By លោក Pham Nhat Vuong មហាសេដ្ឋីវៀតណាមដ៏ល្បីល្បាញ បានបោះទុនវិនិយោគ ២១៣ ពាន់លានដុង ឬប្រមាណ ៨.១ លានដុល្លារអាមេរិក ដើម្បីបង្កើតក្រុមហ៊ុនអវកាសថ្មីស្រឡាងមួយ គឺ VinSpace។
ក្រុមហ៊ុននេះនឹងប្រតិបត្តិការលើវិស័យសំខាន់ៗចំនួន ៦ រួមមាន យន្តហោះ យានអវកាស ការផលិតផ្កាយរណបទូរគមនាគមន៍ និងសេវាដឹកជញ្ជូនតាមផ្លូវអាកាស នេះបើយោងតាមឯកសារចុះបញ្ជី។
VinSpace មានដើមទុនសរុប ៣០០ ពាន់លានដុង ឬស្មើនឹង ១១.៤ លានដុល្លារអាមេរិក ខណៈដែលលោក Vuong កាន់កាប់ភាគហ៊ុនរហូតដល់ ៧១%។
ចំណែកឯក្រុមហ៊ុនមេ Vingroup កាន់កាប់ភាគហ៊ុន ១៩% រីឯភាគហ៊ុនដែលនៅសេសសល់ គឺស្ថិតនៅក្នុងដៃកូនប្រុសទាំងពីររបស់លោក គឺលោក Pham Nhat Quan Anh និងលោក Pham Nhat Minh Hoang។ កូនប្រុសទាំងពីរនេះ ក៏មានភាគហ៊ុនរាប់ទ្រីលានដុងនៅក្នុងក្រុមហ៊ុនបុត្រសម្ព័ន្ធជាច្រើនរបស់ Vingroup ផងដែរ ដូចជា VinEnergo (ថាមពល) VinSpeed (អភិវឌ្ឍន៍ហេដ្ឋារចនាសម្ព័ន្ធដឹកជញ្ជូន) និង VinRobotics (បច្ចេកវិទ្យា) ជាដើម។
គួររំលឹកផងដែរថា Vingroup ធ្លាប់មានបំណងចូលខ្លួនក្នុងវិស័យអាកាសចរណ៍ កាលពីឆ្នាំ ២០១៩ ជាមួយក្រុមហ៊ុន VinPearl Air តែគម្រោងនេះត្រូវបានលុបចោលវិញនៅឆ្នាំ ២០២០ ដើម្បីងាកមកផ្តោតលើឧស្សាហកម្មបច្ចេកវិទ្យាវិញ។ ថ្មីៗនេះទៀត លោក Vuong និងក្រុមគ្រួសារ ក៏បានចាប់ផ្ដើមបោះទុនចូលក្នុងវិស័យឧស្សាហកម្មដែកថែប (VinMetal) និងវិស័យកម្សាន្ត (V-Film) ជាលើកដំបូង កាលពីខែតុលា។ មិនតែប៉ុណ្ណោះ ពួកគេក៏បានបើកអាជីវកម្មថែទាំមនុស្សចាស់ថ្មីមួយទៀត ដែលមានឈ្មោះថា Vin New Horizon ក្នុងខែជាមួយគ្នានេះដែរ។
បច្ចុប្បន្ននេះ លោក Vuong ត្រូវបានទស្សនាវដ្តី Forbes ចាត់ទុកជាមហាសេដ្ឋីមានបំផុតនៅវៀតណាម ដោយទ្រព្យសម្បត្តិសរុបរបស់លោកត្រូវបានគេប៉ាន់ប្រមាណថាមានចំនួន ១៩ ពាន់លានដុល្លារអាមេរិក។
វៀតណាមភ្ញាក់ផ្អើល! មហាសេដ្ឋី Pham Nhat Vuong បោះទុនចូលវិស័យអវកាស បង្កើតក្រុមហ៊ុន VinSpace
