By ខេត្តមណ្ឌលគិរី ៖ ព្រះរាជពិធីបុណ្យអុំទូក បណ្ដែតប្រទីប និងសំពះព្រះខែ អកអំបុក ខេត្តមណ្ឌលគិរី សម្រាប់ឆ្នាំ២០២៥ ដែលបានប្រព្រឹត្តទៅរយៈពេល៣ថ្ងៃ ចាប់ពីថ្ងៃទី៤ ដល់ថ្ងៃទី៦ ខែវិច្ឆិកា នៅបរិវេណសួនដំរីដែក ក្នុងក្រុងសែនមនោរម្យ បានបិទបញ្ចប់យ៉ាងជោគជ័យក្រោមបរិយាកាសអ៊ូអរ និងសប្បាយរីករាយក្រៃលែង។
ពិធីបិទដ៏អធិកអធមនេះ ត្រូវបានប្រារព្ធឡើងក្រោមអធិបតីភាពដ៏ខ្ពង់ខ្ពស់របស់ឯកឧត្តម ម៉ែន ង៉ុយ ប្រធានក្រុមប្រឹក្សាខេត្ត និងឯកឧត្តម ថង សាវុន អភិបាលខេត្តមណ្ឌលគិរី ព្រមទាំងលោកជំទាវ ដោយមានការអញ្ជើញចូលរួមពីសំណាក់ថ្នាក់ដឹកនាំ មន្ត្រីរាជការ និងភ្ញៀវទេសចរជាតិ-អន្តរជាតិយ៉ាងច្រើនកុះករ។
ក្នុងឱកាសបិទនេះ គណៈកម្មការរៀបចំព្រឹត្តិការណ៍ក៏បានប្រកាសលទ្ធផលនៃព្រឹត្តិការណ៍ «សម្លព្រូងបំពង់ឫស្សី» លើកទី១ ដែលជាការតាំងបង្ហាញ និងប្រកួតប្រជែងម្ហូបអាហារជនជាតិដើមភាគតិចផងដែរ។ ជាលទ្ធផល រដ្ឋបាលស្រុកកោះញែកបានគ្រងតំណែងជ័យលាភីលេខ១ ចំណែកជ័យលាភីលេខ២ស្ទួនបានទៅលើរដ្ឋបាលស្រុកកែវសីមា និងស្រុកពេជ្រាដា។
ថ្លែងសុន្ទរកថាបិទកម្មវិធី ឯកឧត្តម ថង សាវុន អភិបាលខេត្តបានគូសបញ្ជាក់ពីទិសដៅសំខាន់ៗ ដើម្បីជំរុញវិស័យទេសចរណ៍ខេត្តឆ្ពោះទៅរកគោលដៅ «ទេសចរណ៍ម្ហូបអាហារ» តាមរយៈការបង្កើនគុណភាព និងអត្តសញ្ញាណអាហារប្រចាំតំបន់។
ឯកឧត្តមបានជំរុញដល់អាជីវករ និងអ្នករកស៊ីក្នុងវិស័យបដិសណ្ឋារកិច្ចទាំងអស់ ឲ្យយកចិត្តទុកដាក់បង្កើនគុណភាពផលិតផល និងរសជាតិអាហារ ជាពិសេសការបង្កើតឲ្យមានភោជនីយដ្ឋានអាហារជនជាតិដើមភាគតិច ដែលផ្តោតលើម្ហូបប្រពៃណីក្នុងខេត្ត។
ជាមួយគ្នានេះ ឯកឧត្តមក៏បានណែនាំដល់អាជ្ញាធរមូលដ្ឋាន និងមន្ទីរអង្គភាពពាក់ព័ន្ធ ឲ្យសហការគ្នាយ៉ាងសកម្មក្នុងការផ្សព្វផ្សាយពីម្ហូបប្រចាំតំបន់ និងបង្កើតឲ្យមានព្រឹត្តិការណ៍កម្សាន្តសប្បាយៗ (រួមទាំងពិធីបណ្ដែតប្រទីប និងបាញ់កាំជ្រួច) បន្ថែមទៀតជាប្រចាំ ដើម្បីទាក់ទាញភ្ញៀវទេសចរកាន់តែច្រើន។ ការសាមគ្គីភាព និងកិច្ចសហការរវាងគ្រប់ភាគីគឺជាគន្លឹះសំខាន់ ដើម្បីរួមគ្នាធ្វើឲ្យខេត្តមណ្ឌលគិរីក្លាយជាគោលដៅទេសចរណ៍ប្រកបដោយនិរន្តរភាព និងភាពល្បីល្បាញ។
លោក ស៊ាង សឿន ប្រធានមន្ទីរទេសចរណ៍ខេត្តមណ្ឌលគិរីបានឲ្យដឹងថា ភ្ញៀវទេសចរដែលបានចូលរួមដើរលេងកម្សាន្តក្នុងពិធីបុណ្យអុំទូកទាំងបីថ្ងៃ មានចំនួនសរុប៧៣,៦៨៩នាក់ ក្នុងនោះភ្ញៀវអន្តរជាតិមានចំនួន៤៤៦នាក់។
តួលេខនេះគឺមានការកើនឡើងជាង ២០,០០០នាក់ បើធៀបទៅនឹងចំនួនភ្ញៀវទេសចរសរុប ៥២,៧៩៣នាក់ ដែលបានចូលរួមកាលពីឆ្នាំ២០២៤។ កំណើនភ្ញៀវក្នុងឆ្នាំ២០២៥ នេះគឺជាតួលេខដ៏ច្រើនបំផុតមិនធ្លាប់មាននាពេលកន្លងមកសម្រាប់ពិធីបុណ្យអុំទូកនៅខេត្តមណ្ឌលគិរី។
ជោគជ័យដ៏ត្រចះត្រចង់នេះបានឆ្លុះបញ្ចាំងពីលទ្ធផលនៃការខិតខំប្រឹងប្រែងរបស់រដ្ឋបាលខេត្ត និងកិច្ចសហប្រតិបត្តិការរវាងអាជ្ញាធរ និងប្រជាពលរដ្ឋក្នុងការប្រែក្លាយខេត្ត «ឋានសួគ៌បៃតង» នេះឲ្យក្លាយជាទិសដៅទេសចរណ៍វប្បធម៌ និងធម្មជាតិដ៏សំខាន់មួយរបស់កម្ពុជា៕
មណ្ឌលគិរី បិទបញ្ចប់បុណ្យអុំទូកដ៏អធិកអធមឆ្នាំ២០២៥ ស្រុកកោះញែកឈ្នះលេខ១ព្រឹត្តិការណ៍ «សម្លព្រូងបំពង់ឫស្សី»
