By រាជធានីភ្នំពេញ ៖ ក្រសួងបរិស្ថានបានរកឃើញរោងចក្រកាត់ដេរមួយកន្លែងនៅខេត្តតាកែវ កំពុងបំពុលបរិស្ថានយ៉ាងធ្ងន់ធ្ងរ ដោយការដុតកាកសំណល់ខុសច្បាប់ បញ្ចេញផ្សែងខ្មៅស្អុយគគ្រក់ ប៉ះពាល់សុខភាពប្រជាពលរដ្ឋក្នុងមូលដ្ឋាន។ ហេតុការណ៍នេះត្រូវបានក្រុមការងារអធិការកិច្ចនៃអគ្គនាយកដ្ឋានគាំពារបរិស្ថាន សហការជាមួយមន្ទីរបរិស្ថានខេត្តតាកែវ និងអាជ្ញាធរមូលដ្ឋានចុះពិនិត្យរកឃើញកាលពីថ្ងៃទី១០ ខែវិច្ឆិកា ឆ្នាំ២០២៥។
រោងចក្រកាត់ដេរ Perfect Vision Fashion (Cambodia) Co., Ltd ដែលមានទីតាំងស្ថិតនៅភូមិកំប៉ោ ឃុំបឹងត្រាញ់ខាងត្បូង ស្រុកសំរោង ខេត្តតាកែវ ត្រូវបានរកឃើញថា បានដុតកម្ទេចក្រណាត់ និងប្រេងម៉ាស៊ូត លាយជាមួយអុសសម្រាប់ក្នុងឡរបស់ខ្លួន ដែលបណ្តាលឲ្យមានផ្សែងខ្មៅហុយទ្រលោម និងក្លិនឈ្ងៀមយ៉ាងខ្លាំង រំខានដល់ការរស់នៅប្រចាំថ្ងៃរបស់ប្រជាពលរដ្ឋជាច្រើនគ្រួសារនៅជុំវិញ។
ទង្វើនេះគឺជាការបំពានយ៉ាងធ្ងន់ធ្ងរទៅលើច្បាប់បរិស្ថាន ដោយបានល្មើសនឹងមាត្រា ១៦១ និងមាត្រា ៦៩៤ នៃក្រមបរិស្ថាន និងធនធានធម្មជាតិ។ លើសពីនេះ រោងចក្រខាងលើក៏ពុំបានរៀបចំរបាយការណ៍អង្កេតតាមដានបរិស្ថានក្នុងរយៈពេល៦ខែម្តង ដូចមានចែងក្នុងកិច្ចសន្យាការពារបរិស្ថាននោះទេ ដែលជាការល្មើសនឹងមាត្រា ៦៩៤ នៃក្រមបរិស្ថាន និងធនធានធម្មជាតិដដែល។
ដើម្បីដោះស្រាយបញ្ហានេះ ក្រសួងបរិស្ថានបានដាក់ចេញនូវវិធានការតឹងរ៉ឹងជាបន្ទាន់ទៅលើក្រុមហ៊ុន។ ក្នុងនោះ ក្រុមហ៊ុនត្រូវបានតម្រូវឲ្យបញ្ឈប់ជាបន្ទាន់នូវរាល់សកម្មភាពដុតកម្ទេចក្រណាត់ក្នុងឡរបស់ខ្លួន។
ជាមួយគ្នានេះ ក្រសួងក៏បានតម្រូវឲ្យរោងចក្ររៀបចំតបំពង់ផ្សែងឡឲ្យបានខ្ពស់ផុតពីដីថែមទៀត ដើម្បីធានាថាផ្សែងនឹងមិនហុយធ្លាក់ទៅលើលំនៅឋានរបស់ប្រជាពលរដ្ឋទៀតឡើយ។ លើសពីនេះ ក្រុមហ៊ុនក៏ត្រូវបានបង្គាប់ឲ្យរៀបចំរបាយការណ៍អង្កេតតាមដានបរិស្ថានទៅតាមការកំណត់របស់ក្រសួង។
ក្រុមហ៊ុននឹងត្រូវរងពិន័យអន្តរការណ៍ស្របតាមមាត្រា ៨២៦ នៃក្រមបរិស្ថាន និងធនធានធម្មជាតិ ចំពោះការមិនគោរពច្បាប់ដែលបានកំណត់។
ក្រសួងបរិស្ថានបានឆ្លៀតឱកាសនេះ ថ្លែងអំណរគុណយ៉ាងជ្រាលជ្រៅដល់បណ្តារោងចក្រ សហគ្រាស និងក្រុមហ៊ុនទាំងឡាយណា ដែលបានគោរពច្បាប់បរិស្ថានបានត្រឹមត្រូវ ព្រមទាំងបានអរគុណដល់ប្រជាពលរដ្ឋ ក៏ដូចជាអ្នកសារព័ត៌មាន ដែលបានចូលរួមរាយការណ៍ពីករណីបំពុលបរិស្ថាននៅកម្ពុជា។
ជាចុងក្រោយ ក្រសួងបរិស្ថានបានធ្វើការអំពាវនាវដល់សាធារណជនទាំងអស់ ឲ្យបន្តចូលរួមសាមគ្គីគ្នាថែមទៀត ដើម្បីទប់ស្កាត់រាល់ការបំពុលដី បំពុលទឹក និងបំពុលខ្យល់ ដើម្បីកសាងកម្ពុជាមួយដែលមានភាពស្អាត ធានាសុខភាពល្អសម្រាប់ប្រជាពលរដ្ឋ និងបរិស្ថាន ព្រមទាំងលើកកម្ពស់កិត្តិយសកម្ពុជាលើឆាកអន្តរជាតិ ដើម្បីទាក់ទាញភ្ញៀវទេសចរណ៍ និងអ្នកវិនិយោគមកកម្ពុជាឲ្យបានកាន់តែច្រើនថែមទៀត។
រោងចក្រកាត់ដេរនៅតាកែវ បំពុលបរិស្ថាន! ក្រសួងរកឃើញការដុតសំណល់ខុសច្បាប់
