By ទីបំផុត! ព្រឹទ្ធសភាអាមេរិក កាលពីថ្ងៃអាទិត្យ ទី៩ ខែវិច្ឆិកា (ម៉ោងនៅសហរដ្ឋអាមេរិក) ត្រូវនឹងព្រឹកថ្ងៃចន្ទ (ម៉ោងនៅកម្ពុជា) បានបោះឆ្នោតអនុម័តដោយជោគជ័យលើកិច្ចព្រមព្រៀងមួយ ដែលនឹងឈានទៅដល់ការកំណត់វិធានការបើករដ្ឋាភិបាលសហព័ន្ធឡើងវិញ និងបញ្ចប់វិបត្តិបិទរដ្ឋាភិបាលសហព័ន្ធអាមេរិករយៈពេលជាង៤០ថ្ងៃ។ វិបត្តិនេះបានបង្កផលប៉ះពាល់ធ្ងន់ធ្ងរដល់បុគ្គលិករដ្ឋសហព័ន្ធ ការពន្យារពេលផ្តល់ជំនួយអាហារ និងបញ្ហាក្នុងការធ្វើដំណើរតាមផ្លូវអាកាសជាដើម។
សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត
ក្នុងកិច្ចព្រមព្រៀងដែលទទួលបានការយល់ព្រមនេះ សមាជិកព្រឹទ្ធសភាបានធ្វើវិសោធនកម្មច្បាប់អនុម័តដោយសភាតំណាងរាស្ត្រ ដើម្បីផ្តល់មូលនិធិដល់រដ្ឋាភិបាលរហូតដល់ថ្ងៃទី៣០ ខែមករា និងបានបញ្ចូលកញ្ចប់ច្បាប់ចំណាយពេញ៣ឆ្នាំតែម្តង សម្រាប់រដ្ឋបាលលោកប្រធានាធិបតី ដូណាល់ ត្រាំ។ រដ្ឋបាលលោកត្រាំបានរងសម្ពាធពីគណបក្សប្រជាធិបតេយ្យ ដោយសារតែការលុបចោលកញ្ចប់ថវិកាសុខភាពមួយចំនួន។
ទោះបីជាព្រឹទ្ធសភាបានអនុម័តច្បាប់នេះក្តី កញ្ចប់ចំណាយថវិការដ្ឋនេះនៅតែត្រូវឆ្លងកាត់ការអនុម័តពីសភាតំណាងរាស្ត្រជាមុនសិន បន្ទាប់មកត្រូវបញ្ជូនទៅលោកប្រធានាធិបតី ដូណាល់ ត្រាំ ដើម្បីចុះហត្ថលេខា។ ដំណើរការទាំងនេះអាចនឹងចំណាយពេលជាច្រើនថ្ងៃបន្ថែមទៀត។
យោងតាមការផ្សាយរបស់ទីភ្នាក់ងារព័ត៌មាន Reuters ដែលបានដកស្រង់សម្តីអ្នកចរចា បានឱ្យដឹងថា ក្រោមកិច្ចព្រមព្រៀងមួយដែលធ្វើឡើងជាមួយក្រុមតូចមួយនៃសមាជិកគណបក្សប្រជាធិបតេយ្យ (ដែលមិនយល់ស្របនឹងការដឹកនាំរបស់គណបក្សខ្លួន) គណបក្សសាធារណរដ្ឋបានយល់ព្រមបោះឆ្នោតនៅខែធ្នូខាងមុខ លើការបន្តឧបត្ថម្ភធនក្រោមច្បាប់ថែទាំសុខភាពដែលមានតម្លៃសមរម្យ។
ការឧបត្ថម្ភធនរបស់រដ្ឋាភិបាលសហព័ន្ធអាមេរិកនេះ គឺជាជំនួយដល់ប្រជាជនអាមេរិកដែលមានចំណូលទាប ក្នុងការចំណាយលើការធានារ៉ាប់រងសុខភាពឯកជន ហើយនឹងត្រូវផុតកំណត់នៅចុងឆ្នាំនេះ។ នេះជាអាទិភាពចម្បងរបស់គណបក្សប្រជាធិបតេយ្យក្នុងអំឡុងពេលប្រយុទ្ធគ្នាជាមួយលោកប្រធានាធិបតី ដូណាល់ ត្រាំ សម្រាប់ការផ្តល់មូលនិធិ។
ការបោះឆ្នោតជំរុញសេចក្តីព្រាងច្បាប់នេះបានអនុម័តដោយសំឡេង ៦០-៤០ ដែលជាចំនួនអប្បបរមាតម្រូវដោយរដ្ឋធម្មនុញ្ញដើម្បីសម្រេចបានជាការនៅក្នុងព្រឹទ្ធសភា។
