By រាជធានីភ្នំពេញ, ថ្ងៃទី ១០ ខែវិច្ឆិកា ឆ្នាំ ២០២៥ ៖ ណាហ្គាវើលដ៍ ជាក្រុមហ៊ុនបដិសណ្ឋារកិច្ចឈានមុខគេមួយក្នុងប្រទេសកម្ពុជា បានបង្ហាញយ៉ាងច្បាស់ថា ភាពជោគជ័យរបស់ខ្លួនមិនមែនត្រឹមតែជាសេវាកម្មល្អ ភាពសម្បូរបែបនៃការកម្សាន្ត និងម្ហូបអាហារដ៏ឆ្ងាញ់ពិសាប៉ុណ្ណោះទេ ប៉ុន្តែវាកើតចេញពីការប្តេជ្ញាចិត្តដ៏ខ្ជាប់ខ្ជួនរបស់បុគ្គលិកទាំងអស់។ ពីបុគ្គលិកការិយាល័យជួរមុខ រហូតដល់មេចុងភៅ អ្នកសិល្បៈ និងបុគ្គលិកគាំទ្រផ្សេងៗ សុទ្ធសឹងតែជាកម្លាំងចលករដ៏សំខាន់ក្នុងការជំរុញប្រតិបត្តិការរបស់ក្រុមហ៊ុន។
វប្បធម៌ការងារដ៏រឹងមាំនេះ មិនត្រឹមតែបានលើកកម្ពស់បទពិសោធន៍របស់អតិថិជនប៉ុណ្ណោះទេ ប៉ុន្តែក៏បានកំណត់និយមន័យថ្មីនៃកន្លែងធ្វើការផងដែរ។ ជាក់ស្តែង ណាហ្គាវើលដ៍បានទទួលវិញ្ញាបនបត្រ Great Place To Work® Certification™ ជាមួយនឹងពិន្ទុដ៏គួរឲ្យកត់សម្គាល់រហូតដល់ ៩៥% ខណៈដែលពិន្ទុអប្បបរមាដែលតម្រូវគឺ ៦៥%។ ការទទួលស្គាល់ដ៏ត្រចះត្រចង់នេះ កើតឡើងស្របពេលដែលក្រុមហ៊ុនកំពុងអបអរសាទរខួបលើកទី៣០ នៃឧត្តមភាពរបស់ខ្លួន ដោយបញ្ជាក់យ៉ាងច្បាស់ថា ការវិនិយោគលើបុគ្គលិកដ៏ពូកែជាង ៦០០០ នាក់ គឺជាគ្រឹះដ៏រឹងមាំសម្រាប់ភាពជោគជ័យយូរអង្វែងរបស់ក្រុមហ៊ុន។
ណាហ្គាវើលដ៍បានយកចិត្តទុកដាក់ខ្ពស់ចំពោះសុខុមាលភាពរបស់បុគ្គលិកលើសពីការផ្តល់ជូនមូលដ្ឋានទូទៅ។ បុគ្គលិកទាំងអស់អាចទទួលបានអត្ថប្រយោជន៍យ៉ាងទូលំទូលាយដូចជា សេវាពិនិត្យ និងព្យាបាលនៅគ្លីនិកសុខភាពរបស់ក្រុមហ៊ុន ២៤ ម៉ោងក្នុងមួយថ្ងៃ ៧ ថ្ងៃក្នុងមួយសប្តាហ៍ ការធានារ៉ាប់រងគ្រប់ប្រភេទ អាហារឥតកំណត់ ២៤ ម៉ោងដែលមានការត្រួតពិនិត្យអនាម័យខ្ពស់ និងផ្សារណាហ្គាម៉ាត។ លើសពីនេះ ក្រុមហ៊ុនក៏លើកទឹកចិត្តបុគ្គលិកឲ្យមានរបៀបរបបរស់នៅប្រកបដោយសុខភាពល្អ និងសកម្មតាមរយៈគំនិតផ្តួចផ្តើមយ៉ូហ្គា កម្មវិធីរត់ប្រណាំងប្រចាំឆ្នាំ និងការប្រកួតបាល់ទាត់ណាហ្គាវើលដ៍។ សុវត្ថិភាពក៏ជាអាទិភាពចម្បងផងដែរ ដោយមានការណែនាំជាប្រចាំ ការបណ្តុះបណ្តាលសុវត្ថិភាពអគ្គិភ័យ និងការត្រួតពិនិត្យអនាម័យជារៀងរាល់ថ្ងៃ ដើម្បីធានាបាននូវបរិយាកាសការងារដែលប្រសើរបំផុត។
