By ភ្នំពេញ៖ លោកស្រី ចម និម្មល រដ្ឋមន្ត្រីក្រសួងពាណិជ្ជកម្ម និងជាប្រធានគណៈកម្មាធិការប្រកួតប្រជែងកម្ពុជា (គ.ប.ក.) រួមជាមួយលោក Samuel Chan ប្រធានគណៈកម្មាធិការប្រកួតប្រជែងនៃតំបន់រដ្ឋបាលពិសេសហុងកុង (HKCC) នៃសាធារណរដ្ឋប្រជាមានិតចិន បានអញ្ជើញជាអធិបតីក្នុងពិធីចុះហត្ថលេខាលើអនុស្សរណៈនៃការយោគយល់គ្នា (MoU) ដើម្បីពង្រឹងការអនុវត្តគោលនយោបាយ និងច្បាប់ស្តីពីការប្រកួតប្រជែង។ ពិធីនេះបានប្រព្រឹត្តទៅនាព្រឹកថ្ងៃពុធ ទី១២ ខែវិច្ឆិកា ឆ្នាំ២០២៥ នៅទីស្តីការក្រសួងពាណិជ្ជកម្ម។
អនុស្សរណៈនៃការយោគយល់គ្នារវាងភាគីទាំងពីរនេះ គឺការបង្កើតក្របខ័ណ្ឌផ្លូវការសម្រាប់កិច្ចសហប្រតិបត្តិការរវាងគណៈកម្មាធិការទាំងពីរ ដោយផ្តោតលើការផ្លាស់ប្តូរព័ត៌មាន កិច្ចសហការលើការងារបច្ចេកទេស និងការកសាងសមត្ថភាពមន្ត្រី។ គោលបំណងចម្បងគឺដើម្បីពង្រឹងការអនុវត្តច្បាប់ស្តីពីការប្រកួតប្រជែង ប្រកបដោយប្រសិទ្ធភាពនៅក្នុងដែនសមត្ថកិច្ចនៃភាគីទាំងពីរ។
ថ្លែងក្នុងសុន្ទរកថាបើក លោកស្រីរដ្ឋមន្ត្រី ចម និម្មល បានគូសបញ្ជាក់យ៉ាងច្បាស់ពីសារៈសំខាន់នៃកិច្ចសហប្រតិបត្តិការ ការចែករំលែកចំណេះដឹង និងការគាំទ្រគ្នាទៅវិញទៅមកក្នុងចំណោមស្ថាប័នប្រកួតប្រជែង។ លោកស្រីបន្តថា អនុស្សរណៈនៃការយោគយល់គ្នានេះ គឺជាការឆ្លុះបញ្ចាំងពីចក្ខុវិស័យ និងការប្តេជ្ញាចិត្តយ៉ាងមុតមាំ ក្នុងគោលដៅពង្រឹងសមត្ថភាពស្ថាប័នឱ្យស្របតាមឧត្តមានុវត្តល្អៗរបស់អន្តរជាតិ។
លោកស្រីរដ្ឋមន្ត្រី បានសង្កត់ធ្ងន់បន្ថែមថា “ពុំមានអាជ្ញាធរ ឬស្ថាប័នប្រកួតប្រជែងណា ដែលអាចសម្រេចបានជោគជ័យដោយពុំមានកិច្ចសហការរវាងគ្នានឹងគ្នាឡើយ”។ សម្ដីនេះបង្ហាញពីការទទួលស្គាល់យ៉ាងច្បាស់លាស់ពីតួនាទីស្នូលនៃភាពជាដៃគូ។
លោកស្រីរដ្ឋមន្ត្រី ក៏បានបន្តទៀតថា ភាពជាដៃគូសហការនេះ នឹងជួយពង្រឹងកិច្ចសហប្រតិបត្តិការលើកកម្ពស់ភាពស៊ីសង្វាក់គ្នាក្នុងការអនុវត្តច្បាប់ និងជួយឱ្យស្ថាប័នទាំងពីរជៀសវាងពីសកម្មភាពត្រួតស៊ីគ្នាក្នុងករណីបទល្មើសឆ្លងដែន។
ជាមួយគ្នានេះ លោកស្រីរដ្ឋមន្ត្រី បានកត់សម្គាល់ផងដែរថា ការប្រកួតប្រជែងដើរតួនាទីយ៉ាងសំខាន់ក្នុងការជំរុញកំណើនសេដ្ឋកិច្ចប្រកបដោយចីរភាព តាមរយៈការជំរុញការច្នៃប្រឌិត ប្រសិទ្ធភាព និងសុខុមាលភាពសម្រាប់អ្នកប្រើប្រាស់។
មុននឹងបញ្ចប់ លោកស្រីរដ្ឋមន្ត្រី បានសន្និដ្ឋានដោយទំនុកចិត្តថា កិច្ចសហការនេះ នឹងដើរតួជាមូលដ្ឋានគ្រឹះដ៏រឹងមាំសម្រាប់កិច្ចសហប្រតិបត្តិការយូរអង្វែងរវាងកម្ពុជា និងហុងកុង។
កិច្ចសហការនេះនឹងជំរុញការប្រកួតប្រជែងដោយយុត្តិធម៌ និងស្មើភាព ក៏ដូចជារួមចំណែកដល់កិច្ចខិតខំប្រឹងប្រែងជាសកលកាន់តែទូលំទូលាយ ក្នុងការលើកកម្ពស់ទីផ្សារសេរី និងមានតម្លាភាព។
ការចុះអនុស្សរណៈនេះ គឺជាជំហានដ៏សំខាន់មួយក្នុងការកសាងបរិយាកាសអាជីវកម្មដែលមានលក្ខណៈប្រកួតប្រជែង និងយុត្តិធម៌សម្រាប់ទាំងអស់គ្នា។
ដោយ៖ តារា
