By អ្នកគាំទ្របាល់ទាត់ដែលមានសំបុត្រទស្សនាព្រឹត្តិការណ៍ World Cup ឆ្នាំក្រោយ អាចនឹងត្រូវត្រៀមលុយច្រើនបន្តិច សម្រាប់ការចំណាយទៅលើកន្លែងចតរថយន្តរបស់ពួកគេ។ បើតាមគេហទំព័រផ្លូវការរបស់ FIFA តម្លៃចតឡានមួយកន្លែងអាចឡើងដល់ ១៧៥ ដុល្លារឯណោះ។
តួលេខដ៏គួរឱ្យភ្ញាក់ផ្អើលនេះ ត្រូវបានរាយការណ៍ដំបូងដោយសារព័ត៌មាន Athletic ដែលបានធ្វើឱ្យអ្នកគាំទ្រកីឡានៅសហរដ្ឋអាមេរិក មានការរិះគន់យ៉ាងខ្លាំង។ ជាក់ស្តែង សហរដ្ឋអាមេរិក គឺជាប្រទេសមួយក្នុងចំណោមប្រទេសម្ចាស់ផ្ទះទាំងបី រួមជាមួយកាណាដា និងម៉ិកស៊ិក ដែលភាគច្រើនពឹងផ្អែកលើការធ្វើដំណើរដោយរថយន្តផ្ទាល់ខ្លួន។
កាលពីថ្ងៃអង្គារ តម្លៃសម្រាប់ “កន្លែងចតរថយន្តទូទៅ” សម្រាប់ការប្រកួតវគ្គពាក់កណ្តាលផ្តាច់ព្រ័ត្រ នៅទីក្រុង Dallas ថ្ងៃទី ១៤ ខែកក្កដា ត្រូវបានកំណត់ ១៧៥ ដុល្លារ ខណៈការប្រកួតតាមពូល មានតម្លៃត្រឹម ៧៥ ដុល្លារប៉ុណ្ណោះ។
ចំណែកឯការប្រកួតវគ្គ ១/៤ ផ្តាច់ព្រ័ត្រនៅទីក្រុង Kansas នៅថ្ងៃទី ១១ ខែកក្កដា ថ្លៃចតឡានត្រូវបានកំណត់ ១២៥ ដុល្លារ ខណៈវគ្គចែកពូលនៅតែ ៧៥ ដុល្លារដដែល។
FIFA បានប្រើប្រាស់ប្រព័ន្ធកំណត់តម្លៃតាមតម្រូវការ (dynamic pricing) សម្រាប់ការលក់សំបុត្រដំណាក់កាលទី ១ ដែលកៅអីតាមពូលចាប់ផ្តើមពី ៦០ ដុល្លារ។ គិតត្រឹមថ្ងៃអង្គារ កន្លែងប្រកួត World Cup ទាំង ១៦ នៅកាណាដា ម៉ិកស៊ិក និងសហរដ្ឋអាមេរិក មានតែមួយចំនួនតូចប៉ុណ្ណោះដែលមានសំបុត្រចំណតចុះបញ្ជីលក់តាមអនឡាញ។
ទីក្រុងម៉ិកស៊ិក ដែលនឹងធ្វើជាម្ចាស់ផ្ទះការប្រកួតដំបូង និងញូវយ៉ក/ញូវជឺស៊ី ដែលជាទីតាំងប្រកួតវគ្គផ្តាច់ព្រ័ត្រ នៅមិនទាន់មានសំបុត្រចំណតនៅឡើយទេ។ គួរបញ្ជាក់ថា FIFA បានទទួលពាក្យសុំទិញសំបុត្រពីអ្នកគាំទ្រជាង ១.៥ លាននាក់ ក្នុងរយៈពេលត្រឹម ២៤ ម៉ោង បន្ទាប់ពីការចាប់ផ្តើមបើកលក់មុនកាលពីខែកញ្ញា សម្រាប់ការប្រកួតបាល់ទាត់ពិភពលោក។
