By ប្រធានាធិបតីសហរដ្ឋអាមេរិក លោក ដូណាល់ ត្រាំ បានថ្លែងកាលពីថ្ងៃចន្ទ ទី១០ ខែវិច្ឆិកា ថា ប្រទេសអាមេរិកនឹងប្រឈមនឹងមហន្តរាយសេដ្ឋកិច្ច និងបញ្ហាសន្តិសុខជាតិ ប្រសិនបើតុលាការកំពូលសម្រេចប្រឆាំងនឹងវិធានការពន្ធគយលើទំនិញនាំចូលរបស់លោក។ ព័ត៌មាននេះ ត្រូវបានចុះផ្សាយដោយទីភ្នាក់ងារសារព័ត៌មានរ៉យទ័រ។
ការលើកឡើងនេះ ធ្វើឡើងបន្ទាប់ពីលោក ត្រាំ កាលពីថ្ងៃអាទិត្យ បានប្ដេជ្ញាផ្ដល់ប្រាក់ ២ ០០០ ដុល្លារក្នុងម្នាក់ៗ ទៅឲ្យពលរដ្ឋអាមេរិកដែលមានប្រាក់ចំណូលទាប និងមធ្យម ដោយប្រើប្រាស់ថវិកាដែលបានមកពីការប្រមូលពន្ធគយ។ លើសពីនេះ ប្រាក់ចំណូលដូចគ្នា ក៏នឹងត្រូវប្រើប្រាស់ដើម្បីកាត់បន្ថយបំណុលជាតិរបស់អាមេរិកផងដែរ។
ក្នុងអំឡុងពេលជជែកវែកញែកផ្ទាល់មាត់កាលពីសប្តាហ៍មុន លើសំណុំរឿងពន្ធគយនេះ ចៅក្រមតុលាការកំពូលបានពិភាក្សាអំពីសិទ្ធិអំណាចរបស់លោក ត្រាំ ក្នុងការដាក់ពន្ធគយក្រោមច្បាប់អំណាចសេដ្ឋកិច្ចបន្ទាន់អន្តរជាតិឆ្នាំ ១៩៧៧ (IEEPA) ដែលមិនបានចែងជាក់លាក់អំពីពន្ធគយឡើយ។ ប្រសិនបើតុលាការសម្រេចថាការដាក់ពន្ធរបស់លោក ត្រាំ គឺខុសច្បាប់ នោះរដ្ឋបាលអាមេរិកអាចនឹងត្រូវសងប្រាក់ត្រឡប់ទៅក្រុមហ៊ុននាំចូលវិញ ដែលបានបង់ពន្ធខ្ពស់ថ្មីនាពេលកន្លងមក។
លោកស្រីចៅក្រម Amy Coney Barrett បានព្រមានថា វាអាចជា«ការរញ៉េរញ៉ៃ» មួយសម្រាប់តុលាការក្នុងការដោះស្រាយរឿងសងប្រាក់ទៅវិញទៅមកនេះ សម្រាប់អ្នកនាំចូលអាមេរិកដែលបានបង់ពន្ធរួចហើយ។ គិតមកដល់ពេលនេះ តុលាការកំពូលអាមេរិកមិនទាន់សម្រេចនៅឡើយទេ ខណៈរ៉យទ័ររាយការណ៍ថា បើលោក ត្រាំ ចាញ់ នោះក្រុមហ៊ុនអាមេរិកអាចនឹងទទួលសំណងសរុបជាង ១០០ ប៊ីលានដុល្លារមកវិញ។
លោក ត្រាំ បានច្រានចោលរបាយការណ៍តួលេខដែលត្រូវសងត្រឡប់ទៅវិញនេះថា មិនត្រឹមត្រូវទេ ព្រោះលោកអះអាងថា ចំណូលពីពន្ធគយ និងការវិនិយោគមានចំនួនលើសពី ២ ទ្រីលានដុល្លារ។ លោកបានថ្លែងយ៉ាងដូច្នេះថា៖ «វានឹងមានគ្រោះមហន្តរាយសេដ្ឋកិច្ច។ វានឹងក្លាយជាគ្រោះមហន្តរាយសន្តិសុខជាតិ ប្រសិនបើយើងចាញ់ក្ដីនៅតុលាការកំពូល»។