កញ្ញា ហ៊ុល សុភាព ដែលបានចាប់ផ្តើមបម្រើការងារនៅ ណាហ្គាវើលដ៍ តាំងពីឆ្នាំ២០០០ ហើយបានអភិវឌ្ឍខ្លួនពីបុគ្គលិកសម្អាតរហូតក្លាយជាបុគ្គលិកប្រតិបត្តិផ្នែករដ្ឋបាល បានថ្លែងដោយក្តីរីករាយថា៖ «ណាហ្គាវើលដ៍បានផ្តល់អាហារ ២៤ ម៉ោងជូនបុគ្គលិកជាមួយនឹងការត្រួតពិនិត្យគុណភាពអាហារដោយផ្នែកសុវត្ថិភាព និងអនាម័យជារៀងរាល់ថ្ងៃ។ ថែមទាំងមានសេវាពិនិត្យ និងព្យាបាល ២៤/៧ នៅគ្លីនិកសុខភាពរបស់ក្រុមហ៊ុនសម្រាប់បុគ្គលិកដែលមានជំងឺ ព្រមទាំងការគាំទ្រពី ប.ស.ស។ សូម្បីតែក្នុងអំឡុងពេលដ៏លំបាកនៃជំងឺកូវីដ-១៩ ក្រុមហ៊ុនក៏នៅតែបន្តយកចិត្តទុកដាក់ និងផ្តល់ប្រាក់បៀវត្សជូនពួកយើងទាំងអស់គ្នាដដែល។ កន្លែងធ្វើការនេះពិតជាប្រៀបដូចជាផ្ទះទីពីររបស់ខ្ញុំ»។ ពាក្យសម្តីដ៏ស្មោះត្រង់នេះបានឆ្លុះបញ្ចាំពីការយកចិត្តទុកដាក់ជាអាទិភាពរបស់ក្រុមហ៊ុនចំពោះបុគ្គលិក ទោះបីស្ថិតក្នុងកាលៈទេសៈលំបាកយ៉ាងណាក៏ដោយ។
ការអភិវឌ្ឍវិជ្ជាជីវៈ និងការទទួលស្គាល់ស្នាដៃ គឺជាវប្បធម៌ដ៏សំខាន់មួយនៅណាហ្គាវើលដ៍។ ជាក់ស្តែង ក្នុងឆ្នាំ២០២៤ បុគ្គលិកបានបញ្ចប់ការបណ្តុះបណ្តាលសរុបជាង ២០៥,០០០ ម៉ោង ដែលរៀបចំឡើងដើម្បីបង្កើនទាំងជំនាញបច្ចេកទេស និងជំនាញទន់ដូចជា ការទំនាក់ទំនង ការងារជាក្រុម និងភាពជាអ្នកដឹកនាំ។ ចាប់តាំងពីឆ្នាំ២០២៣ មក មានអ្នកដឹកនាំជាង ៥០០ នាក់បានអភិវឌ្ឍសមត្ថភាពរបស់ខ្លួនតាមរយៈកម្មវិធីបណ្តុះបណ្តាលភាពជាអ្នកដឹកនាំរបស់ក្រុមហ៊ុន។
