By ភ្នំពេញ៖ ក្រសួងសុខាភិបាលកម្ពុជា នៅថ្ងៃទី០៨ ខែវិច្ឆិកា ឆ្នាំ២០២៥ នេះ បានចេញសេចក្តីជូនដំណឹងបញ្ជាក់ថា កម្ពុជាមិនមានករណីឆ្លងជំងឺកូវីដ-១៩ ថ្មី អ្នកជាសះស្បើយ ឬអ្នកស្លាប់នោះទេ។ នេះជាដំណឹងល្អមួយដែលឆ្លុះបញ្ចាំងពីស្ថានភាពប្រសើរឡើងនៃជំងឺរាតត្បាតនៅក្នុងប្រទេស។ យ៉ាងណាមិញ ក្រសួងនៅតែអំពាវនាវដល់បងប្អូនប្រជាពលរដ្ឋទាំងអស់ បន្តអនុវត្តខ្ជាប់ខ្ជួននូវវិធានការ “៣កុំ ៣ការពារ” ដើម្បីទប់ស្កាត់ការរីករាលដាលសារជាថ្មី។
គួររំលឹកផងដែរថា សម្រាប់ថ្ងៃទី០៧ ខែវិច្ឆិកា ឆ្នាំ២០២៥ ក៏មិនមានករណីឆ្លងថ្មី អ្នកជាសះស្បើយ ឬអ្នកជំងឺស្លាប់ដោយសារកូវីដ-១៩ នោះដែរ។ ជាក់ស្តែង ករណីឆ្លងក្នុងសហគមន៍ (អូមីក្រុង) មិនមាន ហើយករណីនាំចូលពីបរទេសក៏មិនមានដែរ។
គិតត្រឹមព្រឹកថ្ងៃទី០៨ ខែវិច្ឆិកា ឆ្នាំ២០២៥ ស្ថានភាពសរុបនៃជំងឺកូវីដ-១៩ នៅកម្ពុជាមានដូចខាងក្រោម៖
* ចំនួនអ្នកឆ្លងសរុប៖ ១៣៩,៦៥៥ នាក់
* ចំនួនអ្នកជាសះស្បើយសរុប៖ ១៣៦,៥៩៩ នាក់
* ចំនួនអ្នកស្លាប់សរុប៖ ៣,០៥៦ នាក់
ក្រសួងសុខាភិបាលបានបញ្ជាក់ថា លទ្ធផល និងទម្រង់ស្នើសុំធ្វើពិសោធន៍ (Laboratory Request Form) សម្រាប់ករណីវិជ្ជមានកូវីដ-១៩ និងករណីជាសះស្បើយទាំងអស់ ត្រូវបានផ្ញើជូនមន្ទីរសុខាភិបាលរាជធានី-ខេត្ត មន្ទីរពេទ្យព្យាបាល និងមណ្ឌលព្យាបាលកម្រិតស្រាល តាមប្រព័ន្ធអេឡិចត្រូនិកសម្រាប់គ្រប់គ្រងបន្តរួចហើយ។
ក្រសួងសុខាភិបាលនឹងបន្តជូនដំណឹងដល់សាធារណជនអំពីការវិវត្តន៍នៃបញ្ហាសុខភាពតាមរយៈទំព័រហ្វេសប៊ុក និងគេហទំព័រផ្លូវការរបស់ក្រសួង www.cdcmoh.gov.kh ដែលមានសម្ភារៈអប់រំសុខភាពអាចទាញយកមកប្រើប្រាស់បាន។
សម្រាប់ព័ត៌មានបន្ថែម ឬសាកសួរ សូមទាក់ទងទូរស័ព្ទទាន់ហេតុការណ៍ក្រសួងសុខាភិបាល លេខ ១១៥ ដោយឥតគិតថ្លៃ ឬតាមរយៈលេខទូរស័ព្ទ ០១២ ៨២៥ ៤២៤ / ០១២ ៤៨៨ ៩៨១ / ០១២ ៨៣៦ ៨៦៨។
