🚨បាងកកប្រឈមទឹកជំនន់ធ្ងន់ធ្ងរ! ទំនប់ចៅប្រាយ៉ាបង្ខំរំដោះទឹកមហាសាល ក្នុង២ថ្ងៃទៀត!

រាជធានីបាងកក ប្រទេសថៃ ត្រូវបានគេព្យាករណ៍ថានឹងប្រឈមមុខនឹងទឹកជំនន់ធ្ងន់ធ្ងរក្នុងរយៈពេលតែពីរថ្ងៃទៀតប៉ុណ្ណោះ បន្ទាប់ពីទំនប់ចៅប្រាយ៉ា (Chao Phraya) ត្រូវបានបង្ខំចិត្តរំដោះទឹកចេញក្នុងបរិមាណដ៏ច្រើន។ នេះបើយោងតាមការចុះផ្សាយរបស់កាសែត The Nation កាលពីថ្ងៃចន្ទ ទី១០ ខែវិច្ឆិកា ឆ្នាំ២០២៥។

ដោយសារតែសមត្ថភាពផ្ទុកទឹករបស់ទំនប់ចៅប្រាយ៉ាបានឈានដល់កម្រិតកំណត់ អាជ្ញាធរត្រូវបង្ខំចិត្តរំដោះទឹកក្នុងអត្រា ២ ៨០០ ម៉ែត្រគូបក្នុងមួយវិនាទី។ ទឹកដ៏ច្រើនសន្ធឹកសន្ធាប់នេះ ត្រូវបានគេរំពឹងថានឹងហូរទៅដល់រាជធានីបាងកកក្នុងរយៈពេល២ថ្ងៃខាងមុខ ដែលបង្កហានិភ័យខ្ពស់នៃគ្រោះទឹកជំនន់ធ្ងន់ធ្ងរ។

កម្រិតទឹកបានកើនឡើងគួរឱ្យកត់សម្គាល់ក្នុងប៉ុន្មានសប្តាហ៍ចុងក្រោយនេះ ដោយសារតែឥទ្ធិពលនៃព្យុះជាបន្តបន្ទាប់ និងភ្លៀងធ្លាក់មិនឈប់ឈរ។ មិនត្រឹមតែបាងកកប៉ុណ្ណោះទេ ខេត្តភាគខាងជើងជាច្រើនទៀតដូចជា Phrae, Nan, Chiang Rai, Sukhothai និង Lampang ក៏បាននិងកំពុងរងគ្រោះដោយសារទឹកជំនន់ធ្ងន់ធ្ងរផងដែរ។

ទំនប់ធំៗចំនួន៣ផ្សេងទៀតរបស់ប្រទេសថៃក៏កំពុងស្តុកទឹកជិតដល់កម្រិតពេញផងដែរ រួមមាន ទំនប់ Bhumibol (៩៩%), Sirikit (៩៨%) និង Pa Sak Jolasid (៩៧%)។ ចំណែកឯទំនប់ Khwae Noi វិញ បានផ្ទុកទឹកលើសកម្រិតទៅហើយ ពោលគឺ ១០១%។

ពាក់ព័ន្ធនឹងការរំដោះទឹកពីទំនប់ចៅប្រាយ៉ានេះដែរ កាលពីថ្ងៃសៅរ៍ កន្លងទៅ ខេត្តចំនួន៧ របស់ប្រទេសថៃ រួមមាន Chainat, Singburi, Ang Thong, Suphanburi, Phra Nakhon Si Ayutthaya, Saraburi និង Pathum Thani បានប្រកាសអាសន្នទឹកជំនន់កម្រិតក្រហមរួចជាស្រេច ដែលជាកម្រិតធ្ងន់ធ្ងរបំផុត ដោយសារតែការរំពឹងទុកនៃការទម្លាយទឹកយ៉ាងគំហុកពីទំនប់។