ការប្រកួតប្រជែងជំនាញតាមផ្នែកប្រចាំឆ្នាំរបស់ណាហ្គាវើលដ៍ ដែលបានចាប់ផ្តើមនៅឆ្នាំ២០១៦ ក៏បានក្លាយជាព្រឹត្តិការណ៍ដ៏សំខាន់មួយសម្រាប់បុគ្គលិកផងដែរ។ កម្មវិធីនេះមិនត្រឹមតែជាកន្លែងបង្ហាញពីភាពច្នៃប្រឌិត និងជំនាញរបស់បុគ្គលិកជួរមុខផ្នែកគេហកិច្ច ម្ហូបអាហារ ភេសជ្ជៈ ចុងភៅ និងផ្នែកជាច្រើនទៀតប៉ុណ្ណោះទេ ប៉ុន្តែក៏ជាការលើកកម្ពស់ឧត្តមភាព បង្កើនចំណងមិត្តភាព និងបង្កើតវប្បធម៌ដែលផ្តល់តម្លៃដល់ការចូលរួមរបស់បុគ្គលិកគ្រប់រូប។ អ្នកឈ្នះក៏ត្រូវបានផ្តល់ឱកាសឲ្យចូលរួមប្រកួតប្រជែងថ្នាក់ជាតិដើម្បីពង្រឹងសមត្ថភាពរបស់ខ្លួនបន្ថែមទៀត។ លោក ជុំ យ៉េត ជាមេចុងភៅម្នាក់ដែលបានចាប់ផ្តើមអាជីពជាលេខាផ្នែកម្ហូបអាហារ និងភេសជ្ជៈនៅឆ្នាំ២០១៧ បានចែករំលែកថា៖ «ខ្ញុំធ្លាប់ជាអ្នកលាងចាននៅតាមរោងចក្រ ប៉ុន្តែក្រោយចូលរួមជាមួយ ណាហ្គាវើលដ៍ ខ្ញុំបានឈ្នះចំណាត់ថ្នាក់លេខ១ ក្នុងការប្រកួត ខេមហ្វ៊ូដ និងការប្រកួតធ្វើម្ហូបនៅស្ថានីយ៍ទូរទស្សន៍ស៊ីធីអិន។ វាជារឿងលំបាក ប៉ុន្តែខ្ញុំអាចធ្វើបាន។ អរគុណក្រុមហ៊ុនដែលបានផ្តល់ការបណ្តុះបណ្តាលដល់ខ្ញុំ»។
ការទទួលស្គាល់បុគ្គលិកក៏មានតាមរយៈការផ្តល់រង្វាន់លើកទឹកចិត្តដល់បុគ្គលិកឆ្នើមប្រចាំខែ និងពានរង្វាន់បុគ្គលិកស្មោះត្រង់ ដែលជាការលើកកម្ពស់ស្នាដៃ និងសុចរិតភាពរបស់បុគ្គលិកគ្រប់ផ្នែក។ ណាហ្គាវើលដ៍ក៏ផ្តោតសំខាន់លើការដំឡើងមុខតំណែងផ្ទៃក្នុង និងការពិភាក្សាបើកចំហរដោយមានការជ្រើសរើសប្រតិភូបុគ្គលិក ដើម្បីធានាថារាល់មតិយោបល់របស់ពួកគេត្រូវបានស្តាប់ និងយកចិត្តទុកដាក់។
លោក សារ៉ែន ពិសិដ្ឋ មេចុងភៅផ្នែកនំ ដែលធ្លាប់ទទួលបានការបណ្តុះបណ្តាលនៅបរទេសដោយការឧបត្ថម្ភពីក្រុមហ៊ុន និងមានឱកាសធ្វើជាគណៈកម្មការដាក់ពិន្ទុក្នុងការប្រកួតប្រជែងធ្វើម្ហូបនៅទីក្រុងកូឡុំបូ បានបញ្ជាក់ពីតម្លៃនៃកម្មវិធីអភិវឌ្ឍន៍របស់ណាហ្គាវើលដ៍ថា៖ «សកម្មភាពទាំងនេះបានបង្ហាញយ៉ាងច្បាស់ថា ក្រុមហ៊ុនពិតជាយកចិត្តទុកដាក់យ៉ាងខ្លាំងទៅលើសុខុមាលភាព និងការចូលរួមរបស់បុគ្គលិក។ វាបង្កើតបានជាបរិយាកាសវិជ្ជមានមួយដែលបុគ្គលិកគ្រប់រូបមានភាពរីករាយ មានកន្លែងធ្វើការកក់ក្តៅ ហើយត្រូវបានលើកទឹកចិត្តឲ្យអភិវឌ្ឍខ្លួន បន្តនៅជាមួយក្រុមហ៊ុនយូរអង្វែង និងខិតខំបំពេញការងារឲ្យបានល្អបំផុត»។
