By (ខេត្តតាកែវ)៖ នៅរសៀលថ្ងៃទី ៨ ខែវិច្ឆិកា ឆ្នាំ ២០២៥ នេះ ក្រសួងមហាផ្ទៃ បានឱ្យដឹងថា រដ្ឋបាលខេត្តតាកែវ បាននាំយកពូជស្រូវជិត ៣០តោន ចែកជូនពលរដ្ឋរងគ្រោះដោយសារទឹកជំនន់លិចដំណាំស្រូវ ក្នុងស្រុកចំនួន៥ នៃខេត្តតាកែវ។ ការចែកពូជស្រូវនេះ ធ្វើឡើងក្នុងគោលបំណងជួយសម្រាលការលំបាករបស់ប្រជាកសិករ ដែលបានបាត់បង់ផលដំណាំដោយសារគ្រោះធម្មជាតិ។
ឯកឧត្តម វ៉ី សំណាង អភិបាលខេត្តតាកែវ ព្រមទាំងប្រធានមន្ទីរអង្គភាពពាក់ព័ន្ធ និងអភិបាលស្រុកទាំង ៥ រួមមាន ស្រុកទ្រាំង ស្រុកអង្គរបូរី ស្រុកបូរីជលសារ ស្រុកកោះអណ្ដែត និងស្រុកព្រៃកប្បាស បានអញ្ជើញអមដំណើរឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ និងប្រតិភូអមដំណើរ បានអញ្ជើញនាំយកពូជស្រូវ ចំនួន ២៩.៩០០ គីឡូក្រាម មកចែកជូនពលរដ្ឋចំនួន ២៩៩ គ្រួសារ ដែលរងគ្រោះដោយសារទឹកជំនន់ជន់លិចដំណាំស្រូវក្នុងខេត្តតាកែវ។ 
ឯកឧត្តម វ៉ី សំណាង អភិបាលខេត្តតាកែវ បានថ្លែងបញ្ជាក់ថា សម្រាប់ខេត្តតាកែវ ការបង្កបង្កើនផលស្រូវរដូវវស្សា និងរដូវប្រាំងរបស់បងប្អូនប្រជាកសិករនៅក្នុងខេត្ត មានការកើនឡើងទៅតាមផែនការដែលបានគ្រោងទុក។ លោកបន្តថា នៅរដូវវស្សាកន្លងទៅនេះ ស្រូវរបស់បងប្អូនប្រជាកសិករមួយចំនួន ត្រូវបានរងគ្រោះដោយសារទឹកជំនន់ភ្លៀង ប៉ុន្តែអាជ្ញាធរខេត្ត ជាពិសេសរាជរដ្ឋាភិបាល និងក្រសួងកសិកម្ម បានយកចិត្តទុកដាក់ចុះជួយបងប្អូនបានទាន់ពេលវេលា។ 
ឯកឧត្តម ឌិត ទីណា រដ្ឋមន្ត្រីក្រសួងកសិកម្ម ក៏បានលើកឡើងពីការយកចិត្តទុកដាក់របស់រាជរដ្ឋាភិបាលកម្ពុជា និងក្រសួងកសិកម្ម ក្នុងការជួយកសិករដែលរងគ្រោះដោយសារទឹកជំនន់ និងបានស្វះស្វែងរកទីផ្សារកសិផលជូនបងប្អូនប្រជាកសិករផងដែរ។ លោកបានបន្ថែមថា ទោះបីជាតម្លៃស្រូវមានការធ្លាក់ចុះក៏ដោយ ក៏រាជរដ្ឋាភិបាលបានយកចិត្តទុកដាក់ជួយកសិករក្នុងការបញ្ចុះថ្លៃដើមផលិតឱ្យមានតម្លៃទាប ដូចជាជីកសិកម្ម និងថ្នាំបាញ់សម្លាប់សត្វល្អិតជាដើម ដើម្បីធានាថាការលក់ស្រូវរបស់កសិករនៅតែមានការចំណេញ។ 
ឯកឧត្តមរដ្ឋមន្ត្រីក៏បានគូសបញ្ជាក់ពីកម្មវិធីគោលនយោបាយអាទិភាពរបស់រាជរដ្ឋាភិបាលក្នុងការរក្សាលំនឹងថ្លៃ កាត់បន្ថយថ្លៃដើមផលិត ការដាក់ពង្រាយមន្ត្រីបច្ចេកទេសកសិកម្មទៅគ្រប់ឃុំ-សង្កាត់ និងការរៀបចំសហគមន៍កសិកម្មទំនើប ដើម្បីជួយគាំទ្រលើផ្នែកបច្ចេកទេស និងជួយដោះស្រាយបញ្ហាពាក់ព័ន្ធនឹងការងារកសិកម្មដល់កសិករផងដែរ។ 
សូមបញ្ជាក់ផងដែរថា ពូជស្រូវប្រមាណ ៣០ តោន ត្រូវបានឯកឧត្តមរដ្ឋមន្ត្រីក្រសួងកសិកម្ម ចុះចែកដល់បងប្អូនប្រជាកសិករដែលរងផលប៉ះពាល់ដោយសារទឹកជំនន់នៅក្នុងស្រុកចំនួន ៥ របស់ខេត្តតាកែវ ដល់ចំនួន ២៩៩ គ្រួសារ។ នេះជាការឆ្លើយតបយ៉ាងឆាប់រហ័សពីរាជរដ្ឋាភិបាលចំពោះទុក្ខលំបាករបស់ប្រជាពលរដ្ឋ។ 
ប្រភព៖ ក្រសួងមហាផ្ទៃ
