By ប្រទេសបារាំង៖ បេសកកម្មដ៏អស្ចារ្យរបស់អ្នកប្រដាល់គុនខ្មែរ៣រូបនៅទឹកដីបារាំងកាលពីថ្ងៃទី៩ ខែវិច្ឆិកា ឆ្នាំ២០២៥ បានធ្វើឲ្យមហាជនអ្នកតាមដានវិស័យកីឡាប្រដាល់ទាំងក្នុងនិងក្រៅប្រទេសផ្ទុះការភ្ញាក់ផ្អើលយ៉ាងខ្លាំង។ កីឡាករទាំង៣រូបសុទ្ធតែដណ្ដើមបានជ័យជម្នះលើគូប្រកួតរៀងៗខ្លួន ដោយឡែកកីឡាករ ឡុង បេលឿន បង្ហាញសមត្ថភាពដ៏គួរឲ្យកោតសរសើរបំផុត ដោយផ្ដួលកីឡាករជើងខ្លាំងបារាំង SPEA Bapa ឲ្យបោះបង់ការប្រកួតនៅត្រឹមទឹកទី៣។
មុនពេលចេញដំណើរទៅប្រកួតផ្សព្វផ្សាយក្បាច់គុនបុរាណខ្មែរលើកនេះ កីឡាករ ឡុង បេលឿន ដែលត្រូវប៉ះជាមួយ SPEA Bapa ក្នុងប្រភេទទម្ងន់៦៥គីឡូក្រាម ទទួលរងការរិះគន់យ៉ាងចាស់ដៃពីសំណាក់អ្នកតាមដានគុនខ្មែរមួយចំនួន។ ពួកគេយល់ថា កីឡាករបារាំងរូបនេះខ្លាំងមិនធម្មតាឡើយ ហើយបាននាំគ្នាថាការទៅប្រកួតនេះអាចនឹងខាតបង់ប្រាក់សំបុត្រយន្តហោះទទេ។
ប៉ុន្តែផ្ទុយពីការរំពឹងទុក ឡុង បេលឿន បានធ្វើឲ្យ SPEA Bapa បោះបង់ការប្រកួតយ៉ាងងាយ។ តាមពិតនៅទឹកទី១ និងទី២ កីឡាករបារាំងរូបនេះបានព្យាយាមសម្រុកយ៉ាងខ្លាំង។ ឡុង បេលឿន ហាក់ដូចជាដកថយរកឱកាសវាយតបតវិញបណ្ដើរៗ និងទប់ទល់នឹងការវាយលុកទាំងកម្រោលរបស់គូប្រកួត។
លុះចូលដល់ទឹកទី៣ភ្លាម ឡុង បេលឿន ក៏សម្រុកវាយសន្ធាប់ដោយប្រើស្នៀតកែងនិងជង្គង់យ៉ាងធ្ងន់ៗ ធ្វើឲ្យកីឡាករបរទេសរូបនេះទប់លែងជាប់ ក៏បោះកន្សែងសុំចុះចាញ់តែម្ដង។ ជ័យជម្នះដ៏ត្រចះត្រចង់របស់ ឡុង បេលឿន លើកនេះ បានធ្វើឲ្យអ្នករិះគន់ទាំងនោះភ្លឺភ្នែកលែងហ៊ានក្អកទៀត។
រីឯកីឡាករ ធន់ ស៊ីហាវ ដែលប៉ះជាមួយ NEO Gomis ក្នុងប្រភេទទម្ងន់៦២គីឡូក្រាម ក៏បានបង្ហាញសមត្ថភាពបានល្អដោយយកឈ្នះពិន្ទុទៅលើគូប្រកួតជើងខ្លាំងរូបនេះផងដែរ។ ចំណែកកីឡាករ ធីម សៀងហៃ ក៏បានយកឈ្នះពិន្ទុកីឡាករ UNIS Soly ក្នុងប្រភេទទម្ងន់៥៤គីឡូក្រាមដូចគ្នា។ ជោគជ័យទាំងនេះបានលើកមុខមាត់ក្បាច់គុនខ្មែរលើឆាកអន្តរជាតិ។