ចំណងមិត្តភាព និងស្មារតីសហគមន៍នៅណាហ្គាវើលដ៍ត្រូវបានពង្រឹងយ៉ាងខ្លាំងតាមរយៈការរៀបចំព្រឹត្តិការណ៍វប្បធម៌លក្ខណៈគ្រួសារជាច្រើន។ ទាំងនេះរួមមានពិធីបុណ្យចូលឆ្នាំប្រពៃណីជាតិខ្មែរ កម្មវិធីប្រឡងសមត្ថភាព និងទេពកោសល្យ ទិវាកុមារ និងសកម្មភាពកីឡាជាដើម ដែលសុទ្ធសឹងតែបានបង្កើនចំណងមិត្តភាព និងសាមគ្គីភាពរវាងបុគ្គលិកគ្រប់ផ្នែក។
ការផ្តល់ត្រឡប់ទៅសហគមន៍វិញក៏ជាអាទិភាពដ៏មានតម្លៃផងដែរ។ ក្នុងឆ្នាំ២០២៤ បុគ្គលិកណាហ្គាវើលដ៍បានចំណាយពេលស្ម័គ្រចិត្តរហូតដល់ ៧,៧០០ ម៉ោងតាមរយៈកម្មវិធី «ណាហ្គាវើលដ៍ បេះដូងសប្បុរស» ដែលជាផ្នែកមួយនៃទំនួលខុសត្រូវសង្គមរបស់ក្រុមហ៊ុន។ កម្មវិធីនេះបានគាំទ្រសិស្សានុសិស្សជិត ៣,៨០០ នាក់ តាមរយៈការផ្តល់ការណែនាំ ការដាំកូនឈើ និងជំនួយជាច្រើនទៀត។ ចាប់តាំងពីឆ្នាំ២០១៤ មក កម្មវិធីទាំងនេះបានជះឥទ្ធិពលវិជ្ជមានដល់មនុស្សជិត ១ លាននាក់ទូទាំងប្រទេសកម្ពុជា ដែលបានបង្កើនមោទកភាព ចំណងមិត្តភាព និងការផ្លាស់ប្តូរជាក់ស្តែងក្នុងសហគមន៍។ កញ្ញា ហោ នីកា បុគ្គលិកប្រតិបត្តិជាន់ខ្ពស់ផ្នែកធនធានមនុស្ស និងជាអ្នកស្ម័គ្រចិត្តនៃណាហ្គាវើលដ៍បេះដូងសប្បុរស បានថ្លែងថា៖ «ការផ្តល់ត្រឡប់នេះពិតជាមានអត្ថន័យខ្លាំងណាស់។ ខ្ញុំបានចែករំលែកបទពិសោធន៍របស់ខ្ញុំដល់កុមារទាំងនោះ ហើយខ្ញុំសង្ឃឹមថាវានឹងលើកទឹកចិត្តពួកគេឲ្យខិតខំរៀនសូត្រដើម្បីទទួលបានអនាគតកាន់តែប្រសើរ»។
