By ខេត្តស្វាយរៀង ៖ ហេតុការណ៍ភ្ញាក់ផ្អើលមួយបានកើតឡើង កាលពីយប់ថ្ងៃទី៧ វិច្ឆិកា ២០២៥ នៅចំណុចតូបលក់ផ្លែឈើមុខរោងចក្រ ហ្គីហ្គាស្វាយរៀង ស្ថិតក្នុងភូមិដើមពោធិ៍ ឃុំកណ្តៀងរាយ ស្រុកស្វាយទាប ខេត្តស្វាយរៀង ។ ក្នុងករណីនេះ ជនសង្ស័យចំនួន០២នាក់ បានធ្វើសកម្មភាពបន្លំលួចយកកាបូបលុយរបស់ស្ត្រីជាអ្នកលក់ផ្លែឈើម្នាក់ បណ្ដាលឲ្យបាត់បង់ប្រាក់ និងឯកសារសំខាន់មួយចំនួន។
តាមសម្ដីរបស់ស្ត្រីរងគ្រោះ បានរៀបរាប់ប្រាប់សមត្ថកិច្ចថា មុនពេលកើតហេតុ គាត់កំពុងរៀបចំបិទតូបដើម្បីត្រឡប់ទៅផ្ទះវិញ ។ ស្របពេលនោះ ក៏មានជនសង្ស័យ០២នាក់ ជិះម៉ូតូស្កុបពី ពណ៌ខ្មៅ ១គ្រឿង បានឈប់នៅលើផ្លូវជាតិលេខ១ ។ បន្ទាប់មក ជនសង្ស័យម្នាក់បានដើរចូលមកក្នុងតូបរបស់គាត់ រួចធ្វើជាសួររកទិញផ្លែស្វាយចំនួន ១គីឡូក្រាម ។
ខណៈរូបគាត់បានដើរទៅបើកឃ្លុបយកស្វាយមកលក់ឲ្យ ជនសង្ស័យក៏ឆ្លៀតឱកាសលួចយកកាបូបលុយ ដែលគាត់បានដាក់ទុកនៅលើតុខាងមុខដោយមិនបានប្រុងប្រយ័ត្ន ។ ភ្លាមៗនោះ ជនសង្ស័យក៏បានរត់ឡើងជិះម៉ូតូគេចខ្លួនបាត់ស្រមោលទៅតាមផ្លូវជាតិលេខ១ ឆ្ពោះទៅទិសខាងលិច ។
ស្ត្រីរងគ្រោះបានបន្តទៀតថា នៅក្នុងកាបូបលុយដែលចោរលួចយកទៅនោះមានប្រាក់ខ្មែរជិត ១លានរៀល ប្រាក់ដុល្លារ ១០០ដុល្លារ អត្តសញ្ញាណប័ណ្ណសញ្ជាតិខ្មែរ ១សន្លឹក និងកាតធនាគារ ១សន្លឹក ។ ទោះបីជាយ៉ាងណាក៏ដោយ សមត្ថកិច្ចមូលដ្ឋានកំពុងធ្វើការស្រាវជ្រាវ និងតាមប្រមាញ់ជនសង្ស័យដើម្បីនាំខ្លួនមកផ្ដន្ទាទោសតាមច្បាប់ ។
