By ជាង ៣០០ នាក់នៃពលរដ្ឋខេត្តអាយុធ្យា ប្រទេសថៃ បានចេញធ្វើបាតុកម្មដ៏ធំមួយប្រឆាំងនឹងរដ្ឋាភិបាល ដោយសារតែពួកគាត់ទ្រាំលែងបាននឹងទឹកជំនន់ដែលបានជន់លិចសហគមន៍របស់ពួកគេអស់រយៈពេលជាង ៣ ខែមកហើយ ខណៈអាជ្ញាធរនៅតែមិនព្រមបើកទ្វារទឹករំដោះទៅកាន់តំបន់ផ្សេងៗ។
កាសែត The Star បានផ្សាយកាលពីថ្ងៃសៅរ៍ ទី ៨ ខែវិច្ឆិកា ឆ្នាំ ២០២៥ ថា ពលរដ្ឋទាំងនោះបាននាំគ្នាបិទផ្លូវ Ayutthaya-Sena ដើម្បីរង់ចាំការដោះស្រាយពីរដ្ឋាភិបាល។ ពួកគេទាមទារឲ្យអាជ្ញាធរបើកទ្វារទឹក Sam Ko និង Chao Jet ជាបន្ទាន់ ដើម្បីជួយរំដោះទឹកចេញពីផ្សារ Sena និងតំបន់ក្បែរៗនោះ ឲ្យហូរទៅកាន់តំបន់ Tung Ja Phaet, Tung Bang Sai និង Tung Koo Solat។
បច្ចុប្បន្ន នាយកដ្ឋានធនធានទឹកបានបញ្ចេញទឹក ២ ៧០០ ម៉ែត្រគូបក្នុងមួយវិនាទី បន្ថែមលើបរិមាណទឹកជំនន់ដែលកំពុងជន់លិចស្រាប់ ធ្វើឲ្យស្ថានការណ៍រឹតតែអាក្រក់ទៅដល់ប្រជាពលរដ្ឋក្នុងស្រុកជាច្រើន។
តំបន់ដែលរងគ្រោះធ្ងន់ធ្ងរជាងគេគឺស្រុក Sena, Bang Ban និង Phak Hai ដែលទឹកជំនន់បានបំផ្លាញផ្ទះសម្បែងជាង ៣០ ០០០ ខ្នង ហើយគ្រួសារខ្លះត្រូវបង្ខំចិត្តរស់នៅតាមចិញ្ចើមផ្លូវយ៉ាងវេទនា។
បាតុកម្មនេះកើតឡើងស្របពេលដែលខេត្តចំនួន ៧ នៅប្រទេសថៃ បានប្រកាសអាសន្នទឹកជំនន់កម្រិតក្រហម ដែលជាកម្រិតធ្ងន់ធ្ងរបំផុត។ ការប្រកាសអាសន្ននេះបណ្ដាលមកពីទំនប់ចៅប្រាយ៉ានឹងត្រូវបញ្ចេញទឹកយ៉ាងគំហុក ដោយសារមិនអាចទប់ទល់នឹងបរិមាណទឹកភ្លៀងដែលបន្តធ្លាក់ឥតឈប់ឈរពីឥទ្ធិពលព្យុះជាច្រើនបន្តបន្ទាប់។
យោងតាមការផ្សាយរបស់ Khaosod ដោយដកស្រង់ប្រភពពីទីភ្នាក់ងារអវកាសនិងភូមិសាស្ត្រព័ត៌មានវិទ្យាជាតិនៃប្រទេសថៃ (GISTDA) កាលពីថ្ងៃសៅរ៍ ទី ៨ ខែវិច្ឆិកា ឆ្នាំ ២០២៥ បានឲ្យដឹងថា ខេត្តទាំង ៧ រួមមាន Chainat, Singburi, Ang Thong, Suphanburi, Phra Nakhon Si Ayutthaya, Saraburi និង Pathum Thani សុទ្ធតែត្រូវបានដាក់ក្នុងស្ថានភាពអាសន្ន និងតម្រូវឲ្យមានការត្រួតពិនិត្យតាមដានយ៉ាងដិតដល់ ខណៈទំនប់ចៅប្រាយ៉ាទំនងជានឹងបញ្ចេញទឹកក្នុងកម្រិត ២ ៨០០ ម៉ែត្រគូបក្នុងមួយវិនាទី។
GISTDA ក៏បានចេញការព្រមានបន្ថែមទៀតថា តំបន់ទាំង ៧ ខាងលើនឹងរងការលិចលង់ធ្ងន់ធ្ងរ ជាពិសេសដីកសិកម្ម និងសហគមន៍ដែលស្ថិតនៅតាមដងទន្លេ។
