By អាជ្ញាធរថៃបានបញ្ជាក់ថា រដ្ឋាភិបាលទីក្រុងបាងកកបានសម្រេចធ្វើបត្យាប័នស្តេចល្បែងដ៏ល្បីឈ្មោះ She Zhijiang ទៅកាន់ប្រទេសចិនហើយ នៅថ្ងៃពុធទី១២ ខែវិច្ឆិកានេះ បញ្ចប់នូវជម្លោះផ្លូវច្បាប់ដ៏ស្មុគស្មាញដែលអូសបន្លាយអស់រយៈពេលជាង ៣ ឆ្នាំ។
តាមការរាយការណ៍ពីទីភ្នាក់ងារព័ត៌មាន Reuters លោក She អាយុ ៤៣ ឆ្នាំ ដែលជាពលរដ្ឋចិន និងមានកាន់លិខិតឆ្លងដែនកម្ពុជាផងដែរ ត្រូវបានចាប់ខ្លួននៅទីក្រុងបាងកក កាលពីខែសីហា ឆ្នាំ ២០២២។ ការចាប់ខ្លួននេះ គឺធ្វើឡើងតាមដីកាក្រហមរបស់ប៉ូលិសអន្តរជាតិ (Interpol) ដែលចេញដោយទីក្រុងប៉េកាំង។ អាជ្ញាធរចិនបានចោទប្រកាន់លោក She ពីបទដំណើរការកាស៊ីណូអនឡាញខុសច្បាប់ និងគេហទំព័រល្បែងស៊ីសងជាច្រើនទៀត ដោយប្រើប្រាស់ប្រទេសមីយ៉ាន់ម៉ាជាមូលដ្ឋានប្រតិបត្តិការសំខាន់ និងជាប់ពាក់ព័ន្ធនឹងករណីលាងលុយកខ្វក់ផងដែរ។
ប៉ូលិសថៃបានបញ្ជាក់បន្ថែមថា លោក She នឹងត្រូវប្រឈមមុខនឹងការកាត់ទោសនៅក្នុងប្រទេសចិន ចំពោះបទឧក្រិដ្ឋដែលត្រូវបានចោទប្រកាន់។ ទីក្រុងប៉េកាំងថែមទាំងបានបញ្ជូនយន្តហោះពិសេសមួយគ្រឿងទៅកាន់អាកាសយានដ្ឋានសុវណ្ណភូមិ ក្នុងទីក្រុងបាងកក ដើម្បីនាំខ្លួនលោក She ត្រឡប់ទៅប្រទេសចិនវិញទៀតផង។
លោក Zhao Mengtao ទីប្រឹក្សាស្ថានទូតចិនប្រចាំទីក្រុងបាងកក បានលើកឡើងថា «នេះគឺជាការបង្ហាញពីកម្រិតខ្ពស់នៃកិច្ចសហប្រតិបត្តិការ» រវាងប្រទេសទាំងពីរ។ លោកបានបន្តទៀតថា ទាំងចិន និងថៃ នឹងបន្តធ្វើការរួមគ្នាប្រឆាំងនឹងឧក្រិដ្ឋកម្មគ្រប់ប្រភេទ រួមទាំងល្បែងអនឡាញ និងការបោកប្រាស់តាមអ៊ីនធឺណិតផងដែរ។
ទោះជាយ៉ាងណា មេធាវីរបស់លោក She គឺលោក Sanya Eadjongdee បានចាត់ទុកនីតិវិធីធ្វើបត្យាប័ននេះថា «ខុសប្រក្រតី» ហើយបានអះអាងថា កូនក្តីរបស់លោកបានបដិសេធទាំងស្រុងនូវរាល់ការចោទប្រកាន់ទាំងអស់។
គួររំលឹកផងដែរថា មុនពេលត្រូវបានចាប់ខ្លួន លោក She មានជាប់ពាក់ព័ន្ធយ៉ាងជិតស្និទ្ធជាមួយនឹងគម្រោង Shwe Kokko ដែលមានតម្លៃរហូតដល់ ១៥ ពាន់លានដុល្លារនៅតំបន់ព្រំដែនថៃ-មីយ៉ាន់ម៉ា។ គម្រោងនេះជាកាស៊ីណូ និងរមណីយដ្ឋានទេសចរណ៍ដ៏ធំមួយ ដែលក្រសួងរតនាគារសហរដ្ឋអាមេរិកបានដាក់ទណ្ឌកម្មកាលពីឆ្នាំ ២០២៣ ដោយសារការចោទប្រកាន់ថាមានទំនាក់ទំនងជាមួយបណ្ដាញបោកប្រាស់ និងការជួញដូរមនុស្ស។
តំបន់ព្រំដែនដែលភ្ជាប់ប្រទេសថៃ មីយ៉ាន់ម៉ា ឡាវ និងកម្ពុជា បានក្លាយជាមជ្ឈមណ្ឌលដ៏ធំសម្រាប់ការក្លែងបន្លំតាមអ៊ីនធឺណិត និងការជួញដូរមនុស្ស ចាប់តាំងពីការរាតត្បាតជំងឺកូវីដ-១៩ មក។ អង្គការសហប្រជាជាតិបានប៉ាន់ប្រមាណថា ប្រតិបត្តិការឧក្រិដ្ឋកម្មប្រភេទនេះមានទំហំទឹកប្រាក់រាប់ពាន់លានដុល្លារឯណោះ។
