By រាជធានីភ្នំពេញ ៖ ព្រះករុណា ព្រះបាទ សម្ដេចព្រះបរមនាថ នរោត្ដម សីហមុនី ព្រះមហាក្សត្រនៃព្រះរាជាណាចក្រកម្ពុជា ជាទីសក្ការៈដ៏ខ្ពង់ខ្ពស់បំផុត ព្រះអង្គបានសព្វព្រះរាជហឫទ័យយាងជាព្រះរាជាធិបតីដ៏ខ្ពង់ខ្ពស់បំផុត ក្នុងព្រះរាជពិធីប្រទានភ្លើងជ័យដ៏មហោឡារិក ដើម្បីអបអរសាទរខួបអនុស្សាវរីយ៍លើកទី៧២ នៃទិវាបុណ្យឯករាជ្យជាតិ ៩វិច្ឆិកា និងទិវាកំណើតកងយោធពលខេមរភូមិន្ទ (០៩ វិច្ឆិកា ១៩៥៣-០៩ វិច្ឆិកា ២០២៥)។ ពិធីបុណ្យជាតិដ៏សំខាន់នេះ ត្រូវបានគណៈកម្មាធិការជាតិរៀបចំបុណ្យជាតិ-អន្តរជាតិ រៀបចំឡើងយ៉ាងអធិកអធមនៅបរិវេណវិមានឯករាជ្យ កាលពីព្រឹកថ្ងៃទី០៩ ខែវិច្ឆិកា ឆ្នាំ២០២៥។
ព្រះរាជពិធីដ៏ឧត្ដុង្គឧត្ដមនេះ ក៏មានការយាង និងអញ្ជើញចូលរួមពីឥស្សរជនជាន់ខ្ពស់ជាច្រើនរូបផងដែរ រួមមាន ព្រះរាជវត្តមាន សម្ដេចព្រះអគ្គមហាសង្ឃរាជ សម្ដេចព្រះសង្ឃនាយករង សម្ដេចព្រះសង្ឃនានា និងវត្តមានដ៏ខ្ពង់ខ្ពស់ សម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា និងជាប្រធានក្រុមឧត្ដមប្រឹក្សាផ្ទាល់ព្រះមហាក្សត្រ, សម្ដេចមហារដ្ឋសភាធិការធិបតី ឃួន សុដារី ប្រធានរដ្ឋសភា, សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា, សម្ដេចអគ្គមហាពញាចក្រី ហេង សំរិន ប្រធានកិត្តិយសនៃក្រុមឧត្ដមប្រឹក្សាផ្ទាល់ព្រះមហាក្សត្រ ព្រមទាំងសម្ដេច ឯកឧត្ដម លោកជំទាវ ជាសមាជិកសមាជិកា ឧត្ដមប្រឹក្សាផ្ទាល់ព្រះមហាក្សត្រ ព្រឹទ្ធសភា រដ្ឋសភា រាជរដ្ឋាភិបាល អង្គទូត និងតំណាងស្ថានទូតនានាប្រចាំនៅកម្ពុជា។
មិនតែប៉ុណ្ណោះ ព្រះរាជវង្សានុវង្ស នាម៉ឺនសព្វមុខមន្ត្រី អ្នកមុខអ្នកការ កងកម្លាំងប្រដាប់អាវុធ មន្ត្រីរាជការគ្រប់ក្រសួង ស្ថាប័ន ក៏ដូចជាប្រជាពលរដ្ឋគ្រប់មជ្ឈដ្ឋាន លោកគ្រូ អ្នកគ្រូ កាយរឹទ្ធកម្ពុជា យុវជនកាកបាទក្រហមកម្ពុជា សហភាពសហព័ន្ធយុវជនកម្ពុជា សម្ពន្ធយុវជនស្រឡាញ់សន្តិភាព និងសិស្សានុសិស្សជាច្រើនកុះករ ក៏បានអញ្ជើញចូលរួមក្នុងពិធីដ៏មានអត្ថន័យនេះដែរ។
