By តម្លៃដូងនាំចេញពីប្រទេសវៀតណាមបានធ្លាក់ចុះរហូតដល់ទៅ ២ ភាគ ៣ ក្នុងរយៈពេល ៣ ខែចុងក្រោយនេះ។ មូលហេតុចម្បងគឺដោយសារបញ្ហាគុណភាពមិនស៊ីសង្វាក់គ្នា ដែលធ្វើឱ្យតម្រូវការពីទីផ្សារចិនធ្លាក់ចុះយ៉ាងគំហុក ហើយការដឹកជញ្ជូនមួយចំនួនថែមទាំងត្រូវបានបដិសេធបញ្ជូនត្រឡប់មកវិញទៀតផង។
លោក ហ័ង (Hoang) ជាកសិករដាំដូងម្នាក់ បានលើកឡើងទាំងក្តីបារម្ភថា៖ «ឆ្នាំនេះ ពួកយើងដែលជាកសិករដាំដូងភាគច្រើនពិតជារកប្រាក់ចំណេញបានច្រើនណាស់ ប៉ុន្តែប៉ុន្មានខែចុងក្រោយនេះ តម្រូវការបានធ្លាក់ចុះយ៉ាងគំហុក ដែលបណ្តាលឲ្យតម្លៃដូងធ្លាក់ចុះតាមនោះដែរ»។
លោក កៅ បា ដាំង ខ្វា (Cao Ba Dang Khoa) អនុប្រធាន និងជាអគ្គលេខាធិការនៃសមាគមដូងវៀតណាម បានពន្យល់ថា ក្នុងឆ្នាំនេះ អ្នកនាំចេញជាច្រើនបានប្រញាប់ប្រញាល់ដឹកជញ្ជូនដូងក្នុងបរិមាណដ៏ច្រើនទៅកាន់ប្រទេសចិន ដោយពុំមានការត្រួតពិនិត្យគុណភាពឲ្យបានត្រឹមត្រូវនោះទេ ដែលជាហេតុធ្វើឲ្យដូងក្នុងកុងតឺន័រនីមួយៗមានទំហំ និងរសជាតិខុសប្លែកគ្នា។ លោកបានបន្តទៀតថា៖ «ដូងខ្លះត្រូវបានខាងចិនបដិសេធមិនទទួលទិញ ដែលបង្ខំឲ្យអាជីវកម្មទាំងនោះត្រូវលក់ដូងក្នុងតម្លៃថោកបំផុតនៅក្នុងស្រុកវិញ»។
លោកក៏បានបង្ហើបឲ្យដឹងដែរថា កំឡុងពេលលោកធ្វើដំណើរទៅកាន់ប្រទេសចិននាពេលថ្មីៗនេះ តំណាងសមាគមផ្លែឈើទីក្រុងពីងសៀង (Pingxiang) បានប្រាប់លោកថា ការនាំចេញដូងពីវៀតណាមជាច្រើនត្រូវបានបញ្ជូនត្រឡប់មកវិញ ដោយសារតែភាពផ្អែមមិនស្មើគ្នា និងកង្វះព័ត៌មានតាមដានច្បាស់លាស់។ ទោះបីជាអតិថិជននៅទីក្រុងសៀងហៃ ឬប៉េកាំង សុខចិត្តចំណាយថ្លៃដូងខ្ពស់ក៏ដោយ ប៉ុន្តែប្រសិនបើគុណភាពមិនស្ថិតស្ថេរ ក្រុមហ៊ុនវៀតណាមនឹងជួបការលំបាកក្នុងការរក្សាអាជីវកម្មរបស់ខ្លួននៅទីនោះជាមិនខាន។
សមាគមដូងវៀតណាមបានបញ្ជាក់ថា ទីផ្សារអន្តរជាតិកំពុងមានស្តង់ដារតឹងរ៉ឹងកាន់តែខ្លាំងឡើងសម្រាប់ដូងស្រស់ ខុសពីផលិតផលដូងកែច្នៃ។ បច្ចុប្បន្ននេះ ដូងស្រស់លក់រាយក្នុងតម្លៃប្រមាណ ៩០,០០០ ដុងនៅទីក្រុងប៉េកាំង និងរហូតដល់ ១២០,០០០ ដុងនៅសហរដ្ឋអាមេរិក ដូច្នេះហើយ អ្នកនាំចូលភាគច្រើនទិញតែផលិតផលពីកសិដ្ឋានដែលមានការបញ្ជាក់ស្តង់ដារអន្តរជាតិប៉ុណ្ណោះ។
ផ្ទុយទៅវិញ ប្រទេសថៃអាចលក់ដូងស្រស់ទៅកាន់អឺរ៉ុបបានក្នុងតម្លៃ ៤.៣៩ ដុល្លារក្នុងមួយផ្លែ ដោយសារចម្ការដូងរបស់ពួកគេត្រូវបានគ្រប់គ្រងយ៉ាងតឹងរ៉ឹងតាមស្តង់ដារខ្ពស់។
យោងតាមទិន្នន័យគយវៀតណាម ការនាំចេញដូងស្រស់ក្នុងឆ្នាំ ២០២៥ បានកើនឡើង ១៧% ពីមួយឆ្នាំទៅមួយឆ្នាំ រហូតដល់ ១៣៨ លានដុល្លារ។ ចំណែកដូងកែច្នៃវិញ បាននាំមកនូវទឹកប្រាក់បន្ថែម ២៦០ លានដុល្លារ កើនឡើង ៥៥%។ ប៉ុន្តែនៅពេលដែលតម្លៃដូងធ្លាក់ចុះ ចំនួនអាជីវកម្មជួញដូរដូងក៏បានធ្លាក់ចុះប្រមាណ ៣០% ផងដែរ។
