By ព្យុះទីហ្វុង Fung-wong បានវាយប្រហារឆ្នេរភាគខាងកើតកោះតៃវ៉ាន់កាលពីថ្ងៃអង្គារ ទី១១ ខែវិច្ឆិកា ឆ្នាំ២០២៥ ដោយបាននាំមកនូវភ្លៀងធ្លាក់យ៉ាងខ្លាំង និងទឹកជំនន់យ៉ាងធ្ងន់ធ្ងរ បណ្ដាលឲ្យអាជ្ញាធរត្រូវជម្លៀសប្រជាពលរដ្ឋជាង ៨ ៣០០នាក់ទៅកាន់ទីទួលសុវត្ថិភាព។
ព្យុះនេះដែលធ្លាប់បានសម្លាប់មនុស្ស ១៨នាក់នៅប្រទេសហ្វីលីពីនរួចមកហើយនោះ បានបង្កឲ្យមានទឹកជំនន់យ៉ាងគំហុកនៅតំបន់មួយចំនួននៃទីក្រុង Yilan ជាទីដែលកងទ័ពត្រូវបានដាក់ពង្រាយដើម្បីជួយសង្គ្រោះអ្នកស្រុកដែលជាប់គាំង។
អ្នកនេសាទម្នាក់ឈ្មោះ Hung Chun-yi មកពីទីក្រុងកំពង់ផែ Suao ភាគខាងកើត បានរៀបរាប់ប្រាប់ទីភ្នាក់ងារ Reuters ថា៖ «ទឹកបានហូរចូលមកយ៉ាងលឿន។ ភ្លៀងធ្លាក់ខ្លាំងពេក ហើយលឿនពេក រហូតដល់ប្រព័ន្ធលូមិនអាចទប់ទល់បាន»។
អាជ្ញាធរបានប្រកាសថា មនុស្សយ៉ាងតិច ៥១នាក់បានរងរបួស។ អាជីវកម្ម និងសាលារៀនត្រូវបានបិទនៅទូទាំងភាគខាងត្បូងកោះតៃវ៉ាន់ ដោយសារតែភ្លៀងធ្លាក់ខ្លាំងបានបង្កឲ្យមានទឹកជំនន់ភ្លាមៗ និងការរអិលបាក់ដី។
យោងតាមមន្ត្រីឧតុនិយម ទីប្រជុំជន Dongshan នៃតំបន់ Yilan បានកត់ត្រាទឹកភ្លៀងជិត ៨០០មីលីម៉ែត្រកាលពីថ្ងៃអង្គារ។ រដ្ឋបាលអាកាសធាតុកណ្តាលបានឲ្យដឹងថា ព្យុះ Fung-wong ត្រូវបានគេរំពឹងថានឹងរំកិលឆ្លងកាត់ចុងភាគខាងត្បូងនៃកោះតៃវ៉ាន់ មុនពេលបន្តដំណើរទៅកាន់មហាសមុទ្រប៉ាស៊ីហ្វិកនៅរសៀលថ្ងៃពុធនេះ។
ជាការប្រុងប្រយ័ត្ន ប្រជាពលរដ្ឋជាង ៣ ០០០នាក់នៅតំបន់ Hualien ដែលធ្លាប់រងគ្រោះទឹកជំនន់យ៉ាងធ្ងន់ធ្ងរពីព្យុះទីហ្វុងកាលពីខែកញ្ញានោះ ត្រូវបានផ្លាស់ប្ដូរទីលំនៅទៅកន្លែងសុវត្ថិភាព។ ទោះជាយ៉ាងណា ទីក្រុង Hsinchu ភាគខាងជើង ដែលជាទីតាំងរបស់ក្រុមហ៊ុនផលិតបន្ទះឈីបដ៏ធំបំផុតលើពិភពលោក TSMC ត្រូវបានគេរំពឹងថានឹងមិនរងផលប៉ះពាល់ឡើយ។
