By រាជធានីភ្នំពេញ៖ រាជរដ្ឋាភិបាលកម្ពុជាបានប្តេជ្ញាផ្តល់សេវាផ្គត់ផ្គង់ទឹកស្អាត និងអនាម័យជនបទឱ្យបាន ១០០% នៅត្រឹមឆ្នាំ២០៣០។ ការប្តេជ្ញាចិត្តនេះត្រូវបានលើកឡើងជាថ្មីម្តងទៀតក្នុងឱកាសអបអរសាទរទិវាជាតិលើកកម្ពស់អនាម័យជនបទលើកទី១៦ កាលពីថ្ងៃទី១៣ ខែវិច្ឆិកា ឆ្នាំ២០២៥។ ក្នុងសារលិខិតរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានគូសបញ្ជាក់ថា រាជរដ្ឋាភិបាលបានកំណត់យកថ្ងៃទី១៣ ខែវិច្ឆិកា ជាទិវាជាតិដើម្បីផ្សព្វផ្សាយ និងបង្កើនការយល់ដឹងអំពីសារៈសំខាន់នៃអនាម័យជនបទ ក្នុងគោលបំណងធ្វើឱ្យស្ថានភាពអនាម័យនៅកម្ពុជាកាន់តែប្រសើរឡើង ស្របតាមគោលនយោបាយជាតិស្តីពីការផ្គត់ផ្គង់ទឹកស្អាត និងអនាម័យ។
ការលើកកម្ពស់អនាម័យជនបទនៅតែជាអាទិភាពចម្បងរបស់រាជរដ្ឋាភិបាល។ ជាក់ស្តែង យុទ្ធសាស្ត្របញ្ចកោណដំណាក់កាលទី ១ និងកម្មវិធីនយោបាយរបស់រាជរដ្ឋាភិបាលនីតិកាលទី ៧ នៃរដ្ឋសភា សម្រាប់ឆ្នាំ២០២៣-២០២៨ បានបញ្ជាក់យ៉ាងច្បាស់អំពីការបន្តជំរុញការអភិវឌ្ឍជនបទ តាមរយៈការកែលម្អលក្ខខណ្ឌរស់នៅរបស់សហគមន៍ ដោយផ្តោតសំខាន់លើការពង្រីកវិសាលភាពនៃការផ្តល់សេវាផ្គត់ផ្គង់ទឹកស្អាត និងអនាម័យជនបទឱ្យបាន ១០០% នៅត្រឹមឆ្នាំ២០៣០។
គួរជាទីមោទនៈ អត្រានៃការទទួលបានសេវាអនាម័យជនបទមានការកើនឡើងជាលំដាប់។ គិតមកទល់ពេលបច្ចុប្បន្ន រាជធានី-ខេត្តទាំង ២៥ សម្រេចបានការបញ្ចប់ការបន្ទោបង់ពាសវាលពាសកាល (ODF) ដែលជាសមិទ្ធផលប្រវត្តិសាស្ត្រថ្មីមួយទៀតរបស់កម្ពុជា ដោយមានភូមិ ១៤ ៥៧៦ ឃុំ ១ ៦៥២ ស្រុក ១៦៣ ក្រុង ៣៣ និងខណ្ឌ ១៤ បានទទួលសមិទ្ធផលនេះ។ អត្រាគ្របដណ្ដប់អនាម័យជនបទបានកើនឡើងពី ៩០% នៅឆ្នាំ២០២៤ ដល់ ៩៥% ក្នុងឆ្នាំ២០២៥ នេះ ហើយនឹងត្រូវសម្រេចបាន ១០០% នៅឆ្នាំ២០៣០។ សមិទ្ធផលទាំងនេះបញ្ជាក់យ៉ាងច្បាស់ថា រាជរដ្ឋាភិបាល ភាគីពាក់ព័ន្ធទាំងអស់ ព្រមទាំងប្រជាពលរដ្ឋទូទាំងប្រទេស បានរួមគ្នាខិតខំប្រឹងប្រែងអនុវត្តការងារលើកកម្ពស់អនាម័យជនបទ ប្រកបដោយការយកចិត្តទុកដាក់ខ្ពស់ ស្របតាមគោលនយោបាយ យុទ្ធសាស្ត្រ និងផែនការសកម្មភាពដែលបានដាក់ចេញ។ លទ្ធផលនេះក៏បានបង្ហាញពីការប្រែប្រួលជាវិជ្ជមាននៃកម្រិតយល់ដឹងអំពីការប្រតិបត្តិអនាម័យល្អរបស់ប្រជាពលរដ្ឋផងដែរ។
