By (គូឡាឡាំពួ)៖ អាជ្ញាធរដែនសមុទ្រម៉ាឡេស៊ី កាលពីថ្ងៃអាទិត្យ ទី៩ ខែវិច្ឆិកា បានថ្លែងឱ្យដឹងថា មនុស្សរាប់រយនាក់កំពុងបាត់ខ្លួន បន្ទាប់ពីទូកមួយគ្រឿងបានលិចនៅក្បែរព្រំដែនរវាងប្រទេសថៃ និងម៉ាឡេស៊ី។ ហេតុការណ៍ដ៏សោកសៅនេះបណ្ដាលឱ្យមនុស្សម្នាក់បាត់បង់ជីវិត និង១០នាក់ផ្សេងទៀតត្រូវបានជួយសង្គ្រោះទាន់ពេល។ នេះបើយោងតាមការចុះផ្សាយរបស់ទីភ្នាក់ងារសារព័ត៌មាន Reuters។
អាជ្ញាធរដែនសមុទ្រប្រចាំរដ្ឋ Kedah និង Perlis ភាគខាងជើងម៉ាឡេស៊ី បានបង្ហាញការព្រួយបារម្ភថា ជនរងគ្រោះជាច្រើននាក់ទៀតអាចនឹងត្រូវរកឃើញនៅឯសមុទ្រ បន្ទាប់ពីរយៈពេល ៣ថ្ងៃដែលទូកនោះបានលិច។ ទូកដែលបានចាកចេញពីទីក្រុង Buthidaung ប្រទេសមីយ៉ាន់ម៉ា គឺបានផ្ទុកមនុស្សជាង ៩០នាក់។ ក្នុងចំណោមអ្នកនៅរស់រានមានជីវិត ដែលត្រូវបានជួយសង្គ្រោះនៅតំបន់ដែនទឹកនៃប្រជុំកោះ Langkawi គឺមានបុរសជនជាតិមីយ៉ាន់ម៉ាចំនួន ៣នាក់ បុរសជនជាតិរ៉ូហ៊ីងយ៉ាចំនួន ២នាក់ និងបុរសជនជាតិបង់ក្លាដែសមួយនាក់។ ចំណែកសាកសពមនុស្សម្នាក់ដែលត្រូវបានស្រង់ចេញពីសមុទ្រ ត្រូវបានគេកំណត់អត្តសញ្ញាណថាជាស្ត្រីជនជាតិរ៉ូហ៊ីងយ៉ាម្នាក់។
គួររំលឹកថា ដំបូងឡើយ ក្រុមមនុស្សដែលមានបំណងធ្វើដំណើរចូលទៅក្នុងប្រទេសម៉ាឡេស៊ី បានជិះលើនាវាធំមួយគ្រឿង។ ប៉ុន្តែ នៅពេលធ្វើដំណើរជិតដល់ព្រំដែន ពួកគេត្រូវបានគេប្រាប់ឲ្យផ្លាស់ប្តូរទៅជិះលើទូកតូចៗចំនួន ៣គ្រឿងវិញ ដែលក្នុងចំណោមនោះ ទូកមួយគ្រឿងបានផ្ទុកមនុស្សជាង ១០០នាក់ ដើម្បីគេចវេសពីការចាប់អារម្មណ៍របស់អាជ្ញាធរ។ ចំណែកឯទូក ២គ្រឿងផ្សេងទៀត ដែលមានផ្ទុកមនុស្សប្រហាក់ប្រហែលគ្នានឹងទូកទីមួយ កំពុងតែបាត់ខ្លួននៅឡើយ៕
