Lamine Yamal ត្រូវបានដកឈ្មោះចេញពីក្រុមជម្រើសជាតិអេស្ប៉ាញ កាលពីថ្ងៃអង្គារ ដើម្បីត្រៀមប្រកួតជម្រុះ World Cup ទល់នឹងហ្សកហ្ស៊ី និងតួកគី បន្ទាប់ពីមានបញ្ហារបួសក្រលៀនឡើងវិញ ដែលបង្កឲ្យមានការរិះគន់ពីសហព័ន្ធបាល់ទាត់អេស្ប៉ាញ (RFEF)។ 
RFEF បានឲ្យដឹងថា ខ្សែបម្រើស្លាបវ័យ ១៨ ឆ្នាំរបស់ក្លឹប Barcelona រូបនេះ ដែលធ្លាប់អវត្តមាន ៥ ប្រកួតសម្រាប់ក្លឹបរបស់គេក្នុងលីគ LaLiga ដោយសារបញ្ហានេះ បានជួបបញ្ហាដដែលម្ដងទៀត កាលពីថ្ងៃច័ន្ទ ក្នុងពេលហ្វឹកហាត់របស់ក្រុមជម្រើសជាតិអេស្ប៉ាញ។ សេចក្ដីថ្លែងការណ៍របស់ RFEF បានបញ្ជាក់ថា៖ «នីតិវិធីនេះត្រូវបានអនុវត្តដោយគ្មានការជូនដំណឹងជាមុនដល់បុគ្គលិកពេទ្យរបស់ក្រុមជម្រើសជាតិ ដែលទើបតែបានដឹងពីព័ត៌មានលម្អិតតាមរយៈរបាយការណ៍ដែលទទួលបាននៅម៉ោង ១០:៤០ យប់ម្សិលមិញ ដែលបង្ហាញពីអនុសាសន៍វេជ្ជសាស្ត្រសម្រាប់ការសម្រាក ៧-១០ ថ្ងៃ»។ RFEF បន្ថែមថា៖ «ដោយមើលឃើញពីស្ថានភាពនេះ និងផ្ដល់អាទិភាពដល់សុខភាព សុវត្ថិភាព និងសុខុមាលភាពរបស់កីឡាករគ្រប់ពេលវេលា សហព័ន្ធកីឡាបាល់ទាត់អេស្ប៉ាញបានសម្រេចចិត្តដោះលែងកីឡាករចេញពីក្រុមបច្ចុប្បន្ន»។ លោក Luis de la Fuente អ្នកចាត់ការទូទៅរបស់ក្រុមជម្រើសជាតិអេស្ប៉ាញ បានលើកឡើងថា ស្ថានភាពនេះគឺជារឿងដែលលោកមិនធ្លាប់ជួបប្រទះពីមុនមកទេ។ Yamal បានបង្ហាញខ្លួនឲ្យក្រុមជម្រើសជាតិបាន ២៣ ប្រកួត រកបាន ៦ គ្រាប់ និងបញ្ជូនបាល់ឲ្យមិត្តរួមក្រុមស៊ុតបញ្ចូលទីបាន ៦ លើក ក្នុងចំណោម ១១ ប្រកួតរដូវកាលនេះសម្រាប់ Barcelona។ បច្ចុប្បន្ន អេស្ប៉ាញកំពុងឈរកំពូលតារាងពូល E ដោយមាន ១២ ពិន្ទុពី ៤ ប្រកួត ដោយស៊ុតបញ្ចូលទីបាន ១៥ គ្រាប់ និងមិនទាន់របូតមួយគ្រាប់ឡើយ។ ពួកគេនឹងប៉ះហ្សកហ្ស៊ី នៅថ្ងៃសៅរ៍នៅទីក្រុង Tbilisi មុននឹងធ្វើជាម្ចាស់ផ្ទះទទួលតួកគី នៅថ្ងៃអង្គារក្នុងទីក្រុង Seville។ អេស្ប៉ាញនឹងមានសិទ្ធិឡើងទៅវគ្គផ្ដាច់ព្រ័ត្រ ប្រសិនបើពួកគេយកឈ្នះហ្សកហ្ស៊ី ហើយតួកគីមិនឈ្នះប៊ុលហ្គារី ឬប្រសិនបើពួកគេស្មើ ហើយតួកគីចាញ់។
By 
