព្រហស្បតិ៍នេះ។ ទោះបីជាយ៉ាងណា វិធានការនេះត្រូវការសំឡេងយ៉ាងតិច៩ និងគ្មានការវេតូពីសមាជិកអចិន្ត្រៃយ៍ទាំង៥ រួមមាន ចិន រុស្ស៊ី អង់គ្លេស បារាំង និងសហរដ្ឋអាមេរិក ទើបអាចអនុម័តបាន។
សំណើនេះកើតឡើងនៅពេលដែលប្រធានាធិបតីអាមេរិក លោក ដូណាល់ ត្រាំ កំពុងត្រៀមទទួលលោក al-Sharaa នៅទីក្រុងវ៉ាស៊ីនតោន នៅថ្ងៃចន្ទសប្ដាហ៍ក្រោយ។ នេះជាដំណើរទស្សនកិច្ចលើកដំបូងរបស់មេដឹកនាំស៊ីរីមកកាន់សហរដ្ឋអាមេរិក ចាប់តាំងពីប្រទេសស៊ីរីទទួលបានឯករាជ្យនៅឆ្នាំ១៩៤៦។
ក្នុងអំឡុងពេលនៅទីក្រុងវ៉ាស៊ីនតោន ស៊ីរីត្រូវបានគេរំពឹងថានឹងចូលរួមជាផ្លូវការជាមួយក្រុមចម្រុះដែលដឹកនាំដោយសហរដ្ឋអាមេរិកប្រឆាំងនឹងក្រុមរដ្ឋអ៊ីស្លាម។ សម្ព័ន្ធមិត្តដែលមានសមាជិក៨០នេះមានគោលបំណងទប់ស្កាត់ការងើបឡើងវិញនៃក្រុមជ្រុលនិយម។
ការផ្លាស់ប្តូរនេះគឺជាផ្នែកមួយនៃយុទ្ធសាស្ត្រទូលំទូលាយរបស់លោកត្រាំ ក្នុងការកសាងទំនាក់ទំនងឡើងវិញជាមួយទីក្រុងដាម៉ាស បន្ទាប់ពីការដួលរលំរបស់អតីតប្រធានាធិបតី Bashar Assad ដែលត្រូវបានបណ្តេញចេញពីតំណែងកាលពីខែធ្នូ ក្រោយការគ្រប់គ្រងរបស់គ្រួសារលោកអស់រយៈពេល៥ទសវត្សរ៍។ លោក Al-Sharaa ដែលធ្លាប់ដឹកនាំសម្ព័ន្ធឧទ្ទាមក្នុងដំណាក់កាលចុងក្រោយនៃសង្គ្រាម បានឡើងកាន់អំណាចបន្ទាប់ពីលោក Assad ត្រូវបានទម្លាក់។
ចាប់តាំងពីឡើងកាន់តំណែងមក លោក al-Sharaa បានព្យាយាមស្តារទំនាក់ទំនងជាមួយប្រទេសជិតខាងអារ៉ាប់ និងមហាអំណាចលោកខាងលិច។ ទោះជាយ៉ាងណា ក្តីបារម្ភនៅតែមានចំពោះតួនាទីអតីតរបស់លោកក្នុងការដឹកនាំក្រុម Hayat Tahrir al-Sham ដែលជាក្រុមសកម្មប្រយុទ្ធដែលធ្លាប់ត្រូវបានទីក្រុងវ៉ាស៊ីនតោនចាត់ទុកជាអង្គការភេរវកម្ម។
លោកត្រាំបានជួបលោក al-Sharaa នៅប្រទេសអារ៉ាប៊ីសាអូឌីតក្នុងខែឧសភា ហើយក្រោយមកបានប្រកាសពីផែនការដកទណ្ឌកម្មរបស់សហរដ្ឋអាមេរិកដែលមានជាយូរមកលើប្រទេសស៊ីរី។ ខណៈរដ្ឋបាលបានបន្ធូរបន្ថយការរឹតបន្តឹងមួយចំនួនរួចហើយ វិធានការតឹងរ៉ឹងបំផុតដែលអនុម័តដោយសភាក្នុងឆ្នាំ២០១៩ នៅតែមាន ហើយនឹងត្រូវការការអនុម័តពីនីតិប្បញ្ញត្តិដើម្បីលុបចោល។
សង្គ្រាមស៊ីវិលនៅស៊ីរីដែលបានផ្ទុះឡើងក្នុងឆ្នាំ២០១១ បានបណ្តាលឲ្យមនុស្សជិត៥០ម៉ឺននាក់ស្លាប់ និងរាប់លាននាក់ទៀតត្រូវផ្លាស់ប្តូរទីលំនៅ។ មន្ត្រីមនុស្សធម៌ UN ប៉ាន់ប្រមាណថា ៩០% នៃប្រជាជនស៊ីរីរស់នៅក្នុងភាពក្រីក្រ ដោយមានមនុស្ស១៦,៥លាននាក់ត្រូវការជំនួយមនុស្សធម៌ និងជិត៣លាននាក់ប្រឈមនឹងអសន្តិសុខស្បៀងធ្ងន់ធ្ងរ។ នេះបើតាមតួលេខដែលបានបង្ហាញទៅកាន់ក្រុមប្រឹក្សាសន្តិសុខកាលពីខែឧសភា។
ប្រសិនបើត្រូវបានអនុម័ត ការបន្ធូរបន្ថយទណ្ឌកម្មរបស់ UN នឹងបង្ហាញពីរបកគំហើញការទូតដ៏សំខាន់មួយសម្រាប់រដ្ឋាភិបាលលោក al-Sharaa និងជាសញ្ញានៃការផ្លាស់ប្តូរគោលនយោបាយរបស់ទីក្រុងវ៉ាស៊ីនតោនចំពោះប្រទេសស៊ីរីក្រោយសង្គ្រាម។
ដោយ៖ ឈាង