លើសពីពិន្ទុ Trust Index™ ដ៏ល្អឥតខ្ចោះ ៩៤% នៃបុគ្គលិកដែលបានចូលរួមស្ទង់មតិ បានសម្តែងនូវមោទកភាពយ៉ាងខ្លាំងក្នុងការធ្វើការនៅណាហ្គាវើលដ៍។ ក្នុងចំណោមនោះ មានលោក ហេង ជាទុន ដែលបានបម្រើការងារអស់រយៈពេល ២៥ ឆ្នាំ ហើយបានអភិវឌ្ឍខ្លួនរហូតក្លាយជាអនុប្រធានផ្នែកហិរញ្ញវត្ថុ។ លោក ឆែម សុធា អ្នកគ្រប់គ្រងផ្នែកសន្តិសុខ ដែលបានចូលរួមជាមួយក្រុមហ៊ុនក្នុងឆ្នាំ២០០៦ និងទទួលបានការដំឡើងមុខតំណែង ៤ ដង ក៏បានថ្លែងដែរថា៖ «សម្រាប់ខ្ញុំ ណាហ្គាវើលដ៍មិនត្រឹមតែជាកន្លែងធ្វើការប៉ុណ្ណោះទេ ប៉ុន្តែជាកន្លែងដែលផ្តល់តម្លៃ និងវិនិយោគលើបុគ្គលិក ដោយជួយពួកយើងឲ្យអភិវឌ្ឍខ្លួន និងវិជ្ជាជីវៈ»។
ណាហ្គាវើលដ៍បានបង្ហាញថាខ្លួនមានតម្លៃលើសពីកន្លែងធ្វើការ។ វាជាផ្ទះទីពីរដែលពោរពេញទៅដោយការយកចិត្តទុកដាក់ ការបណ្តុះបណ្តាលសមត្ថភាព និងការផ្តល់ឱកាសដល់បុគ្គលិកគ្រប់រូបដើម្បីអភិវឌ្ឍខ្លួន។ The Great Place To Work® Certification™ គឺជាសក្ខីភាពបញ្ជាក់ពីកន្លែងធ្វើការដ៏ឆ្នើមលំដាប់ពិភពលោក ដែលកើតចេញពីមតិស្មោះត្រង់ពីបេះដូងរបស់បុគ្គលិកគ្រប់រូប ដែលបានរួមចំណែកធ្វើឲ្យ ណាហ្គាវើលដ៍ ទទួលបានភាពជោគជ័យដូចសព្វថ្ងៃនេះ។ សូមចូលរួមជាមួយ ណាហ្គាវើលដ៍ ដើម្បីទទួលបានការងារដែលផ្តល់អត្ថប្រយោជន៍ជាច្រើន និងរួមចំណែកធ្វើឲ្យវិស័យបដិសណ្ឋារកិច្ចកាន់តែប្រសើរឡើង។ សម្រាប់ព័ត៌មានបន្ថែម សូមចូលទៅកាន់ www.nagaworld.com។
អំពី ណាហ្គាវើលដ៍៖
ជាមួយនឹងការពង្រីកបន្ថែមចុងក្រោយរបស់ខ្លួន ណាហ្គាវើលដ៍ មានបន្ទប់ប្រភេទ Suite និង Deluxe ចំនួន ១,៦៥៨ បន្ទប់ ភោជនីយដ្ឋាន បារ និងក្លឹបកម្សាន្តជាង ២០ កន្លែង មណ្ឌលស្ប៉ាប្រណីត ២ កន្លែង សាលមហោស្រព NABA ដែលមាន ២,០០០ កៅអីនៅណាហ្គាវើលដ៍ទី២ ផ្សារទំនិញរួចពន្ធប្រតិបត្តិការដោយក្រុមហ៊ុន China Duty Free Group ដែលជាផ្សារទំនើបក្រោមដីដំបូងគេនៅកម្ពុជាមានលក់ផលិតផលម៉ាកល្បីៗលំដាប់អន្តរជាតិ សេវាកម្មកម្សាន្តដ៏សម្បូរបែប ព្រមទាំងសាលសម្រាប់រៀបចំការប្រជុំ និងព្រឹត្តិការណ៍នានាប្រកបដោយភាពឈានមុខគេ។ សម្រាប់សំណួរអំពីការផ្សព្វផ្សាយ ឬរូបភាព សូមទាក់ទងទៅកាន់៖ media@nagaworld.com ។
