By រាជធានីភ្នំពេញ ៖ រដ្ឋបាលខណ្ឌកំបូលបានបន្តពង្រឹងការងាររៀបចំសណ្តាប់ធ្នាប់សាធារណៈ និងសោភ័ណភាពមូលដ្ឋាន ដោយបានចុះត្រួតពិនិត្យ និងណែនាំដោយផ្ទាល់ដល់បងប្អូនប្រជាពលរដ្ឋ និងអាជីវករដែលបានសាងសង់សំណង់រំលោភលើចំណីផ្លូវសាធារណៈ។
ជាក់ស្តែង នៅថ្ងៃទី១០ ខែវិច្ឆិកា ឆ្នាំ២០២៥នេះ លោក ទ្រី ណារ៉េត អភិបាលរងនៃគណ:អភិបាលខណ្ឌកំបូល បានដឹកនាំមន្ត្រីជំនាញ សន្តិសុខសណ្ដាប់ធ្នាប់ខណ្ឌ និងអាជ្ញាធរសង្កាត់ ចុះធ្វើការណែនាំដល់ប្រជាពលរដ្ឋ និងអាជីវករលក់ដូរតាមបណ្ដោយផ្លូវជាតិលេខ៣ ស្ថិតក្នុងភូមិសាស្ត្រខណ្ឌកំបូល។ គោលបំណងគឺដើម្បីតម្រូវឱ្យពួកគាត់ធ្វើការរុះរើសំណង់ដែលរំលោភលើចំណីផ្លូវសាធារណៈ ដោយដកគម្លាតពីចិញ្ចើមផ្លូវឱ្យបានត្រឹមត្រូវចំនួន៨ម៉ែត្រ។
គោលដៅចម្បងនៃការចុះអនុវត្តវិធានការដ៏ម៉ឺងម៉ាត់នេះ គឺតម្រូវឱ្យម្ចាស់សំណង់ ឬទីតាំងលក់ដូរទាំងឡាយណា ដែលបានកាន់កាប់ ឬសាងសង់រំលោភលើដីចំណីផ្លូវសាធារណៈត្រូវធ្វើការរុះរើដោយស្ម័គ្រចិត្ត និងអនុវត្តតាមបទបញ្ជារបស់អាជ្ញាធរ។
ជាពិសេស អាជ្ញាធរបានណែនាំយ៉ាងច្បាស់លាស់ដល់ប្រជាពលរដ្ឋ និងអាជីវករ ឱ្យរុះរើ និងដកគម្លាតចេញពីចិញ្ចើមផ្លូវសាធារណៈឱ្យបានត្រឹមត្រូវ ក្នុងចម្ងាយ ៨ម៉ែត្រ ដើម្បីធានាថា ផ្លូវជាតិលេខ៣ អាចដំណើរការបានពេញលេញ ផ្តល់ភាពងាយស្រួល និងសុវត្ថិភាពខ្ពស់សម្រាប់ការធ្វើចរាចរណ៍សាធារណៈទូទៅ។
សកម្មភាពនេះសបញ្ជាក់ឱ្យឃើញពីការប្ដេជ្ញាចិត្តខ្ពស់របស់រដ្ឋបាលខណ្ឌកំបូល ក្នុងការអនុវត្តច្បាប់ និងរក្សាវិន័យសង្គម ដើម្បីផលប្រយោជន៍រួមរបស់ប្រជាពលរដ្ឋ និងសោភ័ណភាពរាជធានីភ្នំពេញទាំងមូល ៕
