By រាជធានីភ្នំពេញ៖ នៅព្រឹកថ្ងៃទី៧ ខែវិច្ឆិកា ឆ្នាំ២០២៥ នេះ រដ្ឋបាលខណ្ឌ៧មករា បានដឹកនាំកម្លាំងជំនាញចុះពិនិត្យ និងចាត់វិធានការលើទីតាំងសាលាបង្រៀនគួរ «ជ័យថាវី» ដែលបានសាងសង់សំណង់រំលោភបំពានលើចំណីផ្លូវសាធារណៈលេខ១៤៩ ស្ថិតក្នុងសង្កាត់វាលវង់។ ការចុះអនុវត្តនេះ ធ្វើឡើងបន្ទាប់ពីមានសេចក្តីជូនដំណឹងជាបន្តបន្ទាប់ទៅម្ចាស់សំណង់ ហើយអាជ្ញាធរបានកត់សម្គាល់ឃើញថា គ្រួសារដែលជាប់ពាក់ព័ន្ធផ្សេងទៀតបានយល់ព្រមរុះរើតាមការណែនាំ ប៉ុន្តែសាលាជ័យថាវី នៅតែមិនព្រមសហការឡើយ។
លោក ឌី រ័ត្នខេមរុណ អភិបាលរងខណ្ឌ៧មករា តំណាងលោក ថេង សុថុល អភិបាលនៃគណៈអភិបាលខណ្ឌ បានបញ្ជាក់ថា ការងារនេះបានទទួលការអនុញ្ញាតពីក្រសួងរៀបចំដែនដី នគររូបនីយ៍កម្ម និងសំណង់ ព្រមទាំងរដ្ឋបាលរាជធានីភ្នំពេញ បន្ទាប់ពីពិនិត្យឃើញយ៉ាងច្បាស់ថា សំណង់នេះបានរំលោភបំពានដងផ្លូវសាធារណៈទាំងស្រុង ដែលបង្កឲ្យប៉ះពាល់ដល់លំហូរចរាចរណ៍ សោភ័ណភាព និងសណ្តាប់ធ្នាប់សាធារណៈយ៉ាងធ្ងន់ធ្ងរក្នុងតំបន់។
អភិបាលរងខណ្ឌរូបនេះ ក៏បានព្រមានផងដែរថា កំឡុងពេលចុះរុះរើអនុវត្តន៍វិធានការរដ្ឋបាលនេះ អាជ្ញាធរនឹងមិនទទួលខុសត្រូវចំពោះការបាត់បង់ ឬខូចខាតទ្រព្យសម្បត្តិរបស់បងប្អូនប្រជាពលរដ្ឋណាដែលនៅតែបន្តរំលោភបំពាន ហើយមិនព្រមចូលរួមសហការរុះរើជាមួយអាជ្ញាធរនោះឡើយ។
ក្រសួងរៀបចំដែនដី នគរូបនីយកម្ម និងសំណង់ ក៏បានចេញសេចក្តីជូនដំណឹងជំរុញឱ្យម្ចាស់សាលាជ័យថាវី រុះរើសំណង់របស់ខ្លួនដែរ បន្ទាប់ពីការចុះពិនិត្យជាក់ស្តែងបានរកឃើញថា៖
១. សំណង់នេះបានសាងសង់ពីដែកជារោងសម្រាប់ចំណតកង់-ម៉ូតូរបស់បុគ្គលិក និងសិស្ស។
២. សំណង់នេះបានបិទផ្លូវសាធារណៈលេខ១៤៩ បង្កឱ្យមានភាពអាណាធិបតេយ្យ និងបាត់បង់សណ្តាប់ធ្នាប់ដោយសារការដាក់កង់ ម៉ូតូពាសពេញផ្លូវ។
៣. សំណង់ដែលបិទផ្លូវបែបនេះ មិនត្រឹមតែធ្វើឱ្យខូចសោភ័ណភាព និងសណ្តាប់ធ្នាប់ប៉ុណ្ណោះទេ តែថែមទាំងប៉ះពាល់ដល់លំហូរចរាចរណ៍ សុវត្ថិភាព និងការសង្គ្រោះនានានៅពេលមានអគ្គិភ័យកើតឡើងជាយថាហេតុទៀតផង។
សាលាជ័យថាវី នៅតែបំពាន! អាជ្ញាធរខណ្ឌ៧មករា ដឹកនាំចុះរុះរើសំណង់បិទផ្លូវសាធារណៈ