នៅក្នុងព្រះរាជពិធីនោះ បន្ទាប់ពីពិធីគោរពទង់ជាតិនៃព្រះរាជាណាចក្រកម្ពុជា ព្រះករុណាជាអម្ចាស់ជីវិតតម្កល់លើត្បូង ព្រះអង្គបានសព្វព្រះរាជហឫទ័យយាងប្រទានកម្រងផ្កា និងគោរពវិញ្ញាណក្ខន្ធវិរបុរសវីរនារីគ្រប់ជំនាន់ ព្រមទាំងយាងប្រទានភ្លើងជ័យដ៏ពិសិដ្ឋ ដែលដង្ហែអមព្រះរាជដំណើរដោយ សម្ដេចអគ្គមហាសេនាបតីតេជោ ហ៊ុន សែន, សម្ដេចមហារដ្ឋសភាធិការធិបតី ឃួន សុដារី និងសម្ដេចមហាបវរធិបតី ហ៊ុន ម៉ាណែត។ ក្នុងពិធីនោះ ក៏មានព្រះរាជវត្តមាន សម្ដេចព្រះមហាសង្ឃរាជ សម្ដេចព្រះសង្ឃនាយក និងសម្ដេចព្រះសង្ឃឋានានុក្រម ៩អង្គ ស្វាធ្យាយជយន្តោ ផងដែរ។
បន្ទាប់មក ព្រះករុណាជាអម្ចាស់ជីវិតលើត្បូង ព្រះអង្គបានសព្វព្រះរាជហឫទ័យយាងចូលរួមក្នុងពិធីបង្ហោះប៉េងប៉ោង និងលែងព្រាប ដែលជានិមិត្តរូបនៃសុខសន្តិភាព និងវិបុលភាពសម្រាប់ព្រះរាជាណាចក្រកម្ពុជា។
យោងតាមផែនការណែនាំរបស់គណៈកម្មាធិការរៀបចំបុណ្យជាតិ-អន្តរជាតិ បានឱ្យដឹងថា ក្នុងព្រះរាជពិធីប្រទានភ្លើងជ័យ និងព្រះរាជពិធីពន្លត់ភ្លើងជ័យ ក៏មានការរៀបចំកម្មវិធីអុជកាំជ្រួចរយៈពេល២ថ្ងៃ គឺនៅថ្ងៃទី៩ និងថ្ងៃទី១១ ខែវិច្ឆិកា ឆ្នាំ២០២៥ វេលាម៉ោង៧:០០នាទីយប់ នៅមុខព្រះបរមរាជវាំង។ ជាមួយគ្នានោះ ក៏មានក្រុមតន្ត្រីសម័យ និងបុរាណ សម្ដែងនិងប្រគំជូនប្រជារាស្ត្រទស្សនាកម្សាន្តនៅតាមទីសាធារណៈមួយចំនួនដែលបានកំណត់ផងដែរ។ ព្រះរាជពិធីពន្លត់ភ្លើងជ័យនឹងប្រារព្ធធ្វើឡើងនៅរសៀលថ្ងៃទី១១ ខែវិច្ឆិកា ឆ្នាំ២០២៥ ក្រោមព្រះរាជាធិបតីភាពដ៏ខ្ពង់ខ្ពស់បំផុតរបស់ព្រះករុណាជាអម្ចាស់ជីវិតលើត្បូង។
គួររំលឹកផងដែរថា ទិវាបុណ្យឯករាជ្យជាតិ ៩វិច្ឆិកា ត្រូវបានប្រារព្ធឡើងជារៀងរាល់ឆ្នាំ ដើម្បីឧទ្ទិសដល់ព្រះរាជបូជនីយកិច្ចដ៏ថ្លៃថ្លារបស់អតីតព្រះមហាក្សត្រ ព្រះបាទសម្ដេចព្រះ នរោត្ដម សីហនុ ព្រះបរមរតនកោដ្ឋ ដែលព្រះអង្គបានលះបង់ព្រះកាយពល និងព្រះបញ្ញាញាណយ៉ាងក្លៀវក្លាបំផុត ដើម្បីតស៊ូទាមទារឯករាជ្យពីអាណានិគមបារាំង។ តាមប្រវត្តិសាស្ត្រ បារាំងបានដាក់អាណានិគមគ្រប់គ្រងលើប្រទេសកម្ពុជា ចាប់តាំងពីឆ្នាំ១៨៦៣ រហូតដល់ថ្ងៃទី៩ ខែវិច្ឆិកា ឆ្នាំ១៩៥៣ ទើបប្រទេសបារាំងប្រកាសប្រគល់ឯករាជ្យពេញលេញដល់កម្ពុជាវិញ។ ការរំលឹកនេះបង្ហាញពីតម្លៃនៃសន្តិភាព និងឯករាជ្យដែលកម្ពុជាបានទទួលមកវិញយ៉ាងលំបាកលំបិន។
