By រដ្ឋមន្ត្រីការបរទេសថៃ លោក Sihasak Puangketkeow បានចេញមុខបញ្ជាក់យ៉ាងច្បាស់ថា គម្រោងដោះលែងទាហានកម្ពុជាចំនួន ១៨នាក់ ដែលកំពុងឃុំខ្លួននៅក្នុងប្រទេសថៃ នឹងប្រព្រឹត្តទៅនៅថ្ងៃទី១២ ខែវិច្ឆិកាខាងមុខនេះ ដោយពុំមានការស្ថិតនៅក្រោមសម្ពាធពីបរទេសណាមួយឡើយ។ នេះបើយោងតាមការចុះផ្សាយរបស់សារព័ត៌មាន Khaosod។
ថ្លែងប្រាប់អ្នកសារព័ត៌មាននៅអាកាសយានដ្ឋានដនមឿង ក្នុងទីក្រុងបាងកក កាលពីព្រឹកថ្ងៃសុក្រ ទី៧ ខែវិច្ឆកា លោក Sihasak បានលើកឡើងថា ការដោះលែងនេះនឹងបន្តទៅតាមលក្ខខណ្ឌដែលបានកំណត់ដោយអាជ្ញាធរថៃ។ លក្ខខណ្ឌទាំងនោះរួមមាន ការដកអាវុធធុនធ្ងន់ និងការអនុញ្ញាតឲ្យភាគីថៃចូលទៅកាន់តំបន់បោសសម្អាតមីននៅតាមព្រំដែន។
លោករដ្ឋមន្ត្រីថៃរូបនេះ បានសង្កត់ធ្ងន់ថា ការសម្រេចចិត្តនេះធ្វើឡើងយ៉ាងតឹងរ៉ឹងក្នុងក្របខណ្ឌនៃកិច្ចព្រមព្រៀងទ្វេភាគី ហើយពុំមានសម្ពាធពីនរណាម្នាក់ឡើយ។ លោក Sihasak បានបញ្ជាក់ថា «ពុំមានការផ្លាស់ប្តូរ ឬឥទ្ធិពលខាងក្រៅពាក់ព័ន្ធឡើយ» ដោយច្រានចោលរបាយការណ៍ដែលថា ការដោះលែងនេះអាចជាប់ទាក់ទងនឹងបញ្ហាពាណិជ្ជកម្ម ឬសម្ពាធពន្ធរបស់សហរដ្ឋអាមេរិក។
ជម្លោះកម្ពុជា-ថៃ បានផ្ទុះឡើងទៅជាជម្លោះប្រដាប់អាវុធបើកចំហកាលពីខែកក្កដា ឆ្នាំ២០២៥ (តាមព័ត៌មានដើម) ដែលជាការប្រយុទ្ធគ្នាដ៏ខ្លាំងក្លាបំផុតក្នុងរយៈពេលជាងមួយទសវត្សរ៍កន្លងមក។ បទឈប់បាញ់មួយត្រូវបានឯកភាពគ្នានៅថ្ងៃទី២៨ ខែកក្កដា ដែលរួមបញ្ចូលទាំងផែនការសម្រាប់ការបន្ធូរបន្ថយយោធាក្រោមការត្រួតពិនិត្យរបស់ក្រុមសង្កេតការណ៍អាស៊ាន (AOT)។
ទោះជាយ៉ាងណាក៏ដោយ បទឈប់បាញ់នៅតែមានភាពផុយស្រួយ ដោយភាគីថៃនៅតែបន្តរំលោភបំពាន និងបានចាប់ខ្លួនទាហានខ្មែរដោយខុសច្បាប់។
កន្លងមក ប្រទេសថៃបានអះអាងថា ការឃុំខ្លួនទាហានកម្ពុជា ដែលខ្លួនហៅថាជាអ្នកទោសសង្គ្រាម គឺអនុវត្តតាមអនុសញ្ញាទីក្រុងហ្សឺណែវទីបី ដែលចែងថា អ្នកទោសសង្គ្រាមត្រូវតែដោះលែង និងធ្វើមាតុភូមិនិវត្តន៍ «ដោយគ្មានការពន្យារពេលបន្ទាប់ពីការបញ្ចប់នៃអរិភាពសកម្ម»។ យ៉ាងណា យោធាថៃបានអះអាងថា ជម្លោះពុំទាន់បញ្ចប់ទេ បើទោះបីជាមានការព្រមព្រៀងបទឈប់បាញ់ និងការប្រកាសរួមកាលពីពេលថ្មីៗនេះនៅប្រទេសម៉ាឡេស៊ីក្រោមវត្តមានប្រធានាធិបតីអាមេរិកលោក ដូណាល់ ត្រាំ ក៏ដោយ។
ភាគីកម្ពុជាបានជំរុញឲ្យមានការដោះលែងទាហានរបស់ខ្លួនជាបន្ទាន់ ដោយលើកហេតុផលថា ការបន្តឃុំខ្លួននេះគឺជាការរំលោភលើច្បាប់មនុស្សធម៌អន្តរជាតិ ជាពិសេសចាប់តាំងពីបទឈប់បាញ់ត្រូវបានបង្កើតឡើង។ បើតាមរបាយការណ៍ មានតែទាហានកម្ពុជា ២រូបប៉ុណ្ណោះ ដែលត្រូវភាគីថៃដោះលែងកាលពីថ្ងៃទី១ ខែសីហា ក្នុងចំណោមទាហាន ២០រូបដែលត្រូវបានចាប់ខ្លួនកាលពីថ្ងៃទី២៩ ខែកក្កដា ក្រោយបទឈប់បាញ់ចូលជាធរមាន។
