By កាលពីថ្ងៃសុក្រ ទី៧ ខែវិច្ឆិកា នេះ ប្រព័ន្ធផ្សព្វផ្សាយរដ្ឋ CCTV បានរាយការណ៍ថា ប្រទេសចិនបានដាក់ឲ្យដំណើរការជាផ្លូវការនូវនាវាផ្ទុកយន្តហោះទីបីរបស់ខ្លួនឈ្មោះ Fujian ចូលទៅក្នុងសេវាកម្មកងទ័ពជើងទឹកយ៉ាងសកម្ម។ នេះគឺជាជំហានដ៏សំខាន់ និងគួរឲ្យកត់សម្គាល់មួយ ក្នុងការជំរុញមហិច្ឆតារបស់លោកប្រធានាធិបតី ស៊ី ជីនពីង ដើម្បីធ្វើទំនើបកម្មយោធារបស់ប្រទេស ក៏ដូចជាពង្រឹងកម្លាំងការពារជាតិផងដែរ។
ពិធីសម្ពោធដ៏ឱឡារិកនេះ ដែលមានការអញ្ជើញចូលរួមដោយផ្ទាល់ពីលោកប្រធានាធិបតី ស៊ី ជីនពីង ផងដែរនោះ បានប្រព្រឹត្តទៅកាលពីថ្ងៃពុធ នៅកំពង់ផែទ័ពជើងទឹក ក្នុងខេត្ត Hainan។ បុគ្គលិកជើងទឹកជាង២០០០នាក់ រួមទាំងកងនាវាចរ និងអង្គភាពសាងសង់នាវា បានចូលរួមក្នុងព្រឹត្តិការណ៍ជាប្រវត្តិសាស្ត្រនេះ ដែលសារព័ត៍មានក្នុងស្រុកស៊ីនហួ បានពិពណ៌នាថា ជាព្រឹត្តិការណ៍មួយ «អស្ចារ្យ និងគួរឲ្យរំភើប» បំផុត។
ទូរទស្សន៍ CCTV ក៏បានផ្សាយទៀតថា លោកប្រធានាធិបតី ស៊ី ជីនពីង បានឡើងទៅលើនាវា Fujian បន្ទាប់ពីពិធីត្រួតពិនិត្យប្រព័ន្ធរួចរាល់ ហើយថែមទាំងបានចុះហត្ថលេខាលើសៀវភៅកំណត់ហេតុរបស់នាវាដោយផ្ទាល់ដៃទៀតផង។ នាវា Fujian នេះត្រូវបានបំពាក់នូវប្រព័ន្ធបាញ់បង្ហោះយន្តហោះអេឡិចត្រូម៉ាញេទិក (EMALS) ដែលជាបច្ចេកវិទ្យាដ៏ទំនើប និងមានប្រើតែមួយគត់ដោយនាវា USS Gerald R. Ford របស់កងទ័ពជើងទឹកសហរដ្ឋអាមេរិកប៉ុណ្ណោះ។ ប្រព័ន្ធនេះអនុញ្ញាតឲ្យយន្តហោះអាចហោះឡើងជាមួយនឹងបន្ទុកធ្ងន់ និងប្រេងឥន្ធនៈកាន់តែច្រើន ប្រកបដោយប្រសិទ្ធភាពខ្ពស់។
បន្ទាប់ពីការសាកល្បងលើសមុទ្រអស់ជាច្រើនខែ នាវា Fujian បានចូលរួមជាមួយនាវាផ្ទុកយន្តហោះ២គ្រឿងផ្សេងទៀតរបស់ចិនគឺ Liaoning (ដែលបម្រើការក្នុងឆ្នាំ២០១២) និង Shandong (ឆ្នាំ២០១៩)។ ក្រុមអ្នកវិភាគបានលើកឡើងថា នាវាថ្មីនេះតំណាងឲ្យការលោតផ្លោះដ៏ធំធេងនៃសមត្ថភាពយោធា ខណៈដែលទីក្រុងប៉េកាំងកំពុងស្វែងរកការពង្រីកវត្តមានកងទ័ពជើងទឹករបស់ខ្លួននៅក្នុងតំបន់សមុទ្រចិនខាងត្បូង និងជុំវិញកោះតៃវ៉ាន់ ដែលជាចំណុចរសើបក្នុងភូមិសាស្ត្រនយោបាយ។
កាលពីខែកញ្ញា កន្លងទៅនេះ នាវា Fujian ក៏ធ្លាប់បានធ្វើដំណើរឆ្លងកាត់ច្រកសមុទ្រតៃវ៉ាន់ជាលើកដំបូងផងដែរ ដោយធ្វើ«បេសកកម្មស្រាវជ្រាវ និងបណ្តុះបណ្តាលវិទ្យាសាស្ត្រ» ដែលបានទាក់ទាញចំណាប់អារម្មណ៍យ៉ាងខ្លាំងពីក្រសួងការពារជាតិរបស់ជប៉ុន និង តៃវ៉ាន់។
ទោះបីជាប្រទេសចិននៅតែតាមពីក្រោយសហរដ្ឋអាមេរិក ដែលកំពុងប្រតិបត្តិការនាវាផ្ទុកយន្តហោះចំនួន១១គ្រឿងនោះក៏ដោយ ក៏ការបង្កើតកងទ័ពជើងទឹកយ៉ាងឆាប់រហ័សរបស់ខ្លួន បានធ្វើឲ្យមានការព្រួយបារម្ភយ៉ាងខ្លាំងនៅក្នុងតំបន់អាស៊ីបូព៌ាទាំងមូល។ យ៉ាងណាមិញ ទីក្រុងប៉េកាំងនៅតែទទូចថា ចេតនារបស់ខ្លួនមានសន្តិភាព និងមិនមានបំណងបង្កជម្លោះឡើយ។
