By ខេត្តកំពង់ចាម៖ ហេតុការណ៍ដ៏គួរឲ្យរន្ធត់មួយបានកើតឡើងនៅស្រុកព្រៃឈរ ខេត្តកំពង់ចាម កាលពីព្រឹកថ្ងៃទី៨ ខែវិច្ឆិកា ឆ្នាំ២០២៥ ដោយបុរសជាកូនចិត្តខ្មៅម្នាក់បានប្រើអំពើហិង្សាយ៉ាងឃោរឃៅ កាប់ម្ដាយបង្កើតរបស់ខ្លួនជាច្រើនកាំបិតបណ្ដាលឲ្យរងរបួសធ្ងន់ ហូរឈាមស្រោចពេញខ្លួនប្រាណ។ ជនសង្ស័យត្រូវបានកម្លាំងសមត្ថកិច្ចមូលដ្ឋានចុះទៅអន្តរាគមន៍ និងឃាត់ខ្លួនភ្លាមៗ រួមជាមួយវត្ថុតាងជាកាំបិតប៉័ងតោផងដែរ។
យោងតាមរបាយការណ៍របស់សមត្ថកិច្ច បានឲ្យដឹងថា មុនពេលកើតហេតុ ឈ្មោះ ធី ឃី ភេទប្រុស អាយុ ៤១ឆ្នាំ ជាជនសង្ស័យបានជិះម៉ូតូពីផ្ទះរបស់ខ្លួនចម្ងាយប្រមាណជាង ១,០០០ម៉ែត្រ ឆ្ពោះមកផ្ទះម្ដាយបង្កើតរបស់ខ្លួន គឺលោកយាយ នួន សុខុម អាយុ ៧១ឆ្នាំ ដែលរស់នៅភូមិត្រពាំងបឹង ឃុំថ្មពូន ស្រុកព្រៃឈរ។
ពេលទៅដល់ផ្ទះម្ដាយ ជនសង្ស័យបានឃើញក្មួយប្រុសតូចអាយុ ៥ឆ្នាំ កំពុងចុចទូរស័ព្ទដៃ ក៏កើតកំហឹងទះកំផ្លៀងក្មួយមួយដៃយ៉ាងខ្លាំង បណ្ដាលឲ្យក្មួយស្រែកយំ។ ឃើញសកម្មភាពនេះ លោកយាយ នួន សុខុម ជាម្ដាយក៏បានស្ដីបន្ទោសកូនថា «ឯងម្ដេចធ្វើអញ្ចឹង គ្នានៅតូចណាស់»។
ដោយសារតែពាក្យស្ដីបន្ទោសបន្តិចបន្តួចនេះ ឈ្មោះ ធី ឃី បានផ្ទុះកំហឹងយ៉ាងខ្លាំង ហើយបានស្ទុះទៅទាញយកកាំបិតប៉័ងតោពណ៌ខ្មៅមួយដើមពីចង្ក្រានបាយក្រោមផ្ទះ រួចធ្វើការកាប់ប្រហារទៅលើម្ដាយបង្កើតរបស់ខ្លួនជាច្រើនកាំបិត បណ្ដាលឲ្យរងរបួសជាទម្ងន់ត្រង់ក្បាល និងលើរាងកាយតែម្ដង។
ភ្លាមៗនោះ អ្នកជិតខាងដែលឮសំឡេងឆោឡោក៏បានរាយការណ៍ទៅប៉ុស្តិ៍រដ្ឋបាលមូលដ្ឋាន ដើម្បីសុំអន្តរាគមន៍។ កម្លាំងសមត្ថកិច្ចបានចុះទៅដល់ទីតាំងកើតហេតុ និងបានឃាត់ខ្លួនជនសង្ស័យឈ្មោះ ធី ឃី ជាបន្ទាន់។
បច្ចុប្បន្ន លោកយាយ នួន សុខុម ត្រូវបានសមាជិកក្រុមគ្រួសារបញ្ជូនទៅសង្គ្រោះនៅមន្ទីរពេទ្យបង្អែកស្រុកព្រៃឈរ ចំណែកឯបុរសជាកូនចិត្តឃោរឃៅរូបនេះវិញ ត្រូវបានកសាងសំណុំរឿងបញ្ជូនទៅកាន់ស្នងការដ្ឋាននគរបាលខេត្តកំពង់ចាម ដើម្បីចាត់ការបន្តទៅតាមនីតិវិធីច្បាប់។
