By រាជធានីភ្នំពេញ ៖ កម្លាំងនគរបាលខណ្ឌពោធិ៍សែនជ័យ សហការជាមួយនគរបាលការិយាល័យព្រហ្មទណ្ឌនៃស្នងការដ្ឋាននគរបាលរាជធានីភ្នំពេញ បានស្រាវជ្រាវឃាត់ខ្លួនបុរសជនជាតិចិនម្នាក់ភ្លាមៗ ក្រោយពីជននេះបានធ្វើសកម្មភាពគាស់ផ្ទះលោកវេជ្ជបណ្ឌិតម្នាក់ និងបំបែកទូដែកលួចយកប្រាក់ និងគ្រឿងអលង្ការ សរុបជាទឹកប្រាក់រហូតដល់ ១១២ ៤៥០ដុល្លារអាមេរិក ដោយគេចខ្លួនបានតែ២ថ្ងៃប៉ុណ្ណោះ។
ជនសង្ស័យមានឈ្មោះ ចាង ទៀន វៃ(Zhang Dian Wei) ភេទប្រុស អាយុ៣៧ឆ្នាំ ជនជាតិចិន កាន់លិខិតឆ្លងដែនលេខ EP2843056 មុខរបរលក់បាយ ស្នាក់នៅផ្ទះលេខ៣៣ ផ្លូវ១១៣K ភូមិត្រពាំងជ្រៃ សង្កាត់កាកាបទី២ ខណ្ឌពោធិ៍សែនជ័យ រាជធានីភ្នំពេញ។ ចំណែកជនរងគ្រោះឈ្មោះ ឥន សម្ភាវិត ភេទប្រុស អាយុ៥៦ឆ្នាំ ជាវេជ្ជបណ្ឌិត មានទីលំនៅបច្ចុប្បន្នផ្ទះលេខ៣៥ បុរីជីបម៉ុងលែន ពោធិ៍ចិនតុង ផ្លូវ១១៣K ភូមិត្រពាំងជ្រៃ សង្កាត់កាកាបទី២ ខណ្ឌពោធិ៍សែនជ័យ រាជធានីភ្នំពេញ។
លោកវរសេនីយ៍ឯក ម៉ន វុធី អធិការនគរបាលខណ្ឌពោធិ៍សែនជ័យបានឲ្យដឹងថា កាលពីថ្ងៃទី០៤ ខែវិច្ឆិកា ឆ្នាំ២០២៥ ក្រុមគ្រួសារជនរងគ្រោះបានធ្វើដំណើរទៅកម្សាន្តនៅខេត្តមណ្ឌលគីរី និងបានសម្រាកនៅទីនោះមួយយប់។ លុះនៅវេលាម៉ោងប្រហែល៤និង៣០នាទីព្រឹក ថ្ងៃទី០៥ខែវិច្ឆិកា ឆ្នាំ២០២៥ ទើបក្រុមគ្រួសារជនរងគ្រោះត្រឡប់មកដល់ផ្ទះវិញ ស្រាប់តែឃើញទ្វារផ្ទះបើកចំហរ។ ក្រោយពីពិនិត្យ ពួកគាត់ក៏ដឹងថា ផ្ទះរបស់ខ្លួនត្រូវចោររើរុះ និងទូដែកដែលទុកគ្រឿងអលង្ការផ្សេងៗ ត្រូវបានគាស់បំបែកយកលុយ និងសម្ភារៈក្នុងទូដែកទាំងអស់។
លោកវរសេនីយ៍ឯក ម៉ន វុធី បានបន្តថា ជនសង្ស័យបានលួចយកប្រាក់ដុល្លារប្រហែល ៤៥ ០០០ដុល្លារ ចិញ្ចៀនពេជ្រ៣វង់តម្លៃ១១ ៥០០ដុល្លារ ខ្សែដៃពេជ្រ២ខ្សែតម្លៃ ១១ ០០០ដុល្លារ ខ្សែដៃមាស២ខ្សែ(ទម្ងន់១តម្លឹង) តម្លៃ ៥ ៥០០ដុល្លារ ខ្សែកមាស៤ខ្សែ (ទម្ងន់១តម្លឹងកន្លះ)តម្លៃ ៨ ២៥០ដុល្លារ ខ្សែកផ្លាទីន២ខ្សែ(ទម្ងន់៤តម្លឹង) តម្លៃ ១៦ ០០០ដុល្លារ ចិញ្ចៀនមាស១វង់(ទម្ងន់៥ជី) តម្លៃ ២ ៣០០ដុល្លារ ចិញ្ចៀនផ្លាទីន៣វង់(ទម្ងន់៨ជី) តម្លៃ ២ ៥០០ដុល្លារ ចិញ្ចៀនត្បូងទន្ទឹម១វង់ តម្លៃ ៦០០ដុល្លារ កងដៃមាស១វង់ តម្លៃ ២ ៣០០ដុល្លារ ក្រវិលពេជ្រ១គូ តម្លៃ ៥ ៥០០ដុល្លារ និងកងដៃផ្លាទីន២វង់ តម្លៃ ២ ០០០ដុល្លារ។ សរុបទាំងអស់គឺចំនួន ១១២ ៤៥០ដុល្លារ។
លោកអធិការបានបញ្ជាក់ទៀតថា ក្រោយកើតហេតុ ជនរងគ្រោះបានមកដាក់ពាក្យបណ្ដឹងនៅប៉ុស្តិ៍នគរបាលរដ្ឋបាលកាកាបទី២។ ដោយអនុវត្តតាមបទបញ្ជាផ្ទាល់ពីឯកឧត្តមឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ នៅថ្ងៃទី០៧ ខែវិច្ឆិកា ឆ្នាំ២០២៥ វេលាម៉ោងប្រហែល ០៩និង៣០នាទី កម្លាំងនគរបាលខណ្ឌពោធិ៍សែនជ័យ ដឹកនាំដោយលោកវរសេនីយ៍ឯក ម៉ន វុធី អធិការ បានសហការជាមួយនគរបាលការិយាល័យព្រហ្មទណ្ឌនៃស្នងការដ្ឋាននគរបាលរាជធានីភ្នំពេញ រួមជាមួយលោកនាយប៉ុស្តិ៍ បានធ្វើការស្រាវជ្រាវឈានទៅឃាត់ខ្លួនជនសង្ស័យជាជនជាតិចិនខាងលើ ដែលស្នាក់នៅជាប់ផ្ទះគ្នាតែម្តង។
នៅចំពោះមុខសមត្ថកិច្ច ជនសង្ស័យបានសារភាពថា ខ្លួនពិតជាបានធ្វើសកម្មភាពវាយបំបែកកញ្ចក់ទ្វារខាងក្រោយផ្ទះរបស់ជនរងគ្រោះ ហើយចូលលួចសម្ភារៈ និងគ្រឿងអលង្ការពិតប្រាកដមែន។ ក្នុងនោះ សមត្ថកិច្ចបាននាំខ្លួនជនសង្ស័យទៅចង្អុលបង្ហាញពីទីតាំងដែលយកសម្ភារៈដែលលួចបានទៅលាក់ទុកនៅក្នុងផ្ទះ រួមនឹងវត្ថុតាងមួយចំនួនផ្សេងទៀត ដែលជនសង្ស័យប្រើប្រាស់ធ្វើសកម្មភាព និងបានយកទៅចោលនៅចំណុចដីឡូត៍មួយកន្លែង ស្ថិតក្នុងភូមិត្រពាំងជ្រៃ សង្កាត់កាកាបទី២ ខណ្ឌពោធិ៍សែនជ័យ រាជធានីភ្នំពេញ។
បច្ចុប្បន្នជនសង្ស័យ រួមទាំងវត្ថុតាង ត្រូវបានកម្លាំងជំនាញនគរបាលយុត្តិធម៌នៃអធិការដ្ឋាននគរបាលខណ្ឌពោធិ៍សែនជ័យ កសាងសំណុំរឿងបញ្ជូនទៅតុលាការដើម្បីអនុវត្តន៍តាមនីតិវិធីហើយ។
ចាប់បានចោរចិនគាស់ផ្ទះវេជ្ជបណ្ឌិតប្លន់អស់ជាង ១១ម៉ឺនដុល្លារ ក្រោយគេចខ្លួនបានតែ២ថ្ងៃ!
