ឧត្តមសេនីយ៍ទោ សោម ស៊ុន ផ្សព្វផ្សាយសភាពការណ៍ថ្មីៗ និងជំរុញភារកិច្ចការពារជាតិ រួមទាំងការកែសម្រួលអាវុធធុនធ្ងន់នៅតាមព្រំដែន

នៅព្រឹកថ្ងៃទី១០ ខែវិច្ឆិកា ឆ្នាំ២០២៥ ទីបញ្ជាការតំបន់ប្រតិបត្តិការសឹករងកំពង់ធំ (យោធភូមិភាគទី៤) បានរៀបចំកិច្ចប្រជុំដ៏មានសារៈសំខាន់មួយ ក្រោមអធិបតីភាពដ៏ខ្ពង់ខ្ពស់របស់ ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ។ កិច្ចប្រជុំនេះមានគោលបំណងផ្សព្វផ្សាយសភាពការណ៍ថ្មីៗ ពង្រឹងតួនាទី និងភារកិច្ចស្នូលរបស់កងយោធពលខេមរភូមិន្ទ ព្រមទាំងប្រគល់ភារកិច្ចចាំបាច់មួយចំនួនទៀតជូនដល់កងកម្លាំងចំណុះទាំងអស់។

ក្នុងកិច្ចប្រជុំនេះ ឧត្តមសេនីយ៍ទោ សោម ស៊ុន បានធ្វើការផ្សព្វផ្សាយយ៉ាងក្បោះក្បាយអំពីបច្ចុប្បន្នភាពនៃសភាពការណ៍នានា ជាពិសេសគឺការកែសម្រួលអាវុធធន់ធ្ងន់របស់កងទ័ពកម្ពុជា និងថៃ នៅតាមបណ្តោយខ្សែបន្ទាត់ព្រំដែន។ ការកែសម្រួលនេះ គឺអនុវត្តទៅតាមសេចក្តីថ្លែងការណ៍រួមស្តីពីសន្តិភាពយូរអង្វែងរវាងប្រទេសទាំងពីរ ដែលត្រូវបានចុះហត្ថលេខានៅទីក្រុងកូឡាឡាំពួរ ប្រទេសម៉ាឡេស៊ី។ ពិធីចុះហត្ថលេខាប្រវត្តិសាស្ត្រនេះ គឺស្ថិតក្រោមអធិបតីភាពដ៏ខ្ពង់ខ្ពស់របស់ឯកឧត្តម ដូណាល់ ត្រាំ អតីតប្រធានាធិបតីសហរដ្ឋអាមេរិក និងក្រោមការសម្របសម្រួលពីឯកឧត្តម អាន់វ៉ា អ៊ីប្រាហ៊ីម នាយករដ្ឋមន្ត្រីម៉ាឡេស៊ី ដែលជាប្រធានអាស៊ានប្តូរវេនកាលពីពេលនោះ។

ឧត្តមសេនីយ៍ទោ សោម ស៊ុន ក៏បានគូសបញ្ជាក់ផងដែរអំពីកិច្ចខិតខំប្រឹងប្រែងដោយអត់ធ្មត់ និងភាពស្ងៀមស្ងាត់ប្រកបដោយប្រាជ្ញារបស់ សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា និងសម្តេចមហាបវរអធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ក្នុងការនាំមកនូវសន្តិភាពយូរអង្វែងសម្រាប់ប្រជាជនកម្ពុជាទាំងមូល។ កិច្ចខិតខំប្រឹងប្រែងទាំងនេះ បានលេចចេញជារូបរាង និងទទួលបានការស្វាគមន៍យ៉ាងកក់ក្តៅពីមជ្ឈដ្ឋានអន្តរជាតិ ក៏ដូចជាការអបអរសាទរពីប្រជាជនកម្ពុជាទូទាំងប្រទេស។

ក្នុងឱកាសនោះដែរ ឧត្តមសេនីយ៍ទោ សោម ស៊ុន បានថ្លែងអំណរគុណយ៉ាងជ្រាលជ្រៅចំពោះនាយទាហាន នាយទាហានរង និងពលទាហានទាំងអស់ ដែលបានបំពេញភារកិច្ចប្រកបដោយស្មារតីទទួលខុសត្រូវខ្ពស់ និងបានអនុវត្តយ៉ាងម៉ឺងម៉ាត់តាមបទបញ្ជារបស់ថ្នាក់ដឹកនាំកងយោធពលខេមរភូមិន្ទ ក៏ដូចជាការណែនាំរបស់ឯកឧត្តមអភិបាលខេត្ត ប្រធានគណៈបញ្ជាការឯកភាពរដ្ឋបាលខេត្ត។ ការខិតខំប្រឹងប្រែងនេះ បានរួមចំណែកយ៉ាងសំខាន់ក្នុងការគ្រប់គ្រងកងកម្លាំង មធ្យោបាយ និងគ្រឿងបំពាក់ ដើម្បីការពារបូរណភាពទឹកដី។ ជាមួយគ្នានេះ កងកម្លាំងក៏បានសហការយ៉ាងសកម្មជាមួយកងកម្លាំងប្រដាប់អាវុធទាំងបី និងអាជ្ញាធរដែនដីគ្រប់លំដាប់ថ្នាក់ ក្នុងការអនុវត្តគោលនយោបាយភូមិ ឃុំ សង្កាត់ មានសុវត្ថិភាព ដោយក្លាយជាកម្លាំងស្នូលក្នុងការបង្ក្រាបបទល្មើសធនធានធម្មជាតិក្នុងភូមិសាស្ត្រខេត្ត ប្រកបដោយប្រសិទ្ធភាពគួរជាទីមោទនៈ។ ជាក់ស្តែង ឆ្នាំនេះផលត្រីបានសំបូរឡើងវិញ ដែលធ្វើឱ្យប្រជាពលរដ្ឋមានការសប្បាយរីករាយ និងអបអរសាទរយ៉ាងខ្លាំងចំពោះកងទ័ពដែលបានបង្ក្រាបបទល្មើសនេសាទទទួលបានជោគជ័យ។

ជាចុងក្រោយ ឧត្តមសេនីយ៍ទោ សោម ស៊ុន ក៏បានប្រគល់ភារកិច្ចបន្ថែមជូនដល់នាយទាហាន នាយទាហានរង និងពលទាហានទាំងអស់ ត្រូវបន្តពង្រឹងតួនាទី និងភារកិច្ចរបស់ខ្លួន ក្នុងការការពារបូរណភាពទឹកដីឱ្យបានរឹងមាំ។ ទន្ទឹមនឹងនេះ ត្រូវបន្តសកម្មភាពបង្ក្រាបបទល្មើសព្រៃឈើ ការកាប់ទន្ទ្រានដីរដ្ឋ និងបទល្មើសនេសាទ ឱ្យកាន់តែមានប្រសិទ្ធភាពខ្ពស់បំផុត ដើម្បីបុព្វហេតុសង្គមជាតិ និងបម្រើផលប្រយោជន៍ជូនប្រជាជនកម្ពុជាទូទាំងប្រទេស។