By ហាណូយ៖ ឧបនាយករដ្ឋមន្ត្រីវៀតណាម លោក ប៊ូយ ថាញ់ សឺន (Bui Thanh Son) បានសម្តែងក្ដីរំពឹងយ៉ាងមុតមាំកាលពីថ្ងៃពុធថា ប្រទេសវៀតណាមនឹងចុះហត្ថលេខាជាផ្លូវការលើ «កិច្ចព្រមព្រៀងពាណិជ្ជកម្មបដិការ» ជាមួយសហរដ្ឋអាមេរិកក្នុងពេលឆាប់ៗនេះ។ ការលើកឡើងនេះកើតឡើងចំពេលដែលការចរចាជុំថ្មីកំពុងប្រព្រឹត្តទៅយ៉ាងសកម្មនៅទីក្រុងវ៉ាស៊ីនតោនឌីស៊ី។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។
ថ្លែងក្នុងកិច្ចប្រជុំកំពូលធុរកិច្ចអាមេរិក-វៀតណាមដែលប្រារព្ធធ្វើឡើងនៅទីក្រុងហាណូយ លោក សឺន បានសង្កត់ធ្ងន់ថា៖ «មានតែការជឿទុកចិត្តប៉ុណ្ណោះ ទើបអាចនាំទៅរកកិច្ចសហប្រតិបត្តិការ ហើយមានតែកិច្ចសហប្រតិបត្តិការប៉ុណ្ណោះ ទើបអាចនាំទៅរកវិបុលភាព។ វៀតណាមតែងតែស្វែងរកការជំរុញកិច្ចសហប្រតិបត្តិការជាមួយសហរដ្ឋអាមេរិក»។ សាររបស់លោកបានឆ្លុះបញ្ចាំងពីបំណងដ៏ច្បាស់លាស់ក្នុងការពង្រឹងចំណងសេដ្ឋកិច្ចរវាងប្រទេសទាំងពីរ។
គួររំលឹកថា កាលពីខែតុលាកន្លងទៅ អំឡុងកិច្ចប្រជុំកំពូលអាស៊ាន ភាគីទាំងពីរបានព្រមព្រៀងគ្នាបញ្ចប់កិច្ចព្រមព្រៀងពាណិជ្ជកម្មក្រោមលក្ខខណ្ឌចម្រុះ រួមមានការដាក់ពន្ធ២០% លើទំនិញវៀតណាម និងការលើកលែងពន្ធលើទំនិញមួយចំនួនផងដែរ។
បន្ថែមពីនេះ ក្នុងកិច្ចប្រជុំកាលពីថ្ងៃពុធ លោកឧបនាយករដ្ឋមន្ត្រី សឺន ក៏បានអំពាវនាវដល់សហគមន៍ធុរកិច្ចអាមេរិកឱ្យគាំទ្រដំណើរទស្សនកិច្ចរបស់មេដឹកនាំវៀតណាម លោក To Lam ទៅកាន់សហរដ្ឋអាមេរិក។ ជាមួយគ្នានេះ លោកក៏បានលើកទឹកចិត្តទីក្រុងវ៉ាស៊ីនតោនឱ្យទទួលស្គាល់វៀតណាមជា «ប្រទេសសេដ្ឋកិច្ចទីផ្សារ» ដើម្បីផ្តល់ភាពងាយស្រួលបន្ថែមទៀតដល់ទំនាក់ទំនងពាណិជ្ជកម្មទ្វេភាគី៕
