By ទីក្រុងឡុងដ៍ ចក្រភពអង់គ្លេស៖ កាលពីថ្ងៃទី៦ ខែវិច្ឆិកា ឆ្នាំ២០២៥ ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ បានដឹកនាំប្រតិភូចូលរួមពិព័រណ៍ទេសចរណ៍អន្តរជាតិ (World Travel Market) នៅទីក្រុងឡុងដ៍។ ក្នុងឱកាសដ៏សំខាន់នេះ ឯកឧត្តមរដ្ឋមន្ត្រីបានជួបពិភាក្សាការងារជាមួយលោក Andrea Primicerio ដែលជាភ្នាក់ងារពិភពលោក និងជានាយកក្រុមហ៊ុន Klassics Music Management Limited ដើម្បីពិនិត្យលើគម្រោងដ៏ធំមួយ គឺការរៀបចំការប្រគំតន្ត្រីលំដាប់អន្តរជាតិរបស់តារាចម្រៀងពិភពលោកដ៏ល្បីល្បាញ លោក Andrea Bocelli នៅប្រទេសកម្ពុជា។ ព័ត៌មាននេះត្រូវបានផ្សព្វផ្សាយដោយក្រសួងព័ត៌មាននៅថ្ងៃទី៨ ខែវិច្ឆិកា ឆ្នាំ២០២៥។
លើសពីនេះ ឯកឧត្តមរដ្ឋមន្ត្រី ហួត ហាក់ ក៏បានឆ្លៀតឱកាសអញ្ជើញលោក Andrea Primicerio ព្រមទាំងក្រុមការងាររបស់លោក មកបំពេញទស្សនកិច្ចផ្ទាល់នៅកម្ពុជា ដើម្បីសិក្សាស្វែងយល់ឱ្យកាន់តែច្បាស់អំពីស្ថានភាពនយោបាយ សង្គម សេដ្ឋកិច្ចជាក់ស្ដែង ក៏ដូចជាកត្តាសន្តិភាព សុវត្ថិភាពសម្រាប់ភ្ញៀវទេសចរ និងសក្ដានុពលដ៏សម្បូរបែបនៃវិស័យទេសចរណ៍នៅកម្ពុជាផងដែរ។ នេះជាជំហានដ៏សំខាន់មួយក្នុងការទាក់ទាញព្រឹត្តិការណ៍សិល្បៈលំដាប់ពិភពលោកមកកាន់ទឹកដីអង្គរ។
