By ខេត្តពោធិ៍សាត់៖ លោក ខូយ រីដា អភិបាលខេត្តពោធិ៍សាត់ បានណែនាំយ៉ាងម៉ឺងម៉ាត់ដល់អាជ្ញាធរគ្រប់លំដាប់ថ្នាក់ ត្រូវដឹកនាំចលនាប្រជាពលរដ្ឋ ឱ្យចូលរួមយ៉ាងសកម្មក្នុងការរៀបចំសោភ័ណភាព សណ្តាប់ធ្នាប់ របៀបរៀបរយសាធារណៈ និងអនាម័យបរិស្ថាន។ ការណែនាំនេះ គឺដើម្បីប្រែក្លាយខេត្តពោធិ៍សាត់ ឱ្យក្លាយជាទីក្រុងស្អាត គ្មានសំរាម និងស្រស់បំព្រង ដែលជាយុទ្ធសាស្ត្រសំខាន់ក្នុងការទាក់ទាញភ្ញៀវទេសចរ ត្រៀមខ្លួនធ្វើជាម្ចាស់ផ្ទះក្នុងព្រឹត្តិការណ៍បុណ្យទន្លេនាឆ្នាំ២០២៦ ខាងមុខ។
ការណែនាំរបស់លោកអភិបាលខេត្ត ខូយ រីដា ធ្វើឡើងកាលពីព្រឹកថ្ងៃចន្ទ ទី១០ ខែវិច្ឆិកា ឆ្នាំ២០២៥ ក្នុងឱកាសដែលលោកអញ្ជើញបន្តចុះត្រួតពិនិត្យការរុះរើសំណង់មិនរៀបរយ នៅតាមបណ្តោយច្រាំងស្ទឹងត្រើយខាងកើត ចាប់ពីចំណុចស្ពានថ្មថ្មី រហូតដល់ស្ពានថ្មចាស់ ផ្លូវជាតិលេខ៥ ក្នុងក្រុងពោធិ៍សាត់។ ក្នុងដំណើរចុះពិនិត្យនេះ ក៏មានការចូលរួមពីលោក ញឹក បានខេង អភិបាលរងខេត្ត លោក អ៊ុយ សុធាវី អភិបាលរងខេត្ត រួមដំណើរជាមួយមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្ត រដ្ឋបាលសាលាក្រុងពោធិ៍សាត់ អាជ្ញាធរមូលដ្ឋាន មន្ត្រីពាក់ព័ន្ធ និងក្រុមការងារជាច្រើនរូបទៀត។
លោក ខូយ រីដា បានសង្កត់ធ្ងន់ថា យើងត្រូវតែកែប្រែ និងរៀបចំច្រាំងស្ទឹងនេះឡើងវិញ ឱ្យប្រែក្លាយជាសួនច្បារដ៏ស្រស់ស្អាត មានផ្កាចំរុះពណ៌ និងបំពាក់អំពូលភ្លើងបំភ្លឺ ដើម្បីជាប្រយោជន៍សំខាន់ៗចំនួន៣។ ទី១៖ ដើម្បីកែលំអរសោភ័ណភាពក្រុងឱ្យកាន់តែស្រស់បំព្រង។ ទី២៖ សម្រាប់បងប្អូនប្រជាពលរដ្ឋដែលរស់នៅតាមមាត់ស្ទឹង អាចដើរហាត់ប្រាណ និងអង្គុយលេងកម្សាន្តលំហែរកាយ។ ទី៣៖ ទាក់ទាញដល់អ្នកធ្វើដំណើរ ក៏ដូចជាភ្ញៀវទេសចរជាតិ និងអន្តរជាតិ ដែលធ្វើដំណើរឆ្លងកាត់លើស្ពានអាកាសផងដែរ។
លោកអភិបាលខេត្ត បានថ្លែងកោតសរសើរយ៉ាងខ្លាំងដល់បងប្អូនប្រជាពលរដ្ឋដែលរស់នៅតាមមាត់ស្ទឹង ទាំងខ្មែរ និងខ្មែរឥស្លាម ដែលបានសហការយ៉ាងល្អជាមួយអាជ្ញាធរ ក្នុងការជួយរុះរើសំណង់របស់ខ្លួន និងប្រគល់ដីមកឱ្យអាជ្ញាធរវិញតាមកិច្ចសន្យា។
លោកក៏បានអំពាវនាវដល់បងប្អូនប្រជាពលរដ្ឋដទៃទៀត ដែលកំពុងរស់នៅលើដីចំណីស្ទឹងក្នុងទីប្រជុំជនខេត្ត សូមមេត្តារុះរើដោយខ្លួនឯងជាបណ្តើរៗ ដើម្បីរួមចំណែកអភិវឌ្ឍន៍ខេត្តពោធិ៍សាត់របស់យើងឱ្យកាន់តែស្អាតទាំងអស់គ្នា។
ដោយមើលឃើញពីការខិតខំប្រឹងប្រែងអភិវឌ្ឍន៍ពីសំណាក់ឯកឧត្តម ខូយ រីដា អភិបាលនៃគណៈអភិបាលខេត្តពោធិ៍សាត់ និងក្រោយពីទទួលបានការជូនដំណឹងពីសំណាក់រដ្ឋបាលស្រុក ក្រុង និងអាជ្ញាធរមូលដ្ឋានរួចមក បងប្អូនប្រជាពលរដ្ឋដែលកន្លងមកតែងតែអាស្រ័យផល និងមានលំនៅឋានតាមមាត់ស្ទឹង បានស្ម័គ្រចិត្តចូលរួមសហការជាមួយអាជ្ញាធរ រុះរើសំណង់ចាកចេញទៅទទួលយកទីតាំងដីថ្មីដោយក្តីរីករាយ។
ប្រភព៖ រដ្ឋបាលខេត្តពោធិ៍សាត់
