By ខេត្តស្វាយរៀង ៖ មានករណីដ៏ភ្ញាក់ផ្អើលមួយបានកើតឡើងនៅសង្កាត់បាវិត ក្រុងបាវិត កាលពីល្ងាចថ្ងៃទី៨ ខែវិច្ឆិកា ឆ្នាំ២០២៥ ដែលបង្កឲ្យមានការភ្ញាក់ផ្អើលយ៉ាងខ្លាំងនៅក្នុងក្រុងទាំងមូល។ ហេតុការណ៍នេះបានកើតឡើងនៅវេលាម៉ោង ៥ និង ៣០ នាទីល្ងាច ដោយជនជាតិវៀតណាមរាប់រយនាក់បាននាំគ្នារត់ចេញពីអគារមួយកន្លែង ក្រោយពីមានជម្លោះបណ្ដាលឲ្យមានការវាយតប់គ្នាយ៉ាងកក្រើក។
សេចក្តីរាយការណ៍បឋមបានឲ្យដឹងថា ក្រុមជនជាតិវៀតណាមទាំងនោះ ខ្លះបានកាន់ដំបងនៅក្នុងដៃ រត់ចុះពីជាន់ទី១ មកដី ចំណែកឯអ្នកខ្លះទៀតដែលនៅជាន់ទី២ បានសម្រេចចិត្តលោតពីលើអគារចុះមកលើដំបូលផ្ទះដែលនៅជាប់គ្នា រួចបន្តលោតចុះមកដីដើម្បីគេចខ្លួនទាំងភ័យស្លន់ស្លោ។ 
តាមការបង្ហើបឲ្យដឹងពីអ្នកស្រុកដែលរស់នៅក្បែរកន្លែងកើតហេតុ បានរៀបរាប់ថា មុនពេលផ្ទុះអំពើហិង្សា គេបានឃើញជនបរទេសមួយក្រុមបានជិះរថយន្តចូលទៅចតនៅមុខអគារនោះ ហើយក៏នាំគ្នាដើរចូលទៅខាងក្នុង។ ប្រមាណជាកន្លះម៉ោងក្រោយមក ក៏ស្រាប់តែលេចឮសំឡេងឈ្លោះប្រកែកគ្នាយ៉ាងខ្លាំង រួចក៏ផ្ទុះការវាយតប់គ្នាតែម្តងរវាងក្រុមជនជាតិវៀតណាមទាំងនោះ ដោយខ្លះកាន់ដំបង ខ្លះដៃទទេ បង្កឲ្យមានការរត់ចែកជើងគ្នាពេញអគារ។ 
ប្រភពដដែលបានបន្ថែមទៀតថា ទីតាំងអគារដែលកើតហេតុនេះ ត្រូវបានគេសង្ស័យថាជាកន្លែងបង្កប់ល្បែងអនឡាញខុសច្បាប់ ហើយជម្លោះហិង្សាខាងលើនេះ ទំនងជាកើតចេញពីការមិនចុះសម្រុងគ្នាក្នុងចំណោមពួកគេ។ 
គិតត្រឹមម៉ោង ៧ យប់ ថ្ងៃទី៨ ខែវិច្ឆិកា អាជ្ញាធរមិនទាន់អាចរកការបំភ្លឺពីលោកអធិការក្រុងបាវិតបាននៅឡើយទេ។ ព័ត៌មានលម្អិតនឹងត្រូវផ្សាយជូននៅព្រឹកស្អែក។
