ថៃហ៊ាន «សាក» លោក ត្រាំ? នាយករដ្ឋមន្ត្រីថៃ គំរាមផ្ដាច់ពាណិជ្ជកម្មជាមួយអាមេរិក!

នាយករដ្ឋមន្ត្រីថៃ លោក អនុទីន ឆាន់វីរៈគុល ត្រូវបានគេមើលឃើញថា ហាក់កំពុង «សាកល្បង» ជាមួយប្រមុខរដ្ឋាភិបាលទីក្រុងវ៉ាស៊ីនតោន លោក ដូណាល់ ត្រាំ តាមរយៈការគំរាមផ្ដាច់ពាណិជ្ជកម្មជាមួយសហរដ្ឋអាមេរិក ប្រសិនបើទីក្រុងវ៉ាស៊ីនតោនហ៊ានដំឡើងពន្ធបន្ថែមទៀត។ ការគំរាមនេះកើតឡើងក្រោយទីក្រុងបាងកក ប្រកាសផ្អាកកិច្ចព្រមព្រៀងសន្តិភាពជាមួយកម្ពុជា។

តាមការផ្សាយរបស់ Bangkok Post, លោក អនុទីន បានថ្លែងនៅក្នុងមហាវិទ្យាល័យការពារជាតិក្នុងទីក្រុងបាងកក កាលពីថ្ងៃពុធ ទី១២ ខែវិច្ឆិកា ឆ្នាំ២០២៥ ថា ប្រទេសថៃនឹងស្វែងរកដៃគូពាណិជ្ជកម្មផ្សេងជំនួសអាមេរិក ប្រសិនបើទីក្រុងវ៉ាស៊ីនតោននៅតែបន្តដំឡើងពន្ធ។ ជាមួយគ្នានោះ លោកក៏បានប្រាប់ទៅរដ្ឋាភិបាលទីក្រុងបាងកកថា គួរទុករឿងពន្ធទុកមួយឡែកសិន ហើយត្រូវគិតពីប្រយោជន៍ជាតិ និងប្រជាពលរដ្ឋជាអាទិភាព។

យ៉ាងណា មកទល់ពេលនេះ មិនទាន់មានប្រតិកម្មណាមួយពីសំណាក់មេដឹកនាំមហាអំណាចផុតលេខអាមេរិក លោក ដូណាល់ ត្រាំ តបទៅនឹងការព្រមានរបស់នាយករដ្ឋមន្ត្រីថៃនោះទេ ប៉ុន្តែគេជឿជាក់ថា លោក ត្រាំ ប្រហែលជាបានជ្រាបរឿងនេះរួចហើយ។

ទោះបីជាយ៉ាងនេះក្ដី នៅថ្ងៃដដែលនោះ អតីតឧបការីក្រសួងការបរទេសថៃ លោក Russ Chaleejandra បានរិះគន់លោក អនុទីន ចំពោះការថ្លែងដែលបង្កជម្លោះលើវិធានការពន្ធរបស់អាមេរិក។ លោកលើកឡើងថា សម្ដីបែបនេះប្រថុយនឹងការធ្វើឲ្យថៃឯកោពីសម្ព័ន្ធមិត្តដ៏សំខាន់ ហើយអាចផ្ដល់ផលប្រយោជន៍ដល់កម្ពុជាទៅវិញ។

លោក Russ បានថ្លែងថា សម្ដីរបស់លោក អនុទីន អាចប៉ះពាល់ដល់ទំនាក់ទំនងថៃ-អាមេរិក ហើយអាចជួយពង្រឹងទំនាក់ទំនងរវាងកម្ពុជាជាមួយទីក្រុងវ៉ាស៊ីនតោនដោយអចេតនា។ លោកបានរៀបរាប់ថា «ភាគីដែលនឹងទទួលបានផលប្រយោជន៍ច្រើនជាងគេពីសម្ដីទាំងនេះ គឺកម្ពុជា។ វាធ្វើឲ្យថៃឯកោពីសម្ព័ន្ធមិត្តមហាអំណាចពិភពលោក ហើយជំរុញកម្ពុជាឲ្យកាន់តែកៀកជាមួយសហរដ្ឋអាមេរិក»។ លោកក៏បានព្រមានផងដែរថា ប្រជាជនថៃអាចប្រឈមមុខនឹងផលវិបាកសេដ្ឋកិច្ច ប្រសិនបើសហរដ្ឋអាមេរិកឆ្លើយតបដោយសកម្មភាពពន្ធសងសឹក។ លោកបានចោទសួរថា «តើនាយករដ្ឋមន្ត្រីត្រៀមខ្លួនទទួលខុសត្រូវឬទេ ប្រសិនបើជីវភាពរបស់ប្រជាជនរងផលប៉ះពាល់?»។

អត្ថបទ៖ សុខ សុវណ្ណ