សោកនាដកម្មព្រំដែន! ពលរដ្ឋខ្មែរ ១នាក់ស្លាប់ ៣នាក់របួស ក្នុងហេតុការណ៍ទាហានថៃបាញ់ប្រហារនៅបន្ទាយមានជ័យ

ខេត្តបន្ទាយមានជ័យ៖ កម្ពុជាទទួលរងសោកនាដកម្មដ៏រន្ធត់មួយនៅតាមបណ្តោយព្រំដែនកម្ពុជា-ថៃ ខណៈដែលកម្លាំងទាហានថៃបានបាញ់ប្រហារយ៉ាងព្រៃផ្សៃមកលើពលរដ្ឋខ្មែរគ្មានអាវុធ បណ្តាលឱ្យមនុស្សម្នាក់ស្លាប់បាត់បង់ជីវិត និងបីនាក់ផ្សេងទៀតរងរបួសធ្ងន់ស្រាល។ ហេតុការណ៍ដ៏គួរឱ្យតក់ស្លុតនេះបានកើតឡើងនៅវេលាម៉ោង ១៥:៥០ នាទីល្ងាច ថ្ងៃទី១២ ខែវិច្ឆិកា ឆ្នាំ២០២៥ នៅក្នុងភូមិព្រៃចាន់ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ ដែលជាដែនអធិបតេយ្យភាពពេញលេញនៃព្រះរាជាណាចក្រកម្ពុជា។ ប្រជាពលរដ្ឋរងគ្រោះកំពុងស្នាក់នៅក្នុងជម្រកកៅស៊ូតង់ ត្រូវបានក្រុមទាហានថៃប្រើកាំភ្លើង RPD បាញ់ស្រោចមកលើតែម្តង។

អ្នកនាំពាក្យរដ្ឋបាលខេត្តបន្ទាយមានជ័យ បានចេញសេចក្តីថ្លែងការណ៍ថ្កោលទោសយ៉ាងដាច់អហង្ការចំពោះទង្វើអមនុស្សធម៌ និងសាហាវឃោរឃៅនេះ។ ការបាញ់ប្រហារនេះ គឺជាការរំលោភបំពានយ៉ាងធ្ងន់ធ្ងរទៅលើ “សេចក្តីថ្លែងការណ៍រួមស្តីពីកិច្ចព្រមព្រៀងសន្តិភាពរវាងកម្ពុជា និងថៃ” ដែលភាគីទាំងពីរបានចុះហត្ថលេខាកាលពីថ្ងៃទី២៦ ខែតុលា ឆ្នាំ២០២៥។ កិច្ចព្រមព្រៀងដ៏សំខាន់នេះ ត្រូវបានចុះហត្ថលេខាដោយនាយករដ្ឋមន្ត្រីនៃប្រទេសកម្ពុជា និងថៃ ក្រោមវត្តមានជាសាក្សីដ៏ខ្ពង់ខ្ពស់របស់ឯកឧត្តម ដូណាល់ ត្រាំ ប្រធានាធិបតីសហរដ្ឋអាម៉េរិក និងឯកឧត្តម អាន់វ៉ា អ៊ីប្រាហ៊ីម នាយករដ្ឋមន្ត្រីម៉ាឡេស៊ី ព្រមទាំងជាប្រធានអាស៊ាន។

អ្នកនាំពាក្យបានសង្កត់ធ្ងន់ថា រដ្ឋបាលខេត្តបន្ទាយមានជ័យនៅតែប្រកាន់ខ្ជាប់នូវជំហរគោរពតាមអ្វីដែលជាការព្រមព្រៀងគ្នារវាងប្រទេសទាំងពីរ ដោយរក្សាស្ថានភាពដដែលរហូតដល់ការងារខណ្ឌសីមាព្រំដែនគោកត្រូវបានបញ្ចប់ទាំងស្រុង។ គោលបំណងនេះ គឺដើម្បីបន្ធូរបន្ថយភាពតានតឹង និងរង់ចាំដំណោះស្រាយប្រកបដោយយុត្តិធម៌ពីគណៈកម្មការចម្រុះព្រំដែន (JBC)។ រដ្ឋបាលខេត្តក៏បានអំពាវនាវដល់សាធារណៈជនជាតិ និងអន្តរជាតិ មេត្តាជ្រាបជាព័ត៌មាន និងចូលរួមតាមដានករណីនេះដោយយកចិត្តទុកដាក់។