By ដោយចោទប្រកាន់អាហ្វ្រិកខាងត្បូងថាបានបៀតបៀនកសិករស្បែកស «Afrikaner» លោកអតីតប្រធានាធិបតីអាមេរិកដូណាល់ ត្រាំ បានប្រកាសកាលពីថ្ងៃសុក្រ ទី៧ ខែវិច្ឆិកា ថាទាំងរូបលោក និងមន្ត្រីរដ្ឋាភិបាលអាមេរិកផ្សេងទៀត នឹងមិនចូលរួមកិច្ចប្រជុំកំពូល G20 នៅឆ្នាំនេះឡើយ។ ការសម្រេចចិត្តដ៏ភ្ញាក់ផ្អើលនេះ បានធ្វើឡើងចំពេលដែលលោកត្រាំនៅតែបន្តរិះគន់អាហ្វ្រិកខាងត្បូងយ៉ាងខ្លាំងក្លាជុំវិញបញ្ហាសិទ្ធិមនុស្ស និងការរឹបអូសដីធ្លី។
សារព័ត៌មាន The Guardian ចេញផ្សាយកាលពីថ្ងៃទី៧ ខែវិច្ឆិកា បានឲ្យដឹងថា លោកត្រាំធ្លាប់បានប្រកាសរួចហើយពីមុនថា លោកនឹងមិនចូលរួមកិច្ចប្រជុំប្រចាំឆ្នាំ G20 ដែលគ្រោងធ្វើឡើងពីថ្ងៃទី២២ ដល់ថ្ងៃទី២៣ ខែនេះ នៅទីក្រុង Johannesburg ប្រទេសអាហ្វ្រិកខាងត្បូងឡើយ។ ដើមឡើយ អនុប្រធានាធិបតី JD Vance ត្រូវបានគេរំពឹងថានឹងតំណាងឲ្យសហរដ្ឋអាមេរិក ប៉ុន្តែក្រោយមកដំណើរទស្សនកិច្ចរបស់លោក Vance ក៏ត្រូវបានលុបចោលទាំងស្រុង។
តាមរយៈការបង្ហោះលើបណ្តាញសង្គម លោកត្រាំបានរិះគន់ចំៗថា «វាជារឿងអាម៉ាស់បំផុតដែលកិច្ចប្រជុំ G20 ត្រូវបានប្រារព្ធឡើងនៅអាហ្វ្រិកខាងត្បូង»។ លោកបានលើកឡើងពីអ្វីដែលលោកហៅថា «ការរំលោភបំពាន» លើជនជាតិស្បែកស Afrikaner រួមមានអំពើហិង្សា និងការរឹបអូសដីធ្លីជាដើម។
រដ្ឋបាលលោកត្រាំ បានចោទប្រកាន់អាហ្វ្រិកខាងត្បូងម្តងហើយម្តងទៀតថាបានអនុញ្ញាតឲ្យមានការវាយប្រហារ និងការរើសអើងប្រឆាំងនឹងកសិករស្បែកស ទោះបីជាមន្ត្រីអាហ្វ្រិកខាងត្បូងបានបដិសេធការអះអាងទាំងនោះក៏ដោយ។
យ៉ាងណាមិញ ប្រធានាធិបតីអាហ្វ្រិកខាងត្បូងលោក Cyril Ramaphosa ធ្លាប់បានថ្លែងថា លោកបានប្រាប់លោកត្រាំថា ការចោទប្រកាន់ទាំងនេះគឺ «មិនពិតទាល់តែសោះ»។ លោកបានកត់សម្គាល់ថា ពលរដ្ឋស្បែកសនៅតែបន្តទទួលបានកម្រិតជីវភាពខ្ពស់ជាងប្រជាជនអាហ្វ្រិកខាងត្បូងភាគច្រើន ជាងបីទសវត្សរ៍មកហើយ បន្ទាប់ពីការបញ្ចប់របបរើសអើងពូជសាសន៍ដ៏ជូរចត់។
ទោះបីជាមានការបដិសេធយ៉ាងដាច់អហង្ការពីភាគីអាហ្វ្រិកខាងត្បូងក៏ដោយ លោកត្រាំនៅតែបន្តការរិះគន់របស់លោក។ កាលពីដើមសប្តាហ៍នេះ លោកថែមទាំងបានស្នើក្នុងអំឡុងសុន្ទរកថាសេដ្ឋកិច្ចនៅទីក្រុង Miami ថា អាហ្វ្រិកខាងត្បូងគួរតែត្រូវបានបណ្តេញចេញពីកិច្ចប្រជុំ G20 តែម្តង៕
