By លោក Pep Guardiola អ្នកចាត់ការទូទៅដ៏ល្បីល្បាញរបស់ក្លិប Manchester City ត្រៀមនឹងដឹកនាំការប្រកួតលើកទី ១,០០០ ក្នុងអាជីពជាគ្រូបង្វឹករបស់ខ្លួន នៅពេលដែលក្រុមមេឃខៀវនឹងបើកទ្វារកីឡដ្ឋាន Etihad ទទួលស្វាគមន៍ក្រុមហង្សក្រហម Liverpool នៅក្នុងក្របខ័ណ្ឌ Premier League នៅថ្ងៃអាទិត្យខាងមុខនេះ។
គ្រូបង្វឹករូបនេះបានសម្តែងការភ្ញាក់ផ្អើលយ៉ាងខ្លាំង ចំពោះចំនួនប្រកួតដ៏ច្រើនសន្ធឹកសន្ធាប់ដែលគាត់បានដឹកនាំក្នុងអាជីពជាអ្នកចាត់ការទូទៅ។ គិតមកដល់ពេលនេះ ក្នុងចំណោម ៩៩៩ ប្រកួតដែលគាត់បានដឹកនាំក្រុមយក្សទាំងបីគឺ Barcelona, Bayern Munich និង Manchester City លោក Guardiola ទទួលបានជ័យជម្នះរហូតដល់ ៧១៥ ដង ដែលស្មើនឹងអត្រាឈ្នះ ៧១.៥៧% និងបានឈ្នះពានរង្វាន់សរុប ៣៩ ឯណោះ។ 
អ្នកចាត់ការសញ្ជាតិអេស្ប៉ាញវ័យ ៥៤ ឆ្នាំរូបនេះ បានយល់ស្របជាមួយលោក Sir Alex Ferguson ដែរថា ភាពជោគជ័យដ៏ត្រចះត្រចង់របស់គាត់ គឺពិតជាពឹងផ្អែកទៅលើការមានកីឡាករឆ្នើមៗក្រោមការដឹកនាំ។
លោក Guardiola បានថ្លែងថា៖ “ការលះបង់ ចំណង់ចំណូលចិត្ត និងក្តីស្រឡាញ់ គឺគ្មាននរណាម្នាក់អាចយកឈ្នះខ្ញុំបានឡើយ។ ពួកយើងបានឈ្នះអ្វីដែលមិនគួរឱ្យជឿទាំងនៅក្លិប Barcelona, Bayern Munich និងនៅទីនេះ (Man City)។ វាពិបាកក្នុងការឈានទៅដល់ ហើយប្រសិនបើខ្ញុំចាប់ផ្តើមម្តងទៀត ខ្ញុំក៏ប្រហែលជាមិនអាចឈានដល់ចំណុចនេះដែរ ព្រោះវាជាចំនួនប្រកួតដ៏ច្រើនលើសលប់។ ការចាញ់តែប៉ុន្មានប្រកួតប៉ុណ្ណោះក្នុងចំណោម ១,០០០ ប្រកួត ហើយខ្ញុំសង្ឃឹមថានៅថ្ងៃអាទិត្យនេះ យើងនឹងអាចបន្តឈ្នះទៀត”។ 
សរុបមកក្នុងអាជីពជាគ្រូបង្វឹកអស់រយៈពេល ១៧ ឆ្នាំមកនេះ លោក Guardiola បានដឹកនាំក្រុម Barcelona ឈ្នះ ១៤ ពាន, Bayern Munich ចំនួន ៧ ពាន និង Manchester City ចំនួន ១៨ ពាន។
