By លោក Elon Musk នាយកប្រតិបត្តិក្រុមហ៊ុន Tesla បានទទួលដំណឹងដ៏រីករាយកាលពីថ្ងៃព្រហស្បតិ៍ បន្ទាប់ពីម្ចាស់ភាគហ៊ុនបានបោះឆ្នោតអនុម័តកញ្ចប់ប្រាក់បៀវត្សរ៍ដ៏ធំសម្បើមបំផុតក្នុងប្រវត្តិសាស្ត្រសាជីវកម្ម ដែលមានតម្លៃដល់ទៅ ១ទ្រីលានដុល្លារអាមេរិក។ ការសម្រេចចិត្តនេះបានធ្វើឡើង ខណៈដែលវិនិយោគិនជាច្រើនបានសម្តែងការគាំទ្រពេញទំហឹងចំពោះចក្ខុវិស័យដ៏អស្ចារ្យរបស់លោកក្នុងការជំរុញក្រុមហ៊ុនផលិតរថយន្តអគ្គិសនីមួយនេះ ឆ្ពោះទៅរកយុគសម័យបញ្ញាសិប្បនិម្មិត (AI) និងមនុស្សយន្ត។
សំណើដ៏សំខាន់នេះត្រូវបានអនុម័តដោយសំឡេងគាំទ្រលើសពី ៧៥%។ នៅក្នុងកិច្ចប្រជុំប្រចាំឆ្នាំរបស់ក្រុមហ៊ុនដែលធ្វើឡើងនៅរោងចក្រក្នុងទីក្រុង Austin រដ្ឋ Texas លោក Musk បានបង្ហាញខ្លួនយ៉ាងអធិកអធម អមដោយក្បួនដង្ហើមមនុស្សយន្តរាំរែកយ៉ាងសប្បាយរីករាយ។
ក្រោយការប្រកាសដំណឹងដ៏លេចធ្លោនេះ លោក Musk បានឡើងឆាករាំយ៉ាងសប្បាយរីករាយ។ លោកបានថ្លែងទាំងក្តីរំភើបថា៖ «នេះមិនមែនត្រឹមតែជាជំពូកថ្មីសម្រាប់ Tesla នោះទេ។ វាគឺជាសៀវភៅថ្មីមួយទាំងមូល»។
ប្រសិនបើលោក Musk អាចបង្កើនតម្លៃទីផ្សាររបស់ក្រុមហ៊ុន Tesla ឱ្យលើសពី ៨ទ្រីលានដុល្លារសម្រាប់ម្ចាស់ភាគហ៊ុនក្នុងរយៈពេលមួយទសវត្សរ៍ខាងមុខ លោកអាចនឹងក្លាយជាមហាសេដ្ឋីប្រាក់ទ្រីលានដុល្លារដំបូងគេបង្អស់នៅលើពិភពលោក។
ការអនុម័តកញ្ចប់ប្រាក់ឈ្នួលនេះបានឆ្លុះបញ្ចាំងពីជំនឿទុកចិត្តយ៉ាងមុតមាំរបស់ម្ចាស់ភាគហ៊ុនថា លោក Musk ពិតជាមានសមត្ថភាពអាចដឹកនាំក្រុមហ៊ុនរថយន្តនេះ ចូលទៅក្នុងយុគសម័យថ្មីដែលគ្រប់គ្រងដោយ AI និងមនុស្សយន្តបានយ៉ាងជោគជ័យ។ កន្លងមក ក្រុមហ៊ុន Tesla ធ្លាប់បានប្រឈមនឹងហានិភ័យនៃការបាត់បង់មេដឹកនាំដ៏ឆ្នើមរូបនេះ ប្រសិនបើសំណើនេះត្រូវបានច្រានចោល ដែលអាចប៉ះពាល់ដល់កេរ្តិ៍ឈ្មោះដ៏ល្បីល្បាញរបស់ក្រុមហ៊ុនរថយន្តអគ្គិសនីមួយនេះ។
ដើម្បីសម្រេចបានចក្ខុវិស័យនេះ លោក Musk នឹងត្រូវដាក់ពង្រាយយានជំនិះស្វ័យប្រវត្តិរាប់លានគ្រឿង និងមនុស្សយន្តនានា ដែលជាគម្រោងដ៏មហិមាមានតម្លៃរាប់រយពាន់លានដុល្លារ ក្នុងរយៈពេលមួយទសវត្សរ៍ខាងមុខនេះ។
