By សភាអ៊ីស្រាអែលបានធ្វើការបោះឆ្នោតបឋមមួយ ដើម្បីឈានទៅដល់ការអនុម័តច្បាប់ថ្មីមួយ ដែលនឹងបើកផ្លូវឲ្យមានការកាត់ទោសប្រហារជីវិតចំពោះជនណាដែលត្រូវបានចោទប្រកាន់ថាបានសម្លាប់ពលរដ្ឋអ៊ីស្រាអែលក្នុងអំពើវាយប្រហារភេរវកម្ម។
យោងតាមសារព័ត៌មាន The Telegraph ចេញផ្សាយកាលពីថ្ងៃពុធថា សេចក្តីព្រាងច្បាប់នេះដែលស្នើឡើងដោយសមាជិកសភាស្តាំនិយមជ្រុល ត្រូវបានអនុម័តក្នុងការបោះឆ្នោតលើកដំបូងក្នុងរដ្ឋសភាអ៊ីស្រាអែលកាលពីថ្ងៃចន្ទកន្លងទៅ ដោយទទួលបានសំឡេងគាំទ្រ៣៩ទល់នឹង១៦។ នាយករដ្ឋមន្ត្រីអ៊ីស្រាអែលលោក បេនចាមីន ណេតាន់យ៉ាហ៊ូ បានបង្ហាញការគាំទ្រយ៉ាងពេញទំហឹង ខណៈរដ្ឋមន្ត្រីសន្តិសុខជាតិលោក Itamar Ben-Gvir បានគំរាមដកគណបក្សរបស់លោកចេញពីក្រុមចម្រុះ ប្រសិនបើច្បាប់នេះមិនត្រូវបានអនុម័តបន្ត។
ប្រសិនបើច្បាប់នេះត្រូវបានអនុម័តពេញលេញ នោះតុលាការយោធានៅតំបន់ West Bank នឹងមានភាពងាយស្រួលក្នុងការកាត់ទោសប្រហារជីវិតសមាជិកក្រុមសកម្មប្រយុទ្ធហាម៉ាស-ប៉ាឡេស្ទីន។ ចៅក្រមនឹងអាចសម្រេចដោយសំឡេងភាគច្រើនធម្មតា ដោយមិនចាំបាច់ទាមទារការសម្រេចជាឯកច្ឆ័ន្ទដូចមុនឡើយ។
តាមពិតទៅ ទោសប្រហារជីវិតមានចែងក្នុងច្បាប់អ៊ីស្រាអែលអស់ជាច្រើនទសវត្សរ៍មកហើយ ប៉ុន្តែត្រូវបានប្រើប្រាស់តែម្ដងគត់ក្នុងឆ្នាំ១៩៦២ ដើម្បីប្រហារជីវិតឧក្រិដ្ឋជនសង្គ្រាមណាស៊ីលោក Adolf Eichmann។
ក្រុមអ្នកគាំទ្រច្បាប់ថ្មីនេះអះអាងថា វានឹងដើរតួជាការរារាំងដល់អំពើភេរវកម្ម។ សមាជិកសភាលោកស្រី Limor Son Har-Melech ដែលជាអ្នកស្នើច្បាប់នេះ និងដែលស្វាមីរបស់លោកស្រីត្រូវបានសម្លាប់ក្នុងការវាយប្រហារភេរវកម្មឆ្នាំ២០០៣ បានបញ្ជាក់ថា «លែងមានគុកទៀតហើយ លែងមានកិច្ចព្រមព្រៀងទៀតហើយ លែងមានការកាត់ទោសព្យួរទៀតហើយ។ នៅពេលដែលភេរវករម្នាក់ស្លាប់ គេមិនអាចត្រឡប់ទៅសម្លាប់នរណាម្នាក់ផ្សេងទៀតឡើយ»។
លោក Ben-Gvir ដែលមកពីគណបក្សស្តាំនិយមជ្រុល Otzma Yehudit ហើយគាំទ្រសេចក្តីព្រាងច្បាប់នេះ បានថ្លែងថា ច្បាប់នេះនឹងផ្តោតសំខាន់លើ «អំពើភេរវកម្មអារ៉ាប់»។ យ៉ាងណាមិញ ក្រុមអ្នករិះគន់បានលើកឡើងថា ច្បាប់នេះមានភាពអយុត្តិធម៌ចំពោះប៉ាឡេស្ទីន ខណៈដែលវាមិនត្រូវបានអនុវត្តចំពោះជនជាតិអ៊ីស្រាអែលដែលបានសម្លាប់ជនជាតិប៉ាឡេស្ទីននោះឡើយ។
សមាជិកសភាបក្សប្រឆាំង និងមន្ត្រីសន្តិសុខជាច្រើនបានព្រមានថា វិធានការនេះអាចធ្វើឲ្យអំពើហិង្សាកាន់តែអាក្រក់ ហើយប៉ះពាល់ដល់កេរ្តិ៍ឈ្មោះរបស់អ៊ីស្រាអែលនៅលើឆាកអន្តរជាតិ។
សេចក្តីព្រាងច្បាប់នេះនៅត្រូវការការបោះឆ្នោតពីរលើកទៀត មុននឹងអាចក្លាយជាច្បាប់ពេញលេញ។
