By សារព័ត៌មាន Aljazeera បានរាយការណ៍កាលពីថ្ងៃអាទិត្យ ទី៩ ខែវិច្ឆិកា ថា ទូកមួយគ្រឿងដែលដឹកជនភៀសខ្លួនរ៉ូហ៊ីងយ៉ារាប់រយនាក់ រត់គេចពីប្រទេសមីយ៉ាន់ម៉ា បានក្រឡាប់លិចយ៉ាងអាណោចអាធ័មនៅក្បែរព្រំដែនសមុទ្រថៃ-ម៉ាឡេស៊ី។ ហេតុការណ៍ដ៏សោកសៅនេះបានបណ្តាលឱ្យមនុស្សយ៉ាងតិច ៧នាក់បាត់បង់ជីវិត ដែលក្នុងនោះមានស្ត្រី ៥នាក់ និងក្មេងស្រីម្នាក់ រីឯមនុស្សរាប់រយនាក់ទៀតកំពុងបាត់ខ្លួនយ៉ាងអាថ៌កំបាំង។
លោក Romli Mustafa ប្រធានទីភ្នាក់ងារអនុវត្តច្បាប់សមុទ្រម៉ាឡេស៊ី (MMEA) បានបញ្ជាក់ថា ក្រុមជួយសង្គ្រោះបានរកឃើញសាកសពចំនួន ៧នាក់រួចហើយនៅក្នុងតំបន់កើតហេតុ។ ទូកនោះត្រូវបានគេដឹងថាលិចនៅកោះ Ko Tarutao ក្នុងប្រទេសថៃ ដែលស្ថិតនៅភាគខាងជើងនៃកោះ Langkawi ប្រទេសម៉ាឡេស៊ី។ អ្វីដែលគួរឲ្យព្រួយបារម្ភនោះគឺ ទូកពីរគ្រឿងផ្សេងទៀតដែលដឹកមនុស្សប្រហែលគ្នានេះ ក៏ត្រូវបានគេរាយការណ៍ថាបានបាត់ខ្លួនដែរ។
បើតាមការរៀបរាប់ពីជនរងគ្រោះដែលនៅរស់រានមានជីវិត ពួកគេបានចេញដំណើរពីប្រទេសមីយ៉ាន់ម៉ាដោយជិះកប៉ាល់ធំមួយ ដែលផ្ទុកមនុស្សប្រមាណ ៣០០នាក់ ហើយបានអណ្ដែតលើផ្ទៃសមុទ្រអស់ជិតមួយខែ។ ជនរងគ្រោះខ្លះបានថ្លែងថា កប៉ាល់មេបានលិចរីឯអ្នកខ្លះទៀតបានប្រាប់ថា ក្រុមនេះត្រូវបានបែងចែកទៅជាទូកតូចៗចំនួនបី ហើយទូកមួយក្នុងចំណោមនោះបានជួបគ្រោះថ្នាក់។ 
លោក Adzli Abu Shah អធិការប៉ូលិសរដ្ឋ Kedah បានប្រាប់ប្រព័ន្ធផ្សព្វផ្សាយក្នុងស្រុកថា ប្រតិបត្តិការជួយសង្គ្រោះកំពុងបន្តយ៉ាងសកម្ម ដោយមានការគាំទ្រពីកម្លាំងអនុវត្តច្បាប់សមុទ្រម៉ាឡេស៊ី។ លោកបានសង្កត់ធ្ងន់ថា ប្រសិនបើទូកដែលលិចនោះពិតជាដឹកមនុស្ស ៣០០នាក់មែន នោះចំនួនមនុស្សដែលត្រូវបានរកឃើញរហូតមកដល់ពេលនេះ គឺនៅតែជាចំនួនដ៏តិចតួចបំផុតនៅឡើយ។
អស់រយៈពេលជាយូរមកហើយ ប្រទេសម៉ាឡេស៊ីបានក្លាយជាជម្រកសម្រាប់ជនអន្តោប្រវេសន៍ និងជនភៀសខ្លួនរាប់លាននាក់មកពីតំបន់ផ្សេងៗទៀតនៃទ្វីបអាស៊ី ដែលភាគច្រើនគ្មានឯកសារ ហើយធ្វើការក្នុងវិស័យជាច្រើនដូចជាសំណង់ និងកសិកម្មជាដើម។ ទោះជាយ៉ាងណា ការធ្វើដំណើរឆ្លងកាត់សមុទ្រតែងតែបង្កហានិភ័យខ្ពស់ និងនាំមកនូវសោកនាដកម្មជាច្រើន រួមទាំងការបាត់បង់ជីវិតរបស់មនុស្សជាង ២០នាក់ កាលពីខែធ្នូ ឆ្នាំ២០២១ នៅពេលដែលកប៉ាល់ចំណាកស្រុកមួយបានលិចនៅក្នុងដែនទឹកម៉ាឡេស៊ី។